सावंगी (मेघे), वर्धा येथे उपचारासाठी जाणाऱ्या रुग्णांकरिता राजूर येथून मोफत बस सेवा सुरु

सह्याद्री न्यूज | प्रशांत चंदनखेडे 

वणी : येथून अवघ्या सात किमी अंतरावर असलेल्या राजूर गावातून आचार्य विनोबा भावे ग्रामीण रुग्णालय सावंगी (मेघे), वर्धा येथे गंभीर आजाराच्या रुग्णांना उपचारासाठी जाण्याकरिता रुग्णालय व्यवस्थापनाकडून मोफत साप्ताहिक बससेवा सुरु करण्यात आली आहे. दर शुक्रवारला ही बस राजूर येथे येईल, व रुग्णांना उपचाराकरिता आचार्य विनोबा भावे ग्रामीण रुग्णालय सावंगी (मेघे) येथे घेऊन जाईल. आज रुग्णालयाची बस राजूर येथे आली असता काही आजारग्रस्त रुग्ण सावंगी (मेघे) ग्रामीण रुग्णालयात उपचाराकरिता गेले असल्याचे सांगण्यात येते. राजूर ग्रामपंचायत व काही सामाजिक पुढाऱ्यांनी सावंगी (मेघे) ग्रामीण रुग्णालयाकरिता राजूर येथून मोफत बस सेवा सुरु करण्याची मागणी रेटून धरली होती. त्याकरिता वेळोवेळी रुग्णालय व्यवस्थापनाकडे पाठपुरावाही केला. त्यांच्या प्रयत्नातून सावंगी (मेघे) ग्रामीण रुग्णालयाकरिता राजूर येथून मोफत साप्ताहिक बस सेवा सुरु झाली आहे. या बस सेवेचा लाभ वणी शहरातील रुग्णांनाही घेता येणार आहे. 

वणी तालुका हा कोळसाखाणींनी वेढलेला आहे. कोळसाखाणींमधून सातत्याने कोळशाची वाहतूक सुरु असते. त्यामुळे याठिकाणी अपघाताचे प्रमाणही वाढले आहे. कोळसाखाणींमुळे प्रदूषणातही मोठ्या प्रमाणात वाढ झाली आहे. वणी तालुक्याने प्रदूषणाची उच्च पातळी गाठली आहे. राजूर कॉलरी येथेही कोळसा खाणी व चुन्याचे भट्टे आहेत. येथेही मोठ्या प्रमाणात धुळीचे प्रदूषण पाहायला मिळते. कोळशाची धूळ हवेत पसरून प्रदूषित हवेत श्वास घ्यावा लागत असल्याने तालुक्यातील नागरिक फुफ्फुसाच्या व श्वसनाच्या अनेक आजारांनी ग्रस्त झाले आहेत. अशा या गंभीर आजाराच्या रुग्णांना सर्व सोईनीयुक्त रुग्णालयात उपचार मिळण्याची नितांत आवशक्ता असते. सर्वसामान्य रुग्णांना खाजगी रुग्णालयात उपचार घेणे शक्य होत नसल्याने त्यांना उपचाराच्या सर्व सुविधा उपलब्ध असलेल्या निम शासकीय रुग्णालयात उपचार मिळावा, याकरिता राजूर ग्रामपंचायतेने आचार्य विनोबा भावे ग्रामीण रुग्णालय सावंगी (मेघे), वर्धा येथील रुग्णालय व्यवस्थापनाला वारंवार निवेदने देऊन येथील रुग्णांकरिता मोफत बस सेवा सुरु करण्याची मागणी रेटून धरली. ग्रामपंचायतेच्या मागणीची दखल घेत आचार्य विनोबा भावे ग्रामीण रुग्णालय व्यवस्थापनाने राजूर येथून रुग्णांना सावंगी येथे उपचारासाठी जाण्याकरिता मोफत साप्ताहिक बस सेवा सुरु केली. या बस सेवेचा लाभ वणी शहर व आसपासच्या गावातील रुग्णांनाही घेता येणार आहे. अती गंभीर आजार झालेल्या रुग्णांना सावंगी (मेघे) येथे उपचारासाठी जाण्यायेण्याकरिता रुग्णालयाची ही मोफत बस सेवा वणी तालुक्यातील रुग्णांकरिता अतिशय लाभदायक ठरणार असल्याचे राजूर ग्रामपंचायतेच्या सरपंचा विद्याताई पेरकावार यांनी बस सेवा प्रारंभ झाल्यानंतर नागरिकांशी संवाद साधतांना म्हटले.