सह्याद्री चौफेर | वृत्तसंस्था
मारेगाव : मारेगाव तालुक्यात सहकार क्षेत्रात प्रतिष्ठेची समजली जाणारी तसेच वर्षाकाठी कोट्यवधी रुपयांची उलाढाल होणाऱ्या कृषी उत्पन्न बाजार समितीच्या निवडणुकीच्या बऱ्याच तपानंतर अखेर बिगुल वाजला. मारेगाव कृषी उत्पन्न बाजार समितीचा 18 जागेसाठी अखेरच्या दिवशी 91 उमेदवारी अर्ज दाखल करण्यात आले.
27 मार्च पासून सुरु झालेल्या नामनिर्देशनाच्या शेवटच्या दिवशी 3 एप्रिलला मारेगाव कृषी उत्पन्न बाजार समितीच्या 18 जागेच्या निवडणुकीत सहकारी संस्था मतदार संघात सर्वसाधारण गटात 41, महिला राखीव 07, इतर मागासवर्ग मतदार संघ 07, अनुसूचित जमाती राखीव मतदार संघ 04, तर ग्रामपंचायत मतदार संघात सर्वसाधारण 14, अनु. जाती /जमाती मतदार संघ 07, आर्थिक दृष्ट्या दुर्बल घटक मतदार संघ 05, व्यापारी अडते मतदार संघ 04, हमाल, मापारी व तोलारी मतदार संघ 02 असे एकुण 91 असे एकूण 91 उमेदवारांनी उमेदवारी अर्ज दाखल केले आहेत. 5 एप्रिलला छाननी केली जाणार आहे तर नामनिर्देशन पत्र 6 एप्रिल ते 20 एप्रिल पर्यंत मागे घेता येईल. निवडणूक लढणाऱ्या उमेदवाराची अंतिम यादी 21 एप्रिल ला चिन्हासह करण्यात येणार आहे. 30 एप्रिल ला 4 वाजेपर्यंत मतदान केले जाणार आहे.
या कृषी उत्पन्न बाजार समितीच्या निवडणुकीत महाविकास आघाडी विरुद्ध भाजप, शिंदे(गट) शिवसेना अशी लढत होण्याची शक्यता निर्माण झाली आहे.
