मोहर्ली येथे जननायक बिरसा मुंडा यांचा भव्य जयंती सोहळा संपन्न

सह्याद्री न्यूज | प्रशांत चंदनखेडे 

वणी : तालुक्यातील मोहर्ली या गावात क्रांतिवीर बिरसा मुंडा यांची जयंती उत्साहात साजरी करण्यात आली. बिरसा मुंडा कमेटीच्या वतीने १५ नोव्हेंबरला सायंकाळी जिल्हा परिषद शाळेच्या भव्य पटांगणावर आयोजित जयंती सोहळ्याच्या कार्यक्रमाला मोठ्या संख्येने नागरिक उपस्थित होते. यावेळी पारंपरिक गोंडी नृत्याचे आयोजन करण्यात आले. गोंडी नृत्यामध्ये समाज बांधवांनी मोठ्या संख्येने सहभाग घेऊन उपस्थितांच्या डोळ्याचे पारणे फेडले. मागील सात वर्षांपासून याठिकाणी भव्य गोंडी नृत्याचं आयोजन केलं जात. यावेळी जयंती सोहळ्याच्या या कार्यक्रमाला काँग्रेस कमेटीचं नेतृत्व लाभल्याने कार्यक्रमाला आणखीच भव्य स्वरूप प्राप्त झालं होतं. या कार्यक्रमाच्या अध्यक्षस्थानी महाराष्ट्र राज्य काँग्रेस पक्षाचे प्रदेश सरचिटणीस तथा वणी विधानसभा क्षेत्राचे माजी आमदार वामनराव कासावार होते. तर प्रमुख पाहुणे म्हणून जिल्हा काँग्रेस कमिटीचे उपाध्यक्ष इजहार शेख यांची उपस्थिती लाभली. तसेच डॉ. मोरेश्वर पावडे, काँग्रेस वणी विधानसभा अध्यक्ष संतोष पारखी, शहराध्यक्ष प्रमोद निकुरे, तालुका अध्यक्ष प्रमोद वासेकर, अभिजित सोनटक्के, निलेश परगंटीवार, सुधिर पेटकर, ऍड. महातळे, सचिन चापडे, मोहार्लीच्या सरपंचा दीपमाला वडस्कर, उपसरपंच धनराज टेकाम, तंटामुक्त अध्यक्ष गजानन टेकाम हे विशेषत्वाने उपस्थित होते. 

यावेळी वामनराव कासावार व इजहार शेख यांच्या हस्ते दीप प्रज्वलित करून कार्यक्रमाची सुरुवात झाली. नंतर पारंपरिक गोंडी नृत्याने उपस्थितांचे स्वागत करण्यात आले. यावेळी मान्यवरांनी बिरसा मुंडा यांच्या जीवन कार्यावर प्रकाश टाकला. वामनराव कासावार व मोरेश्वर पावडे यांनी बिरसा मुंडा यांच्या क्रांतिकारी धोरणांविषयी माहिती दिली. बिरसा मुंडा कमिटीचे अध्यक्ष यांनी आपल्या प्रास्ताविकात मागील सात वर्षांपासून भव्य स्वरूपात आयोजित करण्यात येत असलेल्या या कार्यक्रमाचा मुख्य उद्देश समाज जागृती करणं हाच असल्याचे म्हटले. मान्यवरांच्या मनोगतानंतर राणी दुर्गावती डान्स ग्रुपच्या वतीने भव्य स्वरूपाचे पारंपरिक गोंडी नृत्याचे सादरीकरण करण्यात आले. यामध्ये कोतरु, धनोडी या नृत्यांचा समावेश होता. 

कर्यक्रमाचे संचालन संजय उरकुडे यांनी तर आभार प्रदर्शन बोबडे यांनी केले. यावेळी आयोजित बिरसा मुंडा जयंती सोहळ्याच्या या भव्य कार्यक्रमाला मारेगाव, पेटूर, मांजरी, विरकुंड, सुकणेगाव, रासा येथील नागरिक मोठ्या संख्येने उपस्थित होते. कार्यक्रमाच्या यशस्वीतेकरिता कमेटीचे शंकर टेकाम, भालचंद्र मेश्राम, गणेश टेकाम, लेखन कनाके, छायाबाई मडावी आदींनी परिश्रम घेतले.