निंबाळा येथे बचत गटातर्फे सावित्रीबाई फुले जयंती साजरी

सह्याद्री चौफेर | ऑनलाईन 

वणी : बचत गटातील महीला सखीं द्वारे निंबाळा येथे सावित्रीबाई फुले जयंतीनिमित्त विवीध कार्यक्रमाचे सुंदर आयोजन करण्यात आले होते. त्यावेळी उद्घाटनास्थळी उपस्थित राहून महिलांनी शिक्षण व समानतेच्या क्षेत्रात केलेल्या कार्याची महती सांगितली. 

सावित्रीबाई फुले यांच्या कार्याबद्दल कृतज्ञता व्यक्त करण्यात आली आणि त्यांच्या योगदानाची आठवण सांगणारे भाषणे झाले. महिलांच्या सक्षमीकरणासाठी आणि समाजातील महीलांवीषयीचे भेदभाव,अंधश्रद्धा,अनिष्ट चालीरीती,प्रथा-परंपरा नष्ट करण्यासाठी सावित्रीबाई फुले यांनी केलेल्या कार्याला समर्पित असलेला हा कार्यक्रम महत्त्वपूर्ण ठरला. 

कार्यक्रमाच्या उद्घाटनावर उपस्थित असलेल्यांनी महिला सशक्तीकरण व शिक्षणाच्या महत्वावर भर दिला आणि महिलांना समान हक्क मिळवून देण्यासाठी एकजुट होण्याचे आवाहन केले.

याप्रसंगी कार्यक्रमास प्रमुख पाहुणे म्हणून सन्माननीय सौ.किरण देरकर अध्यक्ष सन्मान स्त्री शक्तीचा फाउंडेशन, सौ.वृषाली खानझोडे मा.ऊपसभापती पं.समीती, सौ.पौर्णीमा भोंगळे मा.सरपंच लाठी, सो.सुनिता ढेंगळे सरपंच निंबाळा, सौ.संगीता डाहुले मा.वी.म गटप्रमुख, सौ.आसेकर ताई, सौ.मीलमीले ताई,सौ.बोरडे ताई, सौ.प्रणाली कुत्तरमारे, अंगणवाडी सेवीका-सौ.सुरेखा ताई व बचतगटातील सर्व सन्माननीय महीलासखी उपस्थित होत्या.

लढा संघटनेने मुख्य कार्यकारी अधिकारी यांचेकडे केली चौकशीची मागणी

सह्याद्री चौफेर | ऑनलाईन 

वणी : येथील जनतेच्या न्यायिक हक्कासाठी 'लढा' ही संघटना सर्व सामान्यांच्या हक्कासाठी,अन्यायाचा प्रतिकार करण्यासाठी, शैक्षणिक व सामाजिक हितासाठी कार्य करित असते. संघटनेच्या धोरणनुसार याच संघटनेने वणी पंचायत समिती च्या 34 जिल्हा परिषद शाळेच्या कामात प्रचंड घोळ झाल्याची तक्रार केली असून त्याची चौकशी करण्यात यावी अशी मागणी आहे. 

निवेदनात नमूद असे की, मुख्य कार्यकारी अधिकारी जिल्हा परिषद यवतमाळ यांच्याकडे दिनांक 30/9/2022 ला ई वर्ग जमीन हर्रासाचे जमा रकमेतून खर्चास मंजुरी प्रदान करण्यात आली.त्या अनुषंगाने मा.गटविकास अधिकारी वणी यांनी 34 जिल्हापरिषद शाळेत एकूण 1,40,42,320 रुपयाची कामे केली. ही सर्व कामे शाळा व्यवस्थापन समिती अथवा संबंधित शाळेच्या मुख्याध्यापकाला विचारत न घेता मर्जितल्या ठेकेदाराला सर्व कामाचे कंत्राट दिले असून मा.गटविकास अधिकारी वणी याचा मोठा भष्ट्राचार व कामात प्रचंड अनियमितता केल्याचे दिसून येत आहे. त्यामुळे या सर्व कामाच्या चौकशीची मागणी लढा संघटनेचे प्रतिनिधी प्रवीण खानझोडे व विकेश पानघाटे, विवेक ठाकरे यांनी मुख्यकार्यकारी अधिकारी जि. प. यवतमाळ यांच्याकडे केली आहेत.

अपघातात दोन तरुण गंभीर,वणी मारेगाव रोडवरील घटना

सह्याद्री चौफेर | ऑनलाईन 

मारेगाव : वणी-मारेगाव हायवे वर दुचाकींला अपघात होऊन दोन तरुण गंभीर जखमी झालेत, ही घटना मंगळवारी रात्री साडे दहा च्या सुमारास घडली असा कयास आहे. 

विजय संभाजी थेरे (अंदाजे वय ३५), व नितीन खुशाल पायघन (अंदाजे वय २७) रा. पहापळ, अशी जखमींची नावे आहेत. मारेगाव तालुक्यातील पहापळ येथील रहिवाशी असलेले हे दोनही जण दुचाकीने आपल्या गावी परतत असतांना वणी मारेगाव महामार्गांवरील निंबाळा फाट्याजवळ त्यांच्या दुचाकीला रात्री भीषण अपघात झाला. यात हे दोनही दुचाकीस्वार गंभीर जखमी झाले आहेत. त्यांच्या दुचाकीला अज्ञात वाहनाने धडक दिली की, दुचाकी अनियंत्रित होऊन ते रोडवर पडले याबाबत कुठलाही निष्कर्ष अद्याप लागला नाही. 

सदर दुचाकीला जनावर आडवे आल्याने हा अपघात झाला असावा असाही अंदाज वर्तविण्यात येत आहे. वणी येथे प्राथमिक उपचार करून त्यांना नागपूर येथे हलविण्यात आले असल्याचे समजते.

९ जानेवारी ला माकपचे जिल्हा अधिवेशन वणी येथे

सह्याद्री चौफेर | ऑनलाईन 

वणी : मार्क्सवादी कम्युनिस्ट पक्ष हा कष्टकरी वर्गाचा प्रतिनिधी करणारा पक्ष असून ह्या पक्षात निव्वळ कष्ट करणाऱ्या कार्यकर्त्यांचा समावेश असल्याने ह्या पक्षात कार्य करणाऱ्या कार्यकर्त्यांना प्रामाणिक कार्यकर्ते म्हणून ओळखले जाते. 

त्यामुळे ह्या पक्षात पक्षाचा नियमाला व शिस्तीला जास्त महत्त्व असते. पक्षात नियमानुसार सैद्धांतिक रीतीने लोकशाही पद्धतीने कामकाज चलविण्यात येते. त्याचमुळे कम्युनिस्ट पक्षात दर तीन वर्षांनी अधिवेशन होऊन संपूर्ण तीन वर्षाचा लेखाजोखा मांडून त्याचा हिशोब मांडला जातो व लोकशाही पद्धतीने टीका आत्मटिका केल्या जाऊन पुढील वाटचाल केल्या जाते. त्यासाठी पुढील तीन वर्षाचा कार्यक्रम आखून नवीन कमिटी निवडल्या जाते. हे अधिवेशन शाखा ते राष्ट्रीय स्तरापर्यंत घेतल्या जाते. यवतमाळ जिल्ह्यात सुद्धा शाखेची, तालुक्याची आणि त्यानंतर आता ९ जानेवारी २०२४ रोज गुरुवारला वणी येथील कॉ. शंकरराव दानव सभागृह, नगाजी महाराज देवस्थान येथे जिल्हा अधिवेशन होत आहे.

या जिल्हा अधिवेशनाला शेतकरी संप फेम नेते डॉ. अजित नवले (अकोले), कॉ. किसन गुजर (नाशिक), कॉ. सुनील मालुसरे (ठाणे), कॉ. अरुण लाटकर (नागपूर) हे उपस्थित राहणार आहेत. 

अधिवेशनात नियमानुसार जिल्ह्यातील निवडक स्त्री पुरुष प्रतिनिधी यांची उपस्थिती राहणार आहे, त्याच बरोबर महत्त्वपूर्ण ठराव पारित करून त्याच्या अंमलबजावणीचा कार्यक्रम व रूपरेषा ठरविली जाणार आहे.

एसीबी ची कारवाई: परिरक्षण भूमापकास १० हजारांची लाच घेताना अटक

सह्याद्री चौफेर | ऑनलाईन 

राळेगाव : वडीलोपार्जित जुन्या घराच्या मिळकत पत्रिकेवरून मृत आईचे नाव कमी करण्यासाठी १० हजारांची लाच मागणाऱ्या परिरक्षण भूमापकास लाच स्वीकारतांना रंगेहाथ अटक करण्यात आली. लाचलुचपत प्रतिबंधक विभागाने सोमवार दि. ६ जानेवारीला राळेगाव भूमी अभिलेख कार्यालयात ही कारवाई केली.

अजय नारायण देशमुख (वय ५०) असे अटक केलेल्या परीरक्षण भूमापकाचे नाव आहे. ते राळेगाव येथील उपअधीक्षक भूमी अभिलेख कार्यालयात कार्यरत होते. वडीलोपार्जित जुन्या घराच्या मिळकतीवरील मृत झालेल्या आईचे नाव मिळकत पत्रिकेवरून कमी करण्याची मागणी तक्रारदाराने आरोपीकडे केली होती. मात्र, त्यासाठी अजय देशमुख यांनी तक्रारदाराला १० हजार रुपये लाचेची मागणी केली. यानंतर तक्रारदाराने या प्रकाराची तक्रार लाचलुचपत प्रतिबंधक विभागाकडे दि. ३ जानेवारीला केली होती. लेखी तक्रार प्राप्त होताच लाचलुचपत प्रतिबंधक विभागाने दि. ६ जानेवारीला राळेगाव भूमीअभिलेख कार्यालयात सापळा रचला. तक्रारदाराकडून १० हजार रुपयांची रक्कम स्वीकारताच पकडण्यात रंगेहात आले. त्यांच्याविरुध्द राळेगाव पोलिस ठाण्यात गुन्हा दाखल करण्यात आला आहे. 

ही कारवाई अॅन्टी करप्शन ब्युरो, अमरावती परिक्षेत्राचे पोलिस अधीक्षक मारूती जगताप, अपर पोलीस अधीक्षक सचिंद्र शिंदे, पोलीस उपअधीक्षक उत्तम नामवाडे यांच्या मार्गदर्शनात पोलीस निरीक्षक अर्जुन घनवट आणि पोलीस अंमलदार पोहवा अतुल मते, अब्दुल वसीम, पोना सचिन भोयर, सुधीर कांबळे, राकेश सावसाकडे, गोवर्धन वाढई व संजय कांबळे यांनी केली.