वीज पडून मृत्यूमुखी पडलेल्या कुटुंबीयांना पालकमंत्र्यांकडून सांत्वनपर शासकीय मदत

कुमार अमोल | सह्याद्री चौफेर 

नागपूर : वीज पडून मृत्युमुखी पडलेल्या कुटुंबियांना राज्याचे ऊर्जा मंत्री तथा जिल्ह्याचे पालकमंत्री डॉ. नितीन राऊत यांनी आज प्रत्यक्ष त्यांच्या घरी जाऊन सांत्वनपर शासकीय मदत दिली.

गेल्या काही दिवसात मान्सून पूर्व वादळ वाऱ्यामध्ये ग्रामीण भागात काही ठिकाणी वीज पडून शेतात काम करणारे मजूर मृत्युमुखी पडल्याच्या घटना घडल्या आहेत. अशा दोन दुर्घटनाग्रस्त कुटुंबांचे सांत्वन करण्यासाठी आज पालकमंत्र्यांनी जिल्ह्याच्या उमरेड तालुक्याला भेटी दिल्या. यावेळी त्यांच्यासोबत आमदार राजू पारवे, जिल्हाधिकारी आर. विमला होत्या.

वीज पडून निधन झालेल्या इतवारीपेठ, उमरेड येथील दिवंगत उषा मांढळकर यांची कन्या दीपाली मांढळकर हिला ४ लाख रुपयांचा शासकीय मदतीचा धनादेश सुपूर्द केला. तर दुसऱ्या घटनेत शेतात काम करीत असताना वीज पडून मृत्युमुखी पडलेले मौजा हिवरा येथील शेतकरी दिवंगत भाऊरावजी वाढई यांच्या पत्नी रमाबाई वाढई यांना सांत्वनपर शासकीय मदत म्हणून ४ लाखांचा धनादेश सुपूर्द केला.

याप्रसंगी आमदार राजू पारवे, जिल्हाधिकारी श्रीमती आर. विमला उपस्थित होत्या.

चमत्कार अखेर घडलाच; जय सहकार पॅनलची विजयाची परंपरा कायम

कुमार अमोल | सह्याद्री चौफेर

वणी : अवघ्या विदर्भासह वणी परिसराचे लक्ष लागून असलेल्या श्री रंगनाथ स्वामी नागरी सह. पतसंस्थेच्या निवडणुकीचा निकाल समोर आला असून जय सहकारने आपल्या विजयाची परंपरा कायम ठेवली आहे. या निवडणुकीत सहकार पॅनलच्या सर्व उमेदवारांनी विजय मिळवला असून परिवर्तन पॅनलसाठी हा मोठा धक्का मानला जात आहे. या निवडणुकीत 'परिवर्तन'च्या सर्व उमेदवारांना दारूण पराभवाचा सामना करावा लागला आहे.

परिवर्तन पॅनलपुढे सतराही संचालकाच्या जागा जिंकण्याचे आव्हान असताना, जय सहकारने पुन्हा काँग्रेसच्या पाठिंब्याला तडाखा दिला आहे. कॉंग्रेससह परिवर्तन पॅनल ने पूर्ण ताकत लावून सुद्धा विरोधी पॅनल अॅड देविदास काळे यांच्या अचूक नियोजनामुळे अॅड ढवस यांना विजय मिळवता आला नाही. सहकार च्या अॅड देविदास काळे  यांनी मिळवलेला विजय अन्य साठी आत्मविश्वास वाढवणारा तर पाठिंबा दिलेल्याना आत्मपरीक्षण करण्यासाठी भाग पाडणारा आहे.

पतसंस्थेच्या या निवडणुकीत विजयी झालेल्या उमेदवारांमध्ये अॅड देविदास काळे, विवेकानंद आबाराव मांडवकर, सुधीर जनार्दन दामले, हरीशंकर मन्साराम पांडे, लिंगारेड्डी मल्लारेड्डी अंडेलवार, अरविंद वसंतराव ठाकरे, परीक्षित अरुण एकरे, चिंतामण पांडुरंग आगलावे, गोपाळ रघुनाथ पिंपळशेंडे, पुरुषोत्तम हनुमंतू बद्दमवार, घनश्याम वासुदेव निखाडे, सुनील देवराव देठे, सौ छाया अशोक ठाकुरवार, सौ निम्माताई सुनील जीवने, रमेश केशव भोंगळे, सुरेश तानबाजी बरडे, व उदय सदाशिव रायपुरे यांचा समावेश आहे. 

लाचखोर सहायक अभियंता ६ हजार रुपयाची लाच घेताना लाचलुचपत विभागाच्या जाळ्यात

कालू रामपुरे | सह्याद्री चौफेर 

वरोरा : डिमांड काढून देण्याच्या कामासाठी विद्युत वितरण कंपनी वरोरा, मधील सहायक अभियंता याला ६ हजार रुपयांची लाच घेताना चंद्रपूर लाचलुचपत विभागाने रंगेहाथ अटक केली. 

तक्रारदार हे वरोरा येथील रहिवासी असून सोलर सिस्टम फिटिंग व इलेक्ट्रिशियन चे कामे करतो, सोबतच ग्राहकांच्या घरी सोलर सिस्टम लावण्याचे काम करीत असून त्यासाठी डिमांड काढण्याच्या कामासाठी सहायक अभियंता श्रीणु बाबू चुक्का यांनी तक्रार कर्त्याला सहा हजार रुपयाची मागणी केली. तक्रारदार यांची पैसे देण्याची इच्छा नसल्याने त्यांनी याबाबत चंद्रपूर लाचलुचपत विभागाकडे रीतसर तक्रार केली. 

लाचलुचपत विभागाच्या पोलीस निरीक्षक शिल्पा भरडे यांनी प्रकरणाची पडताळणी करीत प्लॅन आखला व महावितरण कार्यालय वरोरा येथे आज २७ जून रोजी तक्रारदाराकडून सहायक अभियंता श्रीणु चुक्का हे सहा हजार रुपये घेत असतांना लाचलुचपत विभागाने रंगेहात अटक केली.

सदरची कार्यवाही ही राकेश ओला पोलीस उपायुक्त,पोलीस अधिक्षक ला.प्र.वि. नागपुर, मधुकर गिते, अप्पर पोलीस अधिक्षक, ला.प्र.वि. नागपूर, तसेच पोलीस उपअधिक्षक, अविनाश भामरे, ला.प्र.वि. चंद्रपूर यांचे मार्गदर्शनात पोनि शिल्पा भरडे, तसेच कार्यालयीन स्टॉफ नापोकॉ नरेश नन्नावरे, पो.अ. रविकुमार ढेंगळे, राकेश जांभुळकर, वैभव गाडगे व चालक सतिश सिडाम यांनी यशस्वी पार पाडली आहे.

पुढील तपास सुरू आहे.

यापुढे जनतेला कोणीही लाचखोर अधिकारी,कर्मचारी किवा त्यांचे वतीने कोणी खाजगी इसम लाचेची मागणी करीत असल्यास लाच लुचपत प्रतिबंधक विभागाशी संपर्क साधावा असे आवाहन करण्यात येत आहे.

'युनिक मेडिकल फौंडेशन'च्या वतीने वारकऱ्यांना मोफत औषधोपचार

अतुल खोपटकर | सह्याद्री चौफेर 

पुणे : पंढरीच्या वारीत समाजसेवा करायच्या उदात्त आणि निस्वार्थी हेतूने 'युनिक मेडिकल फौंडेशन' जनवाडी-पुणे 16, गेली १५ वर्षे आपलं योगदान देत आली आहे.

पंढरीच्या वारीतील वारकऱ्यांना पुणे येथे गुरूवार दि २३ जून ला जनवाडी येथील विर बाजीप्रभू प्रशाला, दत्तवाडी येथील त्रिमूर्ती निवास व सासवड येथे शनिवार २५ जून ला संत सोपान काका समाधीमार्ग व जगताप बंधू यांच्या येथे पंढरीच्या वारकऱ्यांसाठी मोफत औषधोपचार करण्यात आला.

या वर्षी १६०० वारकऱ्यांनी याचा लाभ घेतला यात ८०० वारकऱ्यांना इंजेक्शन देण्यात आले तसेच पेन किलर मलमांचे वाटप करण्यात आले. संस्थेचे अध्यक्ष डॉ. सागर लोखंडे, डॉ. राहुल लोखंडे, मानसी लोखंडे, श्री नारायण फणसे, डॉ. सुप्रिया लोखंडे आणि सर्व डॉक्टर टीम, दिलीप शिवाजीराव ढेरे, जाधवराव, वैशाली खंडागळे, पद्मा रमपुरे, संण्डे क्लबचे सुनील भांडवलकर टीम, सुभेदार मोहन शेलार, जयवंत कुंभार (आयुष मेडिकल), योगिता गिरीगोसावी (कुणाल मेडिकल) यांनी सहकार्य केले.

'रंगनाथ'ची निवडणूक पडली पार; केवळ 35 टक्के मतदान

सह्याद्री | चौफेर न्यूज 

वणी : श्री रंगनाथ स्वामी नागरी सह. पतसंस्थेची निवडणूक पार पडली. साधारणतः आठवडाभर नाट्यमय प्रचार, मूक सभा, भेटीगाठी चालू होते. आज 26 जूनला सकाळी 8 वाजेपासून ते 4 वाजेपर्यंत मतदारांनी मतदानाचा हक्क बजावला.

नावाजलेल्या पतसंस्थेचे 36 हजार 187 सभासद मतदार असतांना केवळ 12 हजार 696 म्हणजेच 35 टक्केच झाल्याने दोन्ही पॅनलमध्ये धाकधूक वाढली आहे. 

शहरात "रंगनाथ" ची मुख्य शाखा असलेल्या 17 संचालक पदाची निवडणूक घेण्यात आली यावेळी दोन पॅनल रिंगणात आमने सामने उभे होते. विद्यमान अॅड देविदास काळे यांच्या नेतृत्वात जय सहकार पॅनल तर अॅड भास्कर ढवस यांच्या नेतृत्वाखाली परिवर्तन पॅनल चे उमेदवार उभे होते.

आज पार पडलेल्या निवडणुकीत संस्थेच्या 14 शाखेतील मतदानाच्या आकडेवारीत कमालीची घट झाल्याची माहिती समोर आले आहे. वणीत 10 हजार 183 एवढी सभासद संख्या असतांना फक्त 4 हजार 466 सभासदांनी मतदानाचा आपला हक्क बजावला आहे.

श्री रंगनाथ स्वामी नागरी सह.पतसंस्थेच्या 14 शाखेचे  झालेले मतदान 

वणी 10183 पैकी 4466, मारेगाव 2775 पैकी 1592, मुकुटबन 1481 पैकी 665, घाटंजी 2447 पैकी 1093, वरोरा 6148 पैकी 1078, गडचांदूर 2826 पैकी 620, चंद्रपूर 2105 पैकी 742, राजुरा 2219 पैकी 620, मूल 713 पैकी 217, भद्रावती 2551 पैकी 514, चिमूर 1217 पैकी 594, यवतमाळ 606 पैकी 116, आर्णी 301 पैकी 112, भ्रम्हपुरी 613 पैकी 275, एकूण 36187 पैकी 12696 इतके झाले.