सह्याद्री न्यूज | प्रशांत चंदनखेडे
वणी, (२ आक्टो.) : राष्ट्रपीता महात्मा गांधी व भारताचे माजी पंतप्रधान लालबहाद्दूर शास्त्री यांची तालुक्यात ठिकठिकाणी जयंती साजरी करण्यात आली. वणी पंचायत समिती अंतर्गत येणाऱ्या लालगुडा ग्रामपंचायत येथे व राजश्री शाहू महाराज हिंदी विद्यालय येथे या दोन महापुरुषांची जयंती साजरी करून स्वच्छतेचे काही उपक्रम राबविण्यात आले. लालगुडा ग्रामपंचायतेमध्ये सरपंच धनपाल चालखुरे व उपसरपंच निलेश कोरवते यांच्या प्रमुख उपस्थितीत पार पडलेल्या या जयंतीच्या कार्यक्रमात सर्व ग्रामपंचायत सदस्य, अंगणवाडी सेविका, बचत गटाच्या महिला प्रतिनिधी व ग्रामस्थ उपस्थित होते. यावेळी उपस्थितांना स्वच्छतेचे महत्व पटवून देत उपस्थितांकडून ग्रामपंचायत परिसर व गावात स्वच्छता अभियान राबविण्यात आले. सर्वांनीच उस्फुर्तपणे स्वच्छता अभियानात सहभागी होऊन परिसर स्वच्छ केला. 