सह्याद्री चौफेर | अमोल कुमरे
वणी : वणी शहरात राजकारणाचे तापमान चढू लागले आहे. नगर परिषदेच्या निवडणुकीचा बिगुल वाजताच, गल्लीपासून ते चौकापर्यंत निवडणुकीच्या चर्चांना उधाण आले आहे. शहरातील प्रत्येक चहाच्या टपरीवर, पानाच्या गाड्यावर आणि बाजारपेठेत सध्या चर्चेचा एकच विषय,“या वेळी कोण येणार मैदानात?”
दरम्यान, विविध पक्षांत उमेदवार ठरविण्याची लगबग सुरू असली तरी काही पक्षांना अजूनही “योग्य चेहरा” सापडत नाही. काही जण उमेदवारीच्या प्रतीक्षेत तर काही जण गुपचूप गोट बदलण्याच्या तयारीत आहेत. पक्ष कार्यालयात बैठकांवर बैठकांचे सत्र सुरू असून, वरिष्ठ नेते “जिंकणारा उमेदवार” शोधण्यात गुंतले आहेत.
दरम्यान, मतदार मात्र या सगळ्या घडामोडीकडे उत्सुकतेने पाहत आहेत. वणीतील नागरिकांना यंदाची निवडणूक फारच रंगतदार होणार असल्याची चर्चा आहे. तरुणाई सोशल मीडियावरून मतप्रचाराच्या नव्या पद्धती वापरत असून, “आमच्या प्रभागात कोण?” हा प्रश्न प्रत्येकाच्या मनात घर करून बसला आहे.
येत्या काही दिवसांत उमेदवारी अर्ज दाखल होऊ लागले की खरी राजकीय धूम सुरू होईल, अशी अपेक्षा व्यक्त केली जात आहे. एकूणच, वणी नगर परिषदेची निवडणूक यंदा “थ्रिलर चित्रपटापेक्षा कमी नाही” अशी रंगतदार आणि रोमांचक ठरणार आहे, यात शंका नाही!