शेतातील बंड्यात साठवून ठेवलेली मिर्ची गेली चोरीला

सह्याद्री चौफेर | वृत्तसंस्था 

वणी : वणी पोलीस स्टेशन हद्दीत येत असलेल्या रासा शिवारात रस्तालगत असलेल्या एका शेत बंड्याचे कुलूप तोडून सहा पोते सुकेलेली मिरची अज्ञात चोरट्यांनी लांबवल्याची घटना 25 एप्रिल रोजीच्या रात्री घडली.

भारत कुमरे रा.वणी असे शेतकऱ्याचे नाव आहे. यांचे शेत घोंन्सा मार्गावरील रासा शिवारात रस्ताच्या लगत असून शेतात शेतीउपयोगी साहित्य ठेवण्यासाठी त्यांनी बंडा बांधलेला आहे. त्यांनी शेतात लावलेली मिरची तोडून बंड्यात ठेवली होती.

दरम्यान,मिरची चे दर बाजारामध्ये घसरण असल्याने ती मिरची सध्या शेतातील बंड्यामध्ये साठवून ठेवली होती. मात्र, या जमा करून ठेवलेल्या बंड्यातील मिरची वर अज्ञात चोरट्यांनी गुरुवारच्या रात्री डल्ला मारल्याने शेतकरी भारत कुमरे यांचे मोठे आर्थिक नुकसान झाले आहे. 

जगाच्या पोशिंद्याने शेतात राबराब राबून पिकवलेले मिर्चीचे पिक कुलूप तोडून नेल्याने शेतकऱ्यांचे मनोबल ढासळले असून याबाबत अद्यापही कोणतीही कारवाई झाली नसल्याचे कुमरे यांनी माध्यमातून सांगितले आहे.

आज 'या' भागात ढगांच्या गडगडाटासह वादळी पावसाचा इशारा

सह्याद्री चौफेर | वृत्तसंस्था 

चक्राकार वाऱ्यांच्या विस्कळीत स्थितीमुळे मराठवाड्यासह मध्य महाराष्ट्र आणि विदर्भात आज पावसाची शक्यता असून ढगांच्या गडगडाटासह वादळी वाऱ्यांचा पाऊस होण्याची शक्यता आज हवामान विभागाने वर्तवली असून विदर्भात तुरळक ठिकाणी गारपीटीचाही अंदाज आहे.

दरम्यान, राज्यात तापमानाचा पारा चढाच असल्याचे पहायला मिळत आहे. काल मराठवाड्यातील काही जिल्ह्यांमध्ये ४३ अंशांच्या वर तापमान गेल्याची नोंद झाली. विदर्भातही सामान्य तापमानाच्या तुलनेत अधिक तापमान नोंदवले गेले. कोकण किनारपट्टीवर सध्या उष्ण व आर्द्र तापमानाची नोंद होत असून उष्णतेच्या लाटांचा इशारा देण्यात आला आहे.

पुढील आठवडा आणखी तापणार!

राज्यात पुढील आठवड्यात कमाल तापमान २ ते ३ अंशांनी वाढणार असून नागरिकांना उष्णतेच्या झळांचा सामना करावा लागणार आहे. 

आज कुठे कसे हवामान?

कोकण किनारपट्टी भागात आज उष्ण व आर्द्र हवामान राहणार असून ठाणे, मुंबई, रायगड, रत्नागिरी, सिंधुदूर्ग जिल्ह्यात उष्णतेच्या लाटेचा अंदाज देण्यात आला आहे.

तर सांगली, सोलापूर, बीड, लातूर, धाराशिव,अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर,वर्धा, वाशिम, यवतमाळ जिल्ह्यात पावसाचा इशारा देण्यात आला आहे.

स्पीडब्रेकर्सचा धोका: अपघातांवरील उपायच ठरतोय जीवघेणा!

सह्याद्री चौफेर | वृत्तसंस्था 

वणी : कोरंबी (मारेगाव) समोरील रस्त्यावर जास्त उंचीचा गतिरोधक  उभारण्यात आला आहे. तो वाहनचालकांच्या पटकन लक्षात येत नाही. त्यामुळे पंधरवाड्यात किरकोळ सह गंभीर अपघात घडले आहेत.

मागील आठवड्यात तालुक्यातील दहेगाव (घोंसा) येथील एक महिला ही स्पीडब्रेकरमुळे उसळून खाली पडली, ती गंभीर जखमी झाली असून तीच्या वर चंद्रपूरला येथील खासगी रुग्णालयात उपचार करण्यात आले. परंतु या मार्गांवर प्रवास करताना अनेक किरकोळ व गंभीर अपघात घडत असून येथील ब्रेकरची उंची आणि त्यावर रंगरंगोटी केली नसल्याने असे अपघात घडतात, तरी असे अपघात पुन्हा टाळण्यासाठी स्पीडब्रेकरची उंची कमी करा नाहीतर ब्रेकरच हटवा अशी मागणी होत आहे.

परिणामी रस्त्यावरील अनावश्यक गतिरोधकांमुळे वाहनाची गती, वेळ, इंधन, वाहनांचे नुकसान, खर्चावर परिणाम होत आहे. तसेच जास्त उंचीचा रंगहीन गतिरोधक असल्याने त्याचा त्रास मात्र वाहनधारकांना होत आहे. सर्व काही ढोबळ व सार्वजनिक बांधकाम विभागाचे समजेल तितकेच अनुकरण प्रशासन करीत आहे. अशी ओरड नागरिकांसह प्रवाश्यातून होत आहे.

काय असावे...

‘पुढे गतिरोधक आहे’ असे गतिनियंत्रण सूचना फलक आवश्यक, पट्टे आवश्यक व ते वेळोवेळी रंगविणे,मार्गांवर मोजकेच ‘रबलिंग’ असावे.

१० वी, १२ वीचा निकाल लवकरच; या प्रकारे डाऊनलोड करा तुमची डिजिटल मार्कशीट..!

सह्याद्री चौफेर | वृत्तसंस्था 

विद्यार्थ्यांनो तुमची मार्कशीट डाऊनलोड करण्यासाठी डिजी लॉकरवर नोंदणी आणि त्यानंतर आवश्यक कागदपत्रे डाउनलोड कसे करावे. डिजी लॉकरवर १० वी आणि १२ वीचे निकालपत्र अपलोड करण्यासाठी विद्यार्थ्यांकडे डिजीलॉकर खाते असणे आवश्यक आहे.

डिजीलॉकर खाते कसे तयार करावे?

१. DigiLocker च्या साईटला भेट द्या – https://www.digilocker.gov.in

२. इनपुट फील्डसह एक नवीन विंडो उघडेल

३. तुमचा मोबाईल नंबर एंटर करा आणि नंतर ‘Continue’ बटणावर क्लिक करा

४. या नंबरवर एक ओटीपी पाठवला जाईल. नवीन विंडोमध्ये दिलेल्या जागेत हा OTP भरा.

५. नंतर 'Verify' बटणावर क्लिक करा.

६. लिंक नवीन विंडोवर पुनर्निर्देशित केली जाईल

७. खात्यासाठी युजरनेम आणि पासवर्ड सेट करा

८. पासवर्डमध्ये वापरकर्त्याचं नाव नसावं

९. शेवटी, तुमचा आधार क्रमांक सबमिट करा आणि तो OTP किंवा फिंगरप्रिंट पर्यायाद्वारे सेट करा.

१०. तुम्ही आता डिजी लॉकर ॲपवर यशस्वीरित्या साइन अप केले आहे.

डिजीलॉकरवरून महाराष्ट्र १० वी १२ वीचा निकाल कसा डाउनलोड करायचा?

१. युजरनेम आणि पासवर्ड वापरून डिजिलॉकर ॲपवर लॉग इन करा

२. 'प्रोफाइल' पेजवर जा आणि आधार क्रमांक सिंक करा. डिजीलॉकर खाते आधीपासून आधार क्रमांक वापरून तयार केले असल्यास, पुन्हा करण्याची गरज नाही.

३. डाव्या साइडबारमधील 'पुल पार्टनर डॉक्युमेंट्स' बटणावर क्लिक करा.

४. पुढील स्क्रीनवर दोन ड्रॉपडाउन असतील.

५. पहिल्या ड्रॉपडाउनमध्ये, 'महाराष्ट्र राज्य माध्यमिक आणि उच्च माध्यमिक शिक्षण मंडळ' निवडा.

६. पुढील ड्रॉप-डाउनमध्ये, मार्कशीट निवडा म्हणजे HSC/ SSC मार्कशीट/ स्थलांतर किंवा उत्तीर्ण इ.

७. पुढील स्क्रीनमध्ये महाराष्ट्र एसएससी ॲडमिट कार्ड/महाराष्ट्र एचएससी ॲडमिट कार्डवर नमूद केल्याप्रमाणे उत्तीर्ण होण्याचे वर्ष आणि रोल नंबर यासारखे आवश्यक तपशील भरा.

८. 'Get Document' वर क्लिक केल्यानंतर महाराष्ट्र HSC/Maharashtra SSC डिजिटल मार्कशीट/प्रमाणपत्र डाउनलोड होईल.

९. ही कागदपत्रे डिजीलॉकर खात्यात सेव्ह करण्यासाठी सेव्ह टू लॉकर बटणावर क्लिक करा.

डिजीलॉकर वापरण्याचे फायदे

शालेय प्रमाणपत्र आणि मार्कशीट व्यतिरिक्त आधार कार्ड, कोविड १९ लसीकरण प्रमाणपत्र, वाहन नोंदणी आणि ड्रायव्हिंग लायसन्सची सुविधा डिजीलॉकरवर उपलब्ध आहे. आपण या ॲपवर एसएससी मार्कशीट, एचएससी मार्कशीट, रेशनकार्ड, निवास प्रमाणपत्र, उत्पन्नाचे प्रमाणपत्र आणि जातीचे प्रमाणपत्र या सुविधेचा लाभ घेऊ शकता.आपली सर्व महत्त्वाची कागदपत्रे या लॉकरमध्ये ठेवली जाऊ शकतात.

आश्रम शाळेतील विद्यार्थ्यांची जेईई परीक्षेमध्ये उत्तुंग भरारी

सह्याद्री चौफेर | वृत्तसंस्था 

चंद्रपूर : एकात्मिक आदिवासी प्रकल्प कार्यालय चंद्रपूर अंतर्गत आश्रम शाळेतील विद्यार्थ्यांकरीता मिशन शिखर उपक्रम राबविला जात आहे. या उपक्रमांतर्गत आदिवासी विद्यार्थ्यांना जेईई/नीट/सीईटी/एनडीए/सीएलएटी अशा विविधि परिक्षेचे मोफत मार्गदर्शन प्रशिक्षक / शिक्षक यांच्या मदतीने दिले जाते. दिनांक 24 एप्रिल 2024 ला जेईई ॲडव्हान्स परीक्षेचा निकाल जाहीर झाला. त्यामध्ये मिशन शिखर मधील 5 आदिवासी विद्यार्थी पात्र झाले आहेत.

 यात सुनिता श्यामराव मेश्राम, रा. जिवती (69.14 टक्के), प्रितिका जंगु करपाते, रा. भारी (68.23 टक्के), अदिती उमेश जुमनाके, रा. मांडवा, ता. कोरपना (64.44 टक्के), अर्जुन विजु वेलादी, रा. कारगाव, ता. कोरपना (54.46 टक्के) आणि गौरव चित्तरंजन कोवे, रा. मोहाळी, ता. बल्लारपूर (47.46 टक्के) अशी पात्र विद्यार्थ्यांची नावे आहेत. हे सर्व विद्यार्थी चंद्रपूर जिल्हयातील असून आदिवासी समाजाचे आहेत तसेच हे विद्यार्थी एकलव्य मॉडेल रेसीडेंशिअल पब्लिक स्कुल, देवाडा येथे शिकत आहेत. सर्व पात्र विद्यार्थी व त्यांच्या पालकांना प्रकल्प कार्यालयात आमंत्रित करून त्यांना भेट वस्तू देवून त्यांचा सत्कार केला.

मिशन शिखर 2023-2024 अंतर्गत जेईई/नीट/सीईटी/एनडीए/सीएलएटी चा क्रॅश कोर्स प्रकल्पात राबविला जात असून त्यामध्ये यावर्षी सीईटी करीात 85, जेईई 27, नीट 54 आणि एनडीए साठी 20 विद्यार्थ्यांना प्रशिक्षण दिले जात आहे. भविष्यात जास्तीत जास्त संख्येने विद्यार्थ्यांना परीक्षेमध्ये पात्र करणे हा आदिवासी विकास प्रकल्पाचा उद्देश असल्याचे प्रकल्प अधिकारी श्री. राचेलवार यांनी सांगितले. प्रकल्पात पहिल्यांदाच ऐवढ्या संख्येने आश्रम शाळेतील विदयार्थी जेईई सारख्या परीक्षेत पात्र झालेले आहेत. आदिवासी विद्यार्थीसुद्धा कोणत्याही परिस्थितीवर मात करून घवघवीत यश संपादन करू शकतो, हे या यशाने दाखवून दिले आहे. मे 2024 ला होणा-या विविध मेडिकल / इंजिनिअरींग परीक्षेकरीता मिशन शिखर अंतर्गत विद्यार्थ्यांना मार्गदर्शन केले जात आहे. त्यामध्ये जास्तीत जास्त विद्यार्थी पात्र होतील, असा विश्वास प्रकल्प अधिकारी यांनी व्यक्त केला आहे.

यावेळी सर्व विद्यार्थी, पालक, शिक्षक, मिशन शिखर उपक्रमास भेट देणारे प्रकल्प कार्यालयातील अधिकारी, एकलव्य मॉडेल रेसीडेंशिअल पब्लिक स्कुल, देवाडा या सर्वांचे कौतुक करण्यात आले आणि जास्तीत जास्त विद्यार्थ्यांना या उपक्रमांत सहभागी होण्याचे आवाहन त्यांनी केले. प्रकल्पात आदिवासी विद्यार्थ्यांकरीता मिशन शिखर, समर कॅम्प, ताडोबा शैक्षणिक सहल, भारत दर्शन, परदेशी शिष्यवृत्तीचा लाभ, शिक्षकांकरीता भविष्यावेधी प्रणाली नुसार प्रशिक्षण, आश्रम शाळेतील विद्यार्थ्यांना विविध अभ्यासपूरक प्रशिक्षण असे विविध उपक्रम सुरू करण्यात आले आहेत.