मार्डी-खैरी रोड वर मध्यरात्री हायवा जप्त

सह्याद्री चौफेर | वृत्तसंस्था 

मारेगाव : काल मध्यरात्री दिड वाजता च्या दरम्यान, हायवा विना परवाना रेती भरून जात असताना महसूल विभागाच्या पथकाने जप्त केला असून ही कारवाई मार्डी-खैरी रोडवरील दापोरा फाट्याजवळ करण्यात आली. मारेगाव तहसीलदार ऍक्शन मोडवर आल्याने रेती तस्करांचे धाबे दनाणले आहे.

मारेगाव तालुक्यातील शेवट च्या टोकाला असलेल्या वर्धा नदी पत्रातून रेती विना परवाना रेतीचा उपसा मोठ्या प्रमाणात होत असल्याचे सर्वश्रुत आहे. मात्र, तहसीलदार निलावाड हे आल्यापासून कारवाई चा धडाका कायम ठेवत आजतागायत अनेक रेती तस्करांवर "बुरे दीन" आले आहे.

काल मध्यरात्री दोन वाजता च्या दरम्यान विना परवाना असलेला हायवा वाहन क्र. (एम एच 04 एफ यु 4468) हे रेती भरून जात असताना मारेगावसह वणी पथकाने दापोरा फाट्या जवळ जप्तीची कारवाई करून तहसील कार्यालयाला जमा करण्यात आले.

सदरची कारवाई वणी उपविभागीय अधिकारी नितीनकुमार हिंगोले, वणी तहसीलदार निखिल धुरधर, मारेगाव तहसीलदार उत्तम निलावाड यांनी पार पाडली अशी माहिती आहे.

महावितरण कंपनीने दर महिन्याला रिडींग घेऊन ग्राहकांना न्याय द्यावा - मनसेची मागणी

सह्याद्री चौफेर | वृत्तसंस्था 

मारेगाव : महावितरण कंपनीकडून ग्राहकांची फसवणूक व अधिकाऱ्यांकडून होत असलेला लाखो रुपयांचा भ्रष्टाचार थांबविण्यात यावा, अशा आशयचे निवेदन काल (ता.6 फेब्रु.) रोज बुधवारला महाराष्ट्र नवनिर्माण सेना मारेगाव शाखेच्या वतीने मारेगाव महावितरणचे उपअभियंता यांना देण्यात आले.

निवेदनात पुढे असेंही म्हटलं की, वीज वितरणकडे मनुष्यबळ कमी असल्याने वितरण कंपनी ग्राहकाकडील मिटर रिडींग घेण्याचे काम खासगी कंपनीला देते. ज्यांनी हे टेंडर घेतलेले असते ती कंपनी गरजेपेक्षा कमी कर्मचारी कामावर ठेवतात. परिणामी सर्व ग्राहकांचे दर महिन्याला रिडींग होत नाही. त्यामुळे ग्राहकांना नियमित बिले देऊन व रिडींग दरमहिन्याला ग्राहकाना न्याय द्यावा,अशी मागणी महाराष्ट्र नवनिर्माण सेनेचे जिल्हा उपाध्यक्ष संतोष रोगे यांची मागणी  आहे.

येत्या सात दिवसात सर्व मागण्या मार्गी लावाव्या, अन्यथा तीव्र स्वरुपात आंदोलन छेडण्यात, येईल असा ईशारीही निवेदनातून देण्यात आला आहे. निवेदन देताना मनसेचे जिल्हा उपाध्यक्ष संतोषभाऊ रोगे, तालुका अध्यक्ष रुपेशभाऊ ढोके, ता. उपाध्यक्ष उदयभाऊ खिरटकर, ता. संघटक नबीभाई शेख आदींची उपस्थिती होती.

ग्राहकांना चुकीची वीज बिले गेली असतील तर तत्काळ दुरुस्त करून देण्यात येतील.रिडींग एजन्सी ला चुकीची रिडींग न घेण्याच्या सूचना देण्यात आलेल्या आहेत. घेतल्यास दंडात्मक कार्यवाही करण्यात येईल.

-शैलेशकुमार पाटील

उपअभियंता महावितरण कार्यालय, मारेगाव

वनरक्षक भरती दरम्यान तरुणाचा मृत्यू

सह्याद्री चौफेर | वृत्तसंस्था 

वणी : नागपूर येथील मैदानावर वनरक्षक पदाच्या भरतीसाठी गेलेल्या 28 वर्षीय तरुणाचा मृत्यू झाल्याची हृदयद्रावक घटना घडली आहे. सदर तरुणाला एम्स रुग्णालयात उपचारासाठी दाखल केले असता डॉक्टरांनी मृत घोषित केल्याची माहिती आहे.

वणी तालुक्यातील पेटूर येथील सचिन दिलीप लांबट हा तरुण वनविभागाच्या वनरक्षक पदाच्या भरतीसाठी तयारी करीत होता. तो वणीच्या शासकीय मैदानात सरावासाठी नियमित येत होता. 4 मार्च मंगळवार ला सचिन भरतीसाठी नागपुरात दाखल झाला. वनरक्षक भरतीची शारीरिक क्षमता चाचणी 5 किलोमीटर अंतर पार करत असताना अवघ्या 10 ते 15 मीटर अंतरावर सचिन अचानक पडला तो जागेवरून उठलाच नसल्याची समजते. त्याची प्रकृती गंभीर झाली. त्याला वनविभागाच्या चमूने नागपुरातील एम्स रुग्णालयात दाखल केले. मात्र, डॉक्टरांनी सचिन ला मृत घोषित केले.

आईवडिलांचा ही अपघात

सचिन च्या घटनेची माहिती कळताच आई-वडील पेटूरहून नागपूरकडे रवाना झाले. दरम्यान, बुट्टीबोरी नजीक त्यांच्या वाहनाला अपघात झाल्याची माहिती आहे. मात्र,या अपघातात ते किरकोळ जखमी झाले असल्याचे सांगण्यात येत आहे.

शासकीय सेवेत जाण्याचे स्वप्न अधुरेच

सचिन हा सामान्य कुटुंबातील तरुण होता. हलाखीच्या परिस्थितीत जगून त्याने शासकीय सेवेत दाखल होण्याचे स्वप्न उराशी बाळगले होते. रोज वणीच्या शासकीय मैदानावर येऊन सराव करायचा. मात्र, या घटनेने सचिनचे स्वप्न मैदानावरच राहिले.

‘लेक लाडकी’ योजनेसाठी १९ कोटी ७० लाखाचा निधी वितरित

सह्याद्री चौफेर | वृत्तसंस्था 

मुंबई : मुलींच्या सक्षमीकरणासाठी ‘लेक लाडकी’ ही योजना सुरु करण्यात आली आहे.

या योजनेअंतर्गत पिवळ्या व केशरी रेशन कार्डधारक कुटुंबात जन्माला आलेल्या मुलींना जन्मानंतर अनुदान देण्यात येणार आहे. यासाठी १९ कोटी ७० लाखाचा निधी वितरित करण्यात आला आहे, अशी माहिती महिला व बालविकास मंत्री कु. आदिती तटकरे यांनी दिली.

एकात्मिक बाल विकास सेवा योजना आयुक्तालय, नवी मुंबई मार्फत ३६ जिल्हयांना १९.७० कोटी (रुपये १९ कोटी ७० लाख) वितरित करण्यांत आले याबाबत जिल्हा स्तरावर जिल्हा निहाय व तालुका स्तरावर कॅम्प आयोजित करुन १ एप्रिल २०२३ नंतर जन्मलेल्या मुलींना लाभ देण्याची कार्यवाही विभागामार्फत करण्यांत येत आहे.

आतापर्यत जवळपास ३५ हजार प्रस्ताव जिल्हा कार्यालयात प्राप्त झालेले असून पुढील १५ दिवसांत तालुका निहाय / जिल्हा निहाय कॅम्प आयोजित करण्यांत येत असून पात्र लाभार्थीनी जवळच्या बाल विकास प्रकल्प कार्यालयात संपर्क साधावा असे आवाहन मंत्री कु. तटकरे यांनी केले आहे.

या योजनेअंतर्गत पिवळया व केशरी शिधा पत्रिकाधारक कुटुंबात जन्मलेल्या मुलीना लाभ दिला जाईल. मुलींच्या जन्मानंतर ५ हजार रुपये, इयत्ता पहिलीत ६ हजार रुपये, सहावीत ७ हजार रुपये, अकरावीत ८ हजार रुपये तर लाभार्थी मुलीचे वय १८ वर्षे पूर्ण झाल्यानंतर तिला ७५ हजार रुपये याप्रमाणे एकूण रुपये १,०१,०००/- एवढी रक्कम देण्यात येईल.

ही योजना दिनांक १ एप्रिल २०२३ रोजी वा त्यानंतर जन्माला येणाऱ्‍या एक अथवा दोन मुलींना लागू राहील, तसेच एक मुलगा व एक मुलगी असल्यास मुलीला लागू राहील. लाभार्थी कुटुंबाचे वार्षिक उत्पन्न रक्कम रु. १ लक्ष पेक्षा जास्त नसावे.

महाशिवरात्रीच्या पर्वावर चिखलगाव येथे होणार भव्य पदावली भजन स्पर्धा

सह्याद्री चौफेर | वृत्तसंस्था 

वणी : शहरालगत असलेल्या चिखलगाव येथे महाशिवरात्रीच्या पर्वावर श्री शंकरबाबा पदावली भजन मंडळाकडून 'पदावली भजन' स्पर्धेचे आयोजन करण्यात आले आहे. या स्पर्धेत अधिकाधिक स्पर्धकांनी या स्पर्धेत शामिल होण्याचे आव्हान आयोजकांनी केले आहे.

तालुक्यातील चिखलगाव येथे हेमाडपंथी शैलीचे प्राचीन शिवमंदिर आहे. या मंदिरात दरवर्षी महाशिवरात्रीच्या पर्वावर भजन स्पर्धेचे आयोजन करण्यात येते. या स्पर्धेची संपूर्ण जबाबदारी ही गावातीलच श्री शंकर बाबा पदावली भजन मंडळ चिखलगाव यांच्याकडेच असते. दरवर्षी प्रमाणे यावर्षी सुद्धा श्री शंकरबाबा पदावली भजन मंडळाकडून 8,9 व10 मार्च रोजी या भव्य भजन स्पर्धेचे अयोजन करण्यात आले आहे. या स्पर्धेत एकूण 10 बक्षिसे ठेवण्यात आली आहे. शिवाय अनेक शिव भक्तांकडून वैयक्तिक बक्षीस ठेवण्यात आले आहे.

स्पर्धेतील प्रथम पारितोषिक हे 16 हजार रुपये आहे तर शेवटचे 4 हजार रुपयापर्यत एकूण 10 बक्षिसे ठेवण्यात आली आहे. तरी या स्पर्धेत अधिकाधिक भजन मंडळांनी आपले नाव नोंदविण्याचे आव्हान आयोजकांडून करण्यात आले आहे. ज्या भजन मंडळांना आपले नाव नोंदणी करायचे आहे त्यांनी मनोज नवले मो. क्र. 7767044102, सचिन नागपुरे मो.क्र. 8805379670, व सुशील मोहूर्ले 7038741838 मंडळातील सदस्य यांच्याकडे संपर्क साधावा,असे आवाहन करण्यात आले आहे.