राजूर येथे पहिल्या मुस्लिम शिक्षिका फातिमा शेख यांची जयंती साजरी

सह्याद्री न्यूज | प्रशांत चंदनखेडे 

वणी : स्त्री शिक्षणाच्या पायाभरणीत महत्वपूर्ण योगदान देणाऱ्या फातिमा शेख यांच्या जयंती दिना निमित्त राजूर येथील एका चौकाला त्यांचे नाव देऊन चौकात नामफलक लावण्यात आले. नागरिकांच्या उपस्थितीत नामफलकाचे उद्घाटन करून त्यांची १९१ वी जयंती साजरी करण्यात आली. फातिमा शेख या पहिल्या मुस्लिम शिक्षिका म्हणून ओळखल्या जातात. त्यांनी तळागाळातील महिलांना शिक्षित करण्याचं काम केलं. त्यांचा जन्म ९ जानेवारी १८३१ रोजी पुणे येथे झाला. क्रांतीज्योती सावित्रीबाई फुले यांच्या खांद्याला खांदा लावून फातिमा शेख यांनी स्त्री शिक्षणाची चळवळ राबविली. सन १९४८ मध्ये महात्मा ज्योतिबा फुले व सावित्रीबाई फुले या समाजसुधारकांबरोबर मिळून त्यांनी पुस्तकलायची स्थापना केली. हे भारतातील स्त्रियांसाठीचं पाहिलं शिक्षणालय ठरलं. हे स्वदेशी पुस्तकालय फातिमा शेख व उस्मान या बहीण भावाच्या घरी खोलण्यात आलं होतं. त्यामुळे स्त्रि शिक्षणासाठी त्यांचंही महत्वपूर्ण योगदान राहिलेलं आहे. 

राजूर हे चळवळीचे गाव म्हणून ओळखले जाते. या गावात अनेक महापुरुषांच्या नावांचे चौक आहेत. महापुरुषांच्या जयंती, स्मृतिदिन व अनेक वैचारिक कार्यक्रम राजूर या गावात वेगवेगळ्या संघटनांकडून घेण्यात येतात. यातूनच प्रेरणा घेऊन गावातील काही युवकांनी फातिमा शेख यांच्या जयंती निमित्त राजूर येथील एका चौकाला फातिमा शेख यांचे नाव देऊन त्यांच्या नावाचे नामफलक लावले, व नागरिकांच्या उपस्थितीत नामफलकाचे उद्घाटन करून फातिमा बीबी यांची साध्या पद्धतीने जयंती साजरी करण्यात आली. यावेळी सरोज मुन, महेश लिपटे, रोहित साव यांनी फातिमा शेख यांच्या स्त्री शिक्षणातील योगदानावर प्रकाश टाकला. कार्यक्रमाच्या यशस्वीतेकरिता नूर शेख, अक्षय खोब्रागडे, भगत, दिनेश धोटे, ताहिद शेख यांनी सहकार्य केले.