सराईत गुन्हेगार गब्ब्याला पोलिसांनी सिनेस्टाइल दौड लावून केली अटक

सह्याद्री न्यूज : प्रशांत चंदनखेडे 

वणी : चोरी केलेल्या मालवाहू वाहनात चोरलेला भंगार व चोरी केलेले तांदळाचे कठ्ठे विकण्याकरिता घेऊन जात असतांना पोलिसांनी गब्ब्याला सिनेस्टाइल पाठलाग करून अटक केली. सराईत गुन्हेगार म्हणून गब्ब्या तालुक्यात कुप्रसिद्ध आहे. त्याच्यावर याआधीही चोरीचे गुन्हे दाखल आहेत. गुन्हेगारी वर्तुळावर बारीक लक्ष ठेऊन असलेले वणीचे ठाणेदार श्याम सोनटक्के यांना गब्ब्या नामक चोरटा चोरीच्या वाहनासह चोरीचे साहित्य घेऊन विक्रीकरिता जात असल्याची गुप्त माहिती मिळाली. ठाणेदारांनी लगेच एपीआय माया चाटसे यांच्यासह डीबी पथकाला माहिती मिळालेल्या ठिकाणाकडे रवाना केले. त्याठिकाणी गब्ब्या वाहनासह आढळून आला. पोलिसांना बघताच तो वाहनातून उतरून पळू लागला, पण डीबी पथकाने दौड लावून त्याच्या मुसक्या आवळल्या. त्याच्यावर चोरीचे दोन गुन्हे दाखल करण्यात आले आहे. 

ठाणेदार श्याम सोनटक्के यांना २१ डिसेंबरला सकाळी ११ वाजता शहरातील एका सराईत गुन्हेगाराने कुठे तरी चोरी करून तो चोरीचा मुद्देमाल विकण्याच्या तयारीत असल्याची गुप्त माहिती मिळाली. ठाणेदारांनी लगेच एपीआय माया चाटसे व डीबी पथकाला त्याचा मागोवा घेण्यास सांगितले. डीबी पथकाने त्याचा सुगावा लावत त्याला वणी शिरपूर रोडवरील मांडवकर यांच्या बियरबार जवळ गाठले. पोलिस दिसताच गब्ब्या वाहनातून उतरून पळू लागला. पण डीबी पथकाने दौड लावून त्याला पकडले, व त्याच्यावर दोन वेगवेगळे चोरीचे गुन्हे दाखल केले. चोरी केलेले चारचाकी वाहन क्रं. MH २९ T ३४१६ किंमत ३ लाख ५० हजार रुपये, भंगार साहित्य किंमत ४५० रुपये व २५ ते ३० किलो वजनाचे तांदळाचे ७ कठ्ठे किंमत १५ हजार रुपये असा एकूण ३ लाख ६६ हजार ५७९ रुपयांचा मुद्देमाल पोलिसांनी नावेद उर्फ गब्ब्या मो. कादिर (३९) रा. मोमीनपुरा या चोरट्याकडून जप्त केला. त्याला पोलिस स्टेशनला आणून त्याच्यावर भादंवि च्या कलम ३७९ सहकलम ४६१, ३८० नुसार गुन्हा दाखल करण्यात आला आहे.  

सदर कार्यवाही जिल्हा पोलिस अधीक्षक डॉ. दिलिप पाटील भुजबळ, अप्पर पोलिस अधिक्षक खंडेराव धरणे, एसडीपीओ संजय पुज्जलवार यांच्या मार्गदर्शनात ठाणेदार श्याम सोनटक्के, सपोनि माया चाटसे, पोउपनि शिवाजी टिपूर्णे, डीबी पथकाचे सुदर्शन वानोळे, हरविंदर भारती, अविनाश वनकर यांनी केली.