महावितरणचा सहायक अभियंता पाच हजाराची लाच घेताना एसीबीच्या जाळ्यात

सह्याद्री चौफेर : विनोद माहुरे 

राळेगाव : विज मिटर बसविण्यासाठी शासकीय शुल्क व्यतिरिक्त पाच हजार रुपयाची लाच मागणाऱ्या महाराष्ट्र विद्युत वितरण कंपनीचा सहाय्यक अभियंता याला रंगेहात पकडले. ही कारवाई लाचलुचपत प्रतिबंधक विभाग, यवतमाळच्या पथकाने आज 30 जानेवारी रोजी राळेगाव येथील महाराष्ट्र राज्य विद्युत वितरण कंपनीच्या कार्यालयात केली.

जगदीश श्रीराम ढुमणे (45) पद सहाय्यक अभियंता, वर्ग 2. नेमणुक उप-कार्यकारी अभियंता, महाराष्ट्र राज्य विद्युत वितरण कंपनी मर्यादीत उप-विभाग राळेगांव असे लाच घेतांना पकडलेल्या अधिका-यांचे नाव आहे. तक्रारदारांनी दि. 29 जानेवारी रोजी लाचलुचपत प्रतिबंधक विभाग, यवतमाळ येथे जगदीश ढुमणे सहाय्यक अभियंता महाराष्ट्र राज्य विद्युत वितरण कंपनी मर्यादीत उप-विभाग राळेगांव यांनी लाचेची मागणी केल्याची लेखी तक्रार दिली होती. त्यावरुन एसीबीच्या पथकाने 30 जानेवारी रोजी पंचासमक्ष पडताळणी केली. ढुमणे यांनी घरात लाईनचे मिटर बसविण्याकरीता शासकीय शुल्क व्यतिरिक्त स्वतः करीता 5 हजार रूपये लाचेची मागणी करून लाच रक्कम स्विकारण्याचे मान्य केले. त्यावरून सापळा रचुन सदर सहायक अभियंत्यास रंगेहात पकडले. याप्रकरणी पोलीस स्टेशन राळेगाव येथे गुन्हा दाखल करण्याची प्रक्रीया सुरू आहे.

सदरची कार्यवाही मारूती जगताप पोलीस अधीक्षक,अँटी करप्शन ब्युरो, अमरावती परिक्षेत्र, अमरावती, सचिन्द्र शिंदे अपर पोलीस अधीक्षक, अमरावती, पोलीस उपअधीक्षक उत्तम नामवाडे,अँटी करप्शन ब्युरो, यवतमाळ यांचे मार्गदर्शनाखाली पोलीस निरीक्षक अर्जुन घनवट, पोलीस अंमलदार पोहवा अतुल मते, अब्दुल वसीम, पौना सचीन भोयर, सुधीर कांबळे, राकेश सावसाकडे, गोवर्धन वाढई व चालक श्रेणी पोउपनि संजय कांबळे यांनी केली.

शेतकरी पुत्राची विष घेऊन आत्महत्या

सह्याद्री चौफेर | ऑनलाईन 

मारेगाव : तालुक्यातील चिंचाळा येथील शेतकरी पुत्राने विष घेऊन आत्महत्या केल्याची घटना बुधवारच्या सायकांळी घडली. मृत शेतकरी पुत्राचे नाव कुणाल सुखदेव उलमाले (अंदाजे वय 18) रा. चिंचाळा असे आहे. 

कुणाल याच्या पश्चात आईवडील मोठा भाऊ,दोन बहिण असा आप्त परिवार असून त्याने वडिलोपार्जित शेतातील बंड्यात विष प्राशन केले आहे.मात्र, त्याच्या आत्महत्येचे कारण कळू शकले नाही.

धक्कादायक : शिवसैनिक ललित लांजेवार यांचं निधन

सह्याद्री चौफेर | ऑनलाईन 

वणी : शिवसेनेचे कार्यकर्ते ललित लांजेवार (45) यांचं हृदय विकाराच्या झटक्याने निधन झाले. या धक्कादायक घटनेने वणी उपविभागात शोककळा पसरली आहे.

ललित लांजेवार हे शिवसेना (शिंदे गट) वणी शहराचं नेतृत्त्व करत होते. ते शिवसेनेचे कट्टर, धडाडीचे कार्यकर्ते म्हणून ओळखले जात होते.

दि. 29 जाने. बुधवारला रात्री त्यांना छातीत कळा येऊन अस्वस्थ वाटू लागल्याने त्यांना लगेच येथील खासगी रुग्णालयामध्ये दाखल करण्यात आलं होत,मात्र डॉक्टरांनी त्यांना मृत घोषित केले आहे. ही धक्कादायक वार्ता शहरात पसरताच त्यांच्या मित्र परिवारांनी रुग्णालयाकडे धाव घेत एकच गर्दी केली होती. सर्वसामान्यांच्या मदतीला धावून जाणारा,अत्यंत मनमिळाऊ स्वभावाने परिचित असलेले ललित लांजेवार यांची अचानक "एक्झिट",सामाजिक राजकीय क्षेत्राला मोठा धक्का बसला आहे.आज दुपारी त्यांच्या पार्थिवावर अंतिम संस्कार करण्यात येणार आहे.

शिवसैनिक ललित लांजेवार यांचे दुःखद निधनावर शहरातील अनेकांनी शोक व्यक्त केला असून त्यांच्या पश्चात पत्नी, एक मुलगा व एक मुलगी असा आप्त परिवार आहेत.

-सह्याद्री चौफेर परिवारातर्फे भावपुर्ण श्रद्धांजली 

एस टी भाडेवाढ विरोधात शिवसेना आक्रमक, वणीत चक्का जाम आंदोलन

सह्याद्री चौफेर | ऑनलाईन 

वणी : एसटी भाडेवाढ रद्द झालीच पाहिजे, परिवहन मंत्र्याचा धिक्कार असो, परिवहन मंत्री हाय.. हाय, फडणवीस सरकार मुर्दाबाद, परिवहन मंत्र्याचे करायचे काय? खाली मुंडके वर पाय अशा जोरदार घोषणांनी शिवसैनिकांनी बसस्थानक परिसर दणाणून सोडला. शिवसेनेच्या वतीने भाडेवाढीच्या विरोधात राज्य शासनाचा निषेध व्यक्त करीत जोरदार आंदोलन करून एक तास चक्काजाम केले.पोलिसांसह एसटी महामंडळाच्या अधिकाऱ्यांना घाम फोडला. अखेर पोलिसांनी शिवसैनिकांना ताब्यात घेऊन अटक केली.

राज्य सरकारने एसटीच्या तिकीट दरामध्ये 15 टक्के भाडेवाढीचा निर्णय घेतला आहे. जनसामान्याच्या आयुष्याचा अविभाज्य भाग असलेल्या लालपरीचे भाडे वाढल्याने प्रवाशांवर तिकीटाचा अतिरिक्त भुर्दंड पडला आहे. प्रवाशांवर होणारा अन्याय दूर करण्यात यावा, भाडेवाढ तातडीने मागे घेण्यात यावी, या मागणीसाठी शिवसेना पक्षप्रमुख उद्धव ठाकरे यांच्या मार्गदर्शनाखाली शिवसेनेने आक्रमक होत वणी बसस्थानकाच्या गेटवर चक्काजाम आंदोलन केले. गेटवरच शिवसेनेचे आमदार संजय देरकर, संजय निखाडे, सुनील कातकडे, दीपक कोकास, रवि बोढेकर, राजू तुराणकर, सुधीर थेरे, साबीर शेख, प्रवीण खानझोडे, सुरेश शेंडे, संतोष माहुरे, सोमेश्वर गेडेकर, आनंद घोटेकर, तुळशीराम काकडे, अजय चन्ने, महेश सोमलकर, मनोज वकटी, सरपंच सौ.गीता उपरे, सौ.सुनंदा गुहे, सौ.वृषाली खानझोडे, सौ.पुष्पा भोगेकर, सौ.सविता आवारी, सौ.सुरेखा ठेंगळे, सौ.मीनाक्षी मोहिते, सौ. प्रगती घोटेकर, पुरुषोत्तम बुटे, मनिष बतरा, गोपी पुरावार, प्रकाश कऱ्हाड, विलास बोबडे, मंगल बोबडे, भगवान मोहिते, जगन जुनगरी, पंकज बल्की यासह शेकडो शिवसेना युवासेना तसेच महिला पदाधिकारी व कार्यकर्ते या आंदोलनात सहभागी झाले. 

शिवसेना जिंदाबाद, उद्धव ठाकरे तुम आगे बढो हम तुम्हारे साथ है. जय भवानी जय शिवाजी, या घोषणांनी परिसर दणाणून सोंडला. शिवसेनेचे चक्काजाम आंदोलन सुरू होताच नागरिकही आंदोलनात सहभागी झाले. शिवसेनेच्या रणरागिणींनी बससमोर जोरदार घोषणाबाजी करीत प्रवाशांचे लक्ष वेधून घेतले.

सौ. देरकरही उतरल्या चक्काजाम आंदोलनात

बस दरवाढीच्या विरोधात महाराष्ट्रामध्ये शिवसेना ठाकरे गट रस्त्यावर उतरला आहे. याच पार्श्वभूमीवर आज मंगळवारी वणीमध्ये बस दरवाढीच्या विरोधात आंदोलन करण्यात आले. या आंदोलनामध्ये ठाकरे गटाचे आमदार संजय देरकर यांच्या पत्नी किरणताई देरकर यांनीही सहभाग नोंदवला. यावेळी शहरातील बस स्थानकाच्या समोर काही काळ वाहतूक विस्कळीत झाली,तर वाहनांच्या लांब रांगा लागल्या होत्या.

युवासैनिक बसच्या टपावर चढले

शिवसेनेने भाडेवाढीच्या विरोधात चक्काजाम पुकारताच वणी बसस्थानकाच्या गेटवर शिवसैनिक जमा झाले. चक्काजाम आंदोलन सुरू होताच युवासेना उपजिल्हा प्रमुख अजिंक्य शेंडे, व त्यांचे कार्यकर्ते हे थेट बसच्या टपावर चढले. शिवसेनेचा ध्वज फडकावत भाडेवाढ रद्द झाली पाहिजे, परिवहन मंत्री हाय, हाय, शिवसेना जिंदाबाद या घोषणा देत प्रवाशांचे लक्ष वेधून घेतले. त्यांनंतर पोलिसांनी पदाधिकारी कार्यकर्त्यांना स्थलांतर करण्यात आले.

वाळू ऑनलाईन बंद करून ऑफलाईन पद्धतीने द्या - सरपंच संघटनेची मागणी

सह्याद्री चौफेर | ऑनलाईन 

मारेगाव : अनेकांना स्वत:चे घर नव्हते. तर काहींचे कच्चे आणि कुडाचे होते. पाऊस, वारा आदी आपत्तीने घर पडण्यासारखे झाले होते. अशा वेळी मोदी आवास योजना, शबरी घरकुल योजना, रमाई आवास योजना, प्रधानमंत्री आवास योजनेच्या माध्यमातून घर मंजुर झाले. मात्र, लाभार्थ्यांचे स्वप्न अपूर्ण राहत असल्याचे चित्र ग्रामीण भागात आहे. 

तालुक्यातील वाळू ची ऑनलाईन प्रणाली डोकेदुखी वाढवणारी असल्यामुळे वाळू अभावी बांधकाम पूर्णतः रखडली असून वाळू मिळत नसल्यामुळे लाभार्थ्यांचे घर बांधकाम करावे कसे, विहीर बांधकाम कसे करावे,असा मोठा प्रश्न उभा ठाकला असताना ही ऑनलाईन प्रणाली बंद करून ऑफलाईन पद्धतीने वाळू तत्काळ उपलब्ध करून द्यावी, अशी मागणी महाराष्ट्र प्रदेश सरपंच संघटनेच्या वतीने मंत्री चंद्रशेखर बावनकुळे यांना केली. यासंदर्भात तालुका अध्यक्ष अविनाश लांबट यांच्या नेतृत्वात (ता. 28) मारेगाव तहसीलदार यांना निवेदन देण्यात आले आहे.

विशेष म्हणजे तस्करांना "गब्बर" करण्याची ही ऑनलाईन प्रणाली असून घरकुल पात्र लाभार्थ्यांना आर्थिक संकटात ढकलण्यापलीकडे दुसरं काही दिसत नाही. आतापर्यंत तालुक्यातील किती लाभार्थ्यांना वाळू मोफत मिळाली याबाबत कळायला मार्ग नाही. परिणामी घरकुल योजना, विहीर योजना व इतर बांधकाम करण्याकरिता वाळू उपलब्ध होत नसल्यामुळे त्यांचे बांधकाम रखडले आहे. त्यामुळे वाळूची ऑनलाईन प्रणाली तत्काळ बंद करून ऑफलाईन किंवा पूर्वीप्रमाणे वाळू उपलब्ध करून द्यावे, अशी मागणी सरपंच संघटना, घरकुल लाभार्थी, बिल्डिंग मटेरियल व नागरिकांनी तहसीलदार यांना निवेदन देऊन केली आहे.

निवेदनावर सरपंच संदीप कारेकर, सरपंच प्रवीण नान्हे, सरपंच श्रीकांत गौरकर, उपसरपंच सुरेश लांडे, उपसरपंच प्रशांत भंडारी, माजी सरपंच चंद्रकांत धोबे, सरपंच श्रीकांत गौरकार, आदीच्या स्वाक्षऱ्या आहेत.