परत पुन्हा एका ट्रॅक्टर वर मध्यरात्री कारवाई

सह्याद्री चौफेर | वृत्तसंस्था 

मारेगाव : तालुक्यात नदी - नाल्यांतून वाळू चोरी सुरू असतांना या तस्कराविरूध्द तहसीलदार ऊत्तम निलावाड यांच्या मार्गदर्शनाखाली नेमलेल्या महसूल पथकाने कारवाईचा सपाटा लावण्यात आला आहे. 

यापुर्वी अनेक ट्रॅक्टर जप्त करून गुन्हा दाखल केल्यानंतर आता पुन्हा एका ट्रॅक्टरवर मध्यरात्री कारवाई करण्यात आली. मारेगाव तालुक्यातील बामर्डा-फेफरवाडा परिसरातून विना परवाना अवैध वाहतुक करतांना ट्रॅक्टर ताब्यात घेतला असुन वाहन चालक वाहन सोडून पळून गेला आहे. ही दबंग कारवाई तलाठी चैतन्यकुमार शिंगणे, सनी कुळमेथे व विकास मडावी यांनी शनिवारी च्या मध्यरात्री 1 वाजता केली.

मार्डी सर्कल मधील बामर्डा-फेफरवाडा-मच्छिन्द्रा परिसरात अंधाराचा फायदा घेत वाळू चोरून नेली जात होती याची कुणकुण पथकाला लागली होती. अशातच काल पथक पत्त्यावर असताना मध्यरात्री निळ्या रंगाचे विना नंबर एक ट्रॅक्टर सह ट्राली संशयास्पद वाहतूक करताना आढळून आला. त्याला महसूल पथकाने सिने स्टाईलने दिड ते दोन किलोमीटर पाठलाग करून पकडले. दरम्यान, आपल्या दिशेने कोणीतरी येत असल्याचे पाहून, वाहनचालक हा ट्रॅक्टर सोडून पसार झाला अशी माहिती पथकाने दिली. 

कारवाई दरम्यान, पथकाची चांगलीच दमछाक झाली,गड्यात फसलेले ट्रॅक्टर काढतांना अर्धी बदरी वाळू खाली उतरवावी लागली त्यानंतर अर्ध्या बदरीवाळू सह ट्रॅक्टर ताब्यात घेऊन दंडात्मक कारवाई साठी मारेगाव तहसील कार्यालयाला आणण्यात आला. त्यामुळे मारेगाव महसूल विभागांच्या सततच्या कारवायामुळे वाळू तस्करांमध्ये चांगलीच दहशत पसरल्याचे चित्र आहे.

निवडणुकीदरम्यान ‘डीप फेक’ सारख्या गैरप्रकारांवर कारवाईचे शासनाचे आदेश

सह्याद्री चौफेर | वृत्तसंस्था 

मुंबई : लोकसभा निवडणुकीदरम्यान डीप फेक व्हिडिओज, क्लिप्स, फोटो किंवा इतर प्रकारचा कंटेंट तयार करून तो समाजमाध्यमे / डिजिटल माध्यमांवरून प्रसारित करण्यात येत आहे. या गैरप्रकारांना आळा घालण्यासाठी संबंधितांवर कडक कारवाई शासनामार्फत करण्यात येणार आहे. यासंदर्भात पोलीस महासंचालकांना सूचना देण्यात आल्या आहेत.

फोटोशॉप, मशीन लर्निंग (एमएल) किंवा आर्टिफिशियल इंटेलिजन्स (एआय) यांसारख्या विविध तंत्रांचा गैरवापर करून डीप फेक व्हिडिओज, क्लिप्स, फोटो किंवा इतर प्रकारचा कंटेंट तयार करण्यात येतो. निवडणुकीदरम्यान या तंत्राचा गैरवापर हा चिंतेचा विषय आहे. एखादा उमेदवार, राजकीय पक्ष किंवा निवडणुकीच्या मुद्द्याविषयी चुकीचे व्हिडिओ, ऑडिओ, फोटो तयार करण्यात येतात किंवा खऱ्या फोटो, ऑडिओ, व्हिडिओमध्ये फेरफार करून ते चुकीच्या पद्धतीने प्रसारित करण्यात येतात. असे गैरपद्धतीने तयार केलेले डीप फेक व्हिडिओज, क्लिप्स किंवा फोटो खरे असल्यासारखे भासतात आणि त्यामुळे संबंधिताविषयी गैरसमज किंवा बदनामी होते. निवडणूक काळात अशा प्रकरणांमध्ये वाढ होत असून यावर आळा घालण्यासाठी तसेच स्वच्छ आणि पारदर्शक निवडणूक प्रक्रिया होण्याच्या दृष्टीने ‘डीप फेक’ कंटेंट तयार करणाऱ्या आणि प्रसारित करणाऱ्या समाजकंटकांवर कायद्यानुसार कडक कारवाई करण्यात यावी, अशा सूचना शासनाने दिल्या आहेत.

राज्य शासनामार्फत पोलीस महासंचालकांना यासंदर्भात सूचना देण्यात आल्या असून पोलीस खात्यामार्फत यासंदर्भात कार्यवाही करण्यात येणार आहे. निवडणूक आयोगानेही विपर्यस्त माहिती रोखण्यासंदर्भात त्यांच्या मार्गदर्शिकेमध्ये सूचना दिल्या आहेत.

मनसेच्या प्रयत्नाने विद्यार्थ्यांसाठी एसटी बस सुरू

सह्याद्री चौफेर | वृत्तसंस्था 

वणी : तालुक्यातील विरकुंड आणि बोर्डा या मार्गावरील एसटी बस पुन्हा सुरु करण्यासाठी शालेय विद्यार्थ्यांनी महाराष्ट्र नवनिर्माण सेनेचे नेते राजू उंबरकर यांना संपर्क साधून एसटी बस पुन्हा सुरु करण्याची मागणी केली. या मागणीला तत्काळ प्रतिसाद देत तालुकाध्यक्ष फाल्गुन गोहोकार यांनी आगार प्रमुखांची भेट व चर्चा करून विद्यार्थ्यासाठी बस सेवा पुन्हा सुरू केली. 

नुकत्याच विद्यार्थ्यांच्या परीक्षा संपून शाळा महाविद्यालयांना सुट्या जाहीर झाल्या. उन्हाचा पारा देखील 40 अंशा वर गेला आहे त्यामुळे नागरिक देखील घराबाहेर पडण्यास टाळाटाळ करत आहेत. विद्यार्थ्यांच्या शाळांना सुट्या लागल्याने वणी तालुक्यातील विरकुंड आणि बोर्डा मार्गावरील एसटी बस च्या फेऱ्या बंद केल्याने नागरिकांसह विद्यार्थ्यांना प्रवासात अडचण निर्माण होत होती.

यासाठी विद्यार्थ्यांनी मनसेचे राजू उंबरकर यांच्याशी संपर्क करून बस सेवा सुरू करण्याची आग्रही मागणी केली. या मागणीला कोणताही विलंब न लावता तालुकाध्यक्ष फाल्गुन गोहोकार यांनी आपल्या कार्यकर्त्यांसह गुरुवार (ता.2) मे रोजी आगार प्रमुख खाडीलकर यांची भेट घेत विद्यार्थ्यांच्या समस्या मांडल्या तसेच तत्काळ एसटी बस सुरू करण्याची मागणी केली. या मागणीला आगार प्रमुखांनी सकारात्मकता दर्शवून बससेवा पुन्हा तात्काळ सुरू केली. 

त्यामुळे विद्यार्थ्यांना आता प्रवास करण्यास कोणतीही अडचण होणार नसल्याची माहिती मनसेचे वणी तालुका अध्यक्ष फाल्गुन गोहोकार यांनी दिली. दरम्यान,विद्यार्थी आणि नागरिकांनी मनसेचे आभार मानले.

सिंधी येथे शेतकरी पुत्राची आत्महत्या

सह्याद्री चौफेर | वृत्तसंस्था 

मारेगाव : आज तालुक्यातील सिंधी गावात गुरुवारी, 2 मे रोजी दुपारी शेतकर्‍याच्या 28 वर्षीय मुलाने शेतात जाऊन विषारी द्रव्य प्राशन करून आत्महत्या केल्याची घटना चार वाजता च्या दरम्यान उघडकीस आली.

घटनेची माहिती पोलीसांना दिली, पोलीस कर्मचारी घटनास्थळी जाऊन पंचनामा करून मृतदेह ग्रामीण रुग्णालय मारेगाव येथे पाठविण्यात आला. राहुल गोविंदा काळे (अंदाजे वय 28) असे विष प्राशन करून आत्महत्या केलेल्या शेतकरी पुत्राचे नाव आहे. 

राहुल यांच्या वडिलांच्या नावे सहा ते सात एकर शेती असल्याचे समजते. राहुल हा घरच्या शेतात व दुसऱ्याकडे सुद्धा मजुरीने कामाला जात होते. मात्र त्याच्या आत्महत्येचे कारण अस्पष्ट असून राहुल च्या पाठीमागे वडील, भाऊ, वहिनी, पुतण्या-पुतणी असा परिवार आहे. त्याच्या अशा अकाली जाण्याने गावात हळहळ व्यक्त होत आहे.

   

भीषण अपघात...आयचर व ट्रेलरची समोरासमोर धडक; दोन ठार, चार जखमी

सह्याद्री चौफेर | वृत्तसंस्था 

पांढरकवडा : यवतमाळ रोड वर आयचर व ट्रेलर वाहनामध्ये समोरासमोर धडक झाल्याने या भीषण अपघातात दोन ठार व चार गंभीर जखमी झाले असून दोनशेच्या वर बकऱ्या ठार झाल्याची घटना आज (ता.2) मे गुरुवारला सकाळी 9 वाजता च्या सुमारास रुंझा गावाजवळ सायखेडा-पाथरी रस्त्यावरील वळणासमोरील धाबा जवळ घडली. 

या अपघाताची माहिती मिळताच पांढरकवडा पोलीस स्टेशन चे पोलीस पथक घटनास्थळी लगेच रवाना झाले असून घटनास्थळाचा पंचनामा करण्यात आला आहे.

प्राप्त माहितीनुसार यवतमाळ वरून भरधाव वेगाने येणाऱ्या आयचर वाहन क्र. (एम एच-४० सि.टी. ५५५८) ला वणी येथुन जाणारे ट्रेलर क्र. (एम एच-४० सि. एम.२८५८) यांची सामोरासमोर जोरदार धडक दिल्याने यात दोन इसम मृत्यूमुखी पडले असून, जवळपास दोनशे च्या वर शेळ्या जागीच ठार झाल्या तर, चार इसम गंभीर जखमी झाले आहे. मृतकामध्ये सोहन सिंह रामचरन यादव व धर्मेंद्र हीरालाल यादव अशी नावे असून दोघेही वाहन चालक मध्यप्रदेश येथील, असून कमलेश सिंह, मनोज मेहेरे, विदु मोहसिन खान, चेतन राठोड़ अशी जखमीची नावे असून हे सर्व मध्यप्रदेशचे आहे. हा अपघात इतका भयावह होता की,दोन्ही वाहणाचा दर्शनीभाग चेंदामेंदा झाल्याचे चित्र आहे. 

या अपघातातील जखमींना ख्रिश्चन हॉस्पिटल उमरी येते भरती करण्यात आले तर, मृतव्यक्तीना उपजिल्हा रुग्णालय पांढरकवडा येथे पाठविण्यात आले. दरम्यान या ठिकाणी वाहतूक कोलमडल्याची पाहायला मिळाली होती. घटनेची बातमी कळताच परिसरातील नागरिकांनी धाव घेत मदत कार्य केल्याने माणुसकीचे दर्शन घडले. सदर दोन्ही वाहने रोडच्या बाजूला करण्यात आले तर,आयचर वाहनांमध्ये असलेल्या शेळ्या खाली केल्या व ठप्प झालेली वाहतूक सुरळीत केली, या थरकाप उडवणाऱ्या घटनास्थळी पोलीस प्रशासनाला चांगलीच तारेवरची कसरत करावी लागली असून पुढील तपास महामार्ग पोलीस केंद्र करंजीचे पोलीस निरीक्षक नितीन कोयलवार व पोलीस उपनिरीक्षक वसूकार तसेच पोलीस कर्मचारी करीत आहे.