राजस्थान सीमेवर कर्तव्यावर असलेल्या सैनिकाचे निधन

सह्याद्री न्यूज | नंदकुमार मस्के 

उमरखेड, (२२ ऑगस्ट) : शहरापासून अवघ्या दोन कि.मी. अंतरावर असलेल्या नागापूर रुपाळा येथील ३३ वर्षीय जवान भारतिय सेनेमध्ये राजस्थान सिमेवर कर्तव्यावर असतांना दिल्ली येथे उपचारादरम्यान मृत्यू झाल्याची घटना आज २२ ऑगस्ट रोजी घडली असल्याची माहिती जिल्हा प्रशासनाकडून प्राप्त झाली. ही दुखःद बातमी समजताच नागापूर रुपाळा गावावर शोककळा पसरली आहे .

              

सन २०११ साली भारतिय सैन्यदलात दाखल झालेल्या वसंत देवराव देशमाने हा ३३ वर्षीय जवान राजस्थान मधील अलवर या ठिकाणी ४२ आर्टीलरी डिवीजन येथे कर्तव्य बजावत असतांना त्यास किडनीचा आजार जडल्याने त्याची प्रकृती बिकट झाली. सैन्यदलाच्या वतीने दिल्ली येथील सैनिकी रुग्णालयात त्यास उपचारार्थ दाखल करण्यात आले असतांना आज सकाळी दि.२२ ऑगस्ट रोजी उपचारादरम्यान त्याचा मृत्यू झाला असल्याची माहिती जिल्हा प्रशासनाकडून प्राप्त झाली आहे. या दुर्दैवी घटनेचे वृत्त कळताच सहा महिन्याची गरोदर असलेल्या पत्नी सुवर्णमालावर आभाळ कोसळले असून देशमाने परिवार शोक सागरात बुडाला व रुपाळा गावावर शोककळा पसरली आहे.

मृत्तक वसंत देवराव देशमाने यांच्या पश्चात पत्नी सुवर्णमाला, आई सुमनबाई, वडील देवराव, भाऊ काशीनाथ, बहिण मनिषा खंदारे असा मोठा आप्त परिवार असून त्याचा मृतदेह दिल्ली येथून विमानाने नागपूर येथे आणण्यात येत आहे. उद्या सोमवार दि. २३ रोजी त्याचेवर शासकिय इतमामात अंत्यसंस्कार होणार असल्याची माहिती तालुका प्रशासनाने दिली आहे.