योगेश मडावी | सह्याद्री चौफेर
झरी जामणी : संपूर्ण राज्यात दिनांक १३ सप्टेंबर ते ३० सप्टेंबर २०२२ पर्यंत संयुक्त कुष्ठरोग व क्षयरोग शोध मोहीम राबवीण्याबाबत राज्य सरकारच्या सूचना प्राप्त झाल्या आहेत त्या अनुषंगाने झरी जामणी तालुक्यात तालुका आरोग्य अधिकारी डॉ. मोहन गेडाम यांनी सर्व आरोग्य कर्मचारी यांचे तालुकास्तरीय प्रशिक्षण घेतले. सर्व विभागाचा समन्वय घेऊन सदर मोहीम हि राबविली जाणार आहे. त्याच अनुषंगाने गटविकास अधिकारी रवींद्रकुमार सांगळे यांच्या अध्यक्षतेखाली तालुका समन्वय समितीची सभा घेण्यात आली. तालुक्यात एकून तीन प्रा.आ. केंद्र असून त्यामध्ये कार्यरत सर्व आशा स्वयंसेविका आरोग्य कर्मचारी यांचा सक्रीय सहभाग घेऊन गावात प्रभातफेरी दवंडी देऊन जनजागृती करण्यात येणार आहे. समाजातील निदान न झालेले कुष्ठरुग्ण लवकरात लवकर शोधून त्यांना त्वरित बहुविध औषधोचाराखाली आणणे क्षयरोगाचे निदाना अभावी अद्यापही वंचित असनाऱ्या क्षयरुग्णांचा शोध घेऊन त्यांना क्षयरोग औषधोचाराखाली आणणे हा या मोहिमेचा उद्देश आहे. त्वचेवर फिक्कट लालसर न खाजणारा बधीर चट्टा, तेलकट चकाकणारी त्वचा, त्वचेवर गाठी, कानाच्या पाळ्या जाड होणे, भुवयाचे केस विरळ होणे, तळहातावर व तळपायावर मुंग्या येणे हे कुष्ठरोगाचे लक्षणे आहेत. तसेच दोन आठवड्यापेक्ष्या जास्त काळ खोकला, दोन आठवड्यापेक्ष्या जास्त ताप, वजनात लक्ष्यणीय घट हे क्षयरोगाचे लक्षणे आहेत. कुष्टरोग व क्षयरोग हा आजार औषधोपचाराने बरा होणारा आजार आहे. कुष्टरोग व क्षयरोग या रोगाचा औषधोपचार सर्व सरकारी दवखान्यात मोफत दिल्या जातात. अशी लक्षणे असणाऱ्या व्यक्तीने सर्वेक्षणासाठी येणाऱ्या आरोग्य पथकांना व्यवस्थित माहिती देऊन सहकार्य करावे असे आवाहन तालुका आरोग्य अधिकारी डॉ. मोहन गेडाम यांनी केले आहे.