वणी शहरालगत झालेल्या दोन वेगवेगळ्या अपघातात एक जण ठार तर ७ जण गंभीर जखमी

सह्याद्री न्यूज | प्रशांत चंदनखेडे 

वणी : वणी शहरालगत काल रात्री दोन भीषण अपघात झाले. एका अपघातात एक जण जागीच ठार झाला तर दुसऱ्या अपघातात सात जण जखमी झाले. वणी मुकुटबन मार्गावर मालवाहू पिकअप वाहनाने ऑटोला जोरदार धडक दिली. त्यात ऑटोमध्ये प्रवास करीत असलेले सात प्रवासी जखमी झाले. त्यातील दोन ते तीन जण गंभीर जखमी झाल्याचे सांगण्यात येते. हा अपघात काल १३ डिसेंबरला रात्री ७ वाजताच्या सुमारास झाला. अपघात झाल्यानंतर तेथे जमलेल्या लोकांनी जखमींना तत्काळ ग्रामीण रुग्णायात दाखल केले. गंभीर जखमी असलेल्या तिघांना चंद्रपूर येथे रेफर करण्यात आले आहे. दुसरा अपघात हा वणी वरोरा मार्गावर झाला. भरधाव कारने दुचाकीला समोरासमोर धडक दिल्याने एक जण जागीच ठार तर एक जण गंभीर जखमी झाल्याची घटना काल रात्री १०.३० वाजताच्या सुमारास घडली. माजरी येथे राहणारे दोन युवक वणी येथील आपले काम आटपून गावाकडे जात असतांना नायगाव जवळ समोरून येणाऱ्या भरधाव कारने त्यांच्या दुचाकीला जबर धडक दिली. त्यात दुचाकी चालक जागीच ठार झाला तर मागे बसून असलेला युवक गंभीर जखमी झाला. सोमवारला शहरालगत तीन भीषण अपघात झाल्याने सोमवार हा अपघातवार ठरला. 

मारेगाव तालुक्यातील वेगांव येथील रहिवासी असलेले सहा जण कायर जवळील पिंपरी येथे कार्यक्रमात स्वयंपाक करण्याकरिता गेले होते. कार्यक्रमातील स्वयंपाकाचे काम आटोपल्यानंतर ते ऑटोने गावाकडे परतत असतांना वणी वरून मुकुटबनकडे जात असलेल्या मालवाहू पिकअप (MH २९ T ४६१०) वाहनाने ऑटो (MH २९ T ७६९५) ला समोरासमोर जोरदार धडक दिली. धडक एवढी जोरदार होती की, धडक देणारे पिकअप वाहन रस्त्यावर उलटले. या अपघातात ऑटोमध्ये प्रवास करीत असलेले गंगुबाई सुरेश ठावरी, कल्पना धोबे, सुरेश ठावरी, तुळसाबाई पोटे, मयूर लक्षण ठावरी, हर्षल गायकवाड हे जखमी झाले. यातील तीन जण गंभीर जखमी झाल्याने त्यांना चंद्रपूर येथे रेफर करण्यात आले. दुसऱ्या अपघातात वणी येथे मित्रांसोबत आलेला माजरी कॉलरी येथील रुपेश ढोके (३६) हा युवक भरधाव कारने दुचाकीला दिलेल्या धडकेत जागीच ठार झाला. तर दुचाकीवरील त्याचा मित्र सागर झरिया (२६) हा गंभीर जखमी झाला. हे दोघेही आपल्या अन्य मित्रांसह वणी येथील काम आटपून दुचाकी वाहनांनी आपल्या गावाकडे जात होते. दरम्यान वणी वरोरा मार्गावरील नायगाव जवळ समोरून येणाऱ्या भरधाव कारने (MH २९ Z ७८६१) त्यांच्या दुचाकीला (MH ३४ W ६६७६) जोरदार धडक दिली. या अपघातात दुचाकी चालक रुपेश ढोके हा जागीच ठार झाला. पोलिसांना दोन्ही अपघातांची माहिती मिळताच त्यांनी घटनास्थळी जाऊन घटनास्थळाचा पंचनामा करून जखमींना उपचाराकरिता तर मृतदेह उत्तरीय तपासणीकरिता ग्रामीण रुग्णालयात पाठविला. 

पुढील तपास पोलिस करीत आहे.