अचानक लागलेल्या आगीत किराणा दुकान जळून खाक, दुकान मालकाचे लाखो रुपयांचे नुकसान

सह्याद्री न्यूज | प्रशांत चंदनखेडे 

वणी : शहरातील एका किराणा दुकानाला आग लागून दुकानातील वस्तू व सहत्यांसह संपूर्ण दुकानच जळून खाक झाल्याची घटना आज १८ फेब्रुवारीला पहाटे उघडकीस आली. या आगीने आजूबाजूचा परिसरही व्यापला होता. दुकानात ठेवलेली मोपेड दुचाकीही आगीच्या भक्षस्थानी चढली. आगीने भीषण रूप धारण केलं होतं. आजूबाजूच्या घरांपर्यंत आगीच्या झळा पोहचू लागल्या असतांनाच अग्निशमन दलाची गाडी वेळीच घटनास्थळी पोहचली, व मोठा अनर्थ टळला. अग्निशमन दलाच्या कर्मचाऱ्यांनी आग विझविण्याकरिता शर्थीचे प्रयत्न केले. त्यांच्या अथक प्रयत्नानंतर काही वेळांनी आग आटोक्यात आली, पण आगीत सर्वकाही भस्म झाले होते. या आगीत दुकान मालकाचे लाखो रुपयांचे नुकसान झाले आहे.  

शहरातील जैन स्थानकासमोर असलेल्या रमेश ट्रेडर्स या किराणा दुकानाला आज पहाटे अचानक आग लागली. हे किराणा दुकान रमेश पुण्यानी यांच्या मालकीचे होते. आगीत हे किराणा दुकान पूर्णतः जळून खाक झाले. दुकानात ठेवलेली मोपेड दुचाकीही आगीत जळाली. आग एवढी भीषण होती की, दुकानातील वस्तू व साहित्यांची जळून राख रांगोळी झाली. या आगीने आजूबाजूच्या घरांनाही धोका निर्माण झाला होता. आगीच्या ज्वाळा जवळपास असलेल्या घरांपर्यंत पोहचल्या होत्या. पण वेळीच अग्निशमन दलाची गाडी घटनास्थळी पोहचल्याने मोठा अनर्थ टळला. या आगीत रमेश पुण्यानी यांचे लाखो रुपयांचे नुकसान झाले आहे. शॉर्ट सर्किटमुळे ही आग लागल्याचा संशय व्यक्त केला जात आहे. सकाळी मॉर्निंग वॉक ला जाणाऱ्या नागरिकांना या दुकानातून धुर निघतांना दिसला. त्यानंतर ही माहिती दुकान मालकाला देण्यात आली. पण काही वेळातच आगीच्या ज्वाळांनी संपूर्ण दुकानालाच आपल्या कवेत घेतले.