सह्याद्री न्यूज | प्रशांत चंदनखेडे
वणी : शहरातील खडबडा मोहल्ला हा गोवंश जनावरांच्या अवैध खरेदी विक्रीचा बाजार म्हणून ओळखला जाऊ लागला आहे. या परिसरातून लगतच्या प्रांतात मोठ्या प्रमाणात जनावरांची तस्करी केली जाते. कत्तलीकरिता गोवंश जनावरांची खरेदी विक्री करणारा परिसर म्हणून खडबडा मोहल्ला कुप्रसिद्ध होऊ लागला आहे. गोवंश जनावरांच्या तस्करीत या मोहल्ल्यातील अनेक हात सरसावले आहेत. परिणामी पोलिसांच्या धडक कारवायांनंतरही गोवंश जनावरांची तस्करी थांबलेली नाही. पोलिसांनी गोवंश जनावरांच्या तस्करीचे प्रयत्न कित्येकदा उधळून लावले, तरीही तस्कर शिरजोर होऊन गोवंश जनावरांची तस्करी करितच आहेत. काल मध्यरात्री याच मोहल्ल्यातून होणारी गोवंश जनावरांची तस्करी पोलिसांनी उधळून लावली. मालवाहू वाहनात निर्दयीपणे कोंबून कत्तलीकरिता नेणाऱ्या ११ गोवंश जनावरांची पोलिसांनी तस्करांच्या तावडीतून सुटका केली. खडबडा मोहल्ला येथून मालवाहू वाहनातून गोवंश जनावरांची अवैध विक्रीकरिता वाहतूक होणार असल्याची विश्वसनीय माहिती पोलिसांना मिळाली. पोलिसांनी मध्यरात्री खडबडा मोहल्ला येथे धाड टाकली असता त्यांना मालवाहू वाहनातून जनावरांच्या तस्करीचा प्रयत्न सुरु असल्याचे आढळले. मालवाहू वाहनात सात जनावरे कोंबून होती, तर चार जनावरे वाहनात कोंबण्याची तयारी सुरु होती. पोलिसांनी गोवंश जनावरांच्या तस्करीचा डाव उधळून लावत ११ जनावरांची तस्करांच्या तावडीतून सुटका केली. तसेच तिन तस्करांना अटक करून ७ लाख ८४ हजारांचा मुद्देमाल जप्त केला.
खडबडा मोहल्ला येथून गोवंश जनावरांची अवैध विक्रीकरिता वाहतूक केली जाणार असल्याची माहिती डीबी पथकाला मिळाली. ऑल आऊट स्किम ड्युटीवर असलेल्या एपीआय माया चाटसे यांना सोबत घेऊन डीबी पथकाने त्याठिकाणी धाड टाकली. तेथे MH ३४ BG २८८४ या मालवाहू वाहनात सात जनावरे कोंबून असलेली व चार जनावरे वाहनात भरण्याची तयारी सुरु असल्याचे पोलिसांना आढळले. जनावरांची तस्करी करण्याच्या तयारीत असलेल्या राजू मधुकर झिलपे (२५) रा. रंगनाथ नगर, इलियास अली खान मुमताज अली खान (४०) रा. गोकुळनगर, शहारूख खान लायलाभ खान (२८) रा. रंगनाथ नगर या तिन तस्करांना पोलिसांनी अटक करून ११ गोवंश जनावरांची त्यांच्या तावडीतून सुटका केली. पोलिसांनी घटनास्थळावरून एका मालवाहू वाहनासह ११ गोवंश जनावरे असा एकूण ७ लाख ८४ हजार रुपयांचा मुद्देमाल जप्त केला. तीनही आरोपींवर विविध कलमान्वये गुन्हे दाखल करण्यात आले आहे.
सदर कार्यवाही जिल्हा पोलिस अधीक्षक डॉ. दिलिप पाटील भुजबळ, अप्पर पोलिस अधीक्षक खंडेराव धरणे, एसडीपीओ संजय पुज्जलवार यांच्या मार्गदर्शनात ठाणेदार श्याम सोनटक्के, एपीआय माया चाटसे, डीबी पथकाचे सुदर्शन वानोळे, अविनाश बानकर, अशोक टेकाडे, विशाल गेडाम, शंकर चौधरी यांनी केली.
