कृषी सहाय्यक अडकला ACB च्या जाळ्यात: फवारणी पंपसाठी मागितले 1 हजार रुपये!

सह्याद्री चौफेर | ऑनलाईन 

वरोरा : लाच घेणे व देणे हा कायद्याने गुन्हा आहे.

परंतु महिन्याकाठी शासनाचा गलेलठ्ठ पगार उचलणा-या एका कृषी सहाय्यकला लाचेचा मोह टाळता आला नाही.अश्यातच आज तो एक हजार रुपयांची लाच घेताना अलगद चंद्रपूर लाचलुचपत प्रतिबंधक विभागाच्या जाळ्यात अडकला.

या घटनेमुळे भद्रावती कृषी विभागाच्या कार्यालयासह अन्य शासकीय कार्यालयात एकच खळबळ उडाली आहे. लाचेच्या जाळ्यात अडकणा-या या लाचखोराचे नांव सरजीव अजाबराव बोरकर असून त्याचे वय अवघे 36 वर्षाचे आहे. सदरहु लाचखोराने माजरी काॅलरी येथील एका शेतकऱ्याकडून फवारणी पंप देण्यासाठी एक हजार रुपयांच्या लाचेची मागणी केली होती.

नागपूर लाचलुचपत प्रतिबंधक विभागाचे पोलिस अधीक्षक दिगंबर प्रधान, अप्पर पोलिस अधीक्षक संजय पुरंदरे व चंद्रपूर लाचलुचपत प्रतिबंधक विभागाच्या उपअधीक्षक श्रीमती मंजुषा भोसले यांच्या मार्गदर्शनाखाली पोलिस निरीक्षक जितेंद्र गुरनुले, वैभव गाडगे, प्रदीप ताडाम, राकेश जांभूळकर, पुष्पा काचोळे, सतिश शिडाम यांनी ही यशस्वी कारवाई केली .

लाचखोराने ही लाच विनायक लेआऊट नंदनवन चौक वरोरा येथे स्विकारली.