ट्रकच्या धडकेत गंभीर जखमी झालेल्या युवकाचा उपचारादरम्यान मृत्यू

सह्याद्री न्यूज | प्रशांत चंदनखेडे 

वणी : भरधाव ट्रकने दुचाकीला जबर धडक दिल्याने झालेल्या अपघातात गंभीर जखमी झालेल्या युवकाचा काल रात्री उपचारादरम्यान मृत्यू झाला. राजूर कॉलरी येथील युवक वणी येथे मावस बहिणीच्या लग्नाकरिता दुचाकीने वणी येथे जात असतांना राजूर फाट्यावर भरधाव ट्रकने त्याच्या दुचाकीला जोरदार धडक दिली. यात तो गंभीर जखमी झाल्याने त्याला आधी चंद्रपूर व नंतर नागपूर येथे रेफर करण्यात आले. नागपूर येथील खाजगी रुग्णालयात उपचार सुरु असतांना काल ७ जानेवारीला रात्री त्याचा मृत्यू झाला. शाबीर दस्तगीर शहा वय अंदाजे २३ वर्ष रा. वार्ड क्रं. ३ राजूर कॉलरी असे या अपघातात मरण पावलेल्या युवकाचे नाव आहे. हा अपघात काल ७ जानेवारीला सकाळी १०.३० वाजताच्या सुमारास राजूर फाटा येथे झाला होता. 

शहरातील एका मॅरेज हॉल मध्ये मावस बहिणीचे लग्न असल्याने साबीर शहा हा युवक राजूर कॉलरी येथून दुचाकीने लग्नासाठी जाण्याकरिता निघाला. राजूर कॉलरी पासून काही अंतरावरच राजूर फाटा येथे भरधाव ट्रकने त्याच्या दुचाकीला जबर धडक दिली. त्यात तो गंभीर जखमी झाला. त्याला आधी वणी येथील खाजगी रुग्णालयात व नंतर नागपूर येथील खाजगी रुग्णालयात रेफर केले. नागपूर येथील खाजगी रुग्णालयात उपचार सुरु असतांना काल रात्री उपचारादरम्यान त्याचा मृत्यू झाला. मावस बहिणीच्या लग्नाला जाण्याकरिता आनंदात निघालेल्या युवकाच्या वाटेत काळ आडवा आला. लग्नाला पोहचण्याआधीच नियतीने डाव साधला, व अपघातात त्याचा अकाली मृत्यू झाला. त्याच्या या अकाली जाण्याने परिसरात हळहळ व्यक्त केल्या जात आहे. कुटुंबाचा आधार असलेल्या युवकाचा असा अपघाती मृत्यू झाल्याने कुटुंबावर दुःखाचा डोंगर कोसळला आहे.