९ ऑगस्ट पासून श्रावण महिना सुरू

सह्याद्री न्यूज | विवेक तोडासे 

मारेगाव, (०३ ऑगस्ट) : आषाढी एकादशी आटोपली की, तालुक्यात सण - उत्सवांचे वारे वाहायला सुरुवात होते. आषाढी, बकरी ईद, गुरुपौर्णिमा हे सण पार पडले आहेत. आषाढ अमावस्येला दिपपूजा केली जाते. त्यानंतर सणांचा महिना श्रावण सुरू होतो. 

यंदा ९ ऑगस्टपासूनच श्रावण महिन्याला सुरुवात होत असून,याच तारखेपासून श्रावण सोमवारही सुरू होतं आहेत. विशेष बाब अशी की, यंदा पाच श्रावण सोमवार आले आहेत.

पहिला श्रावण सोमवार ९ ऑगस्टला, दुसरा १६ ला, तिसरा २३ ला, चौथा ३० ला, तर पाचवा श्रावण सोमवार ६ तारखेला आला आहे.

याच महिन्यात शुक्रवार १३ रोजी नागपंचमीचा सण असून रविवार १५ ऑगस्टला स्वातंत्रदिन, पतेती, १६ ऑगस्टला पारशी नूतनवर्षं, गुरुवार रोजी मोहरम, रविवार २२ रोजी नारळीपौर्णिमा रक्षाबंधन, सोमवार ३० रोजी श्रीकृष्ण जन्माष्टमी, ३१ ऑगस्टला गोपाळकाला, ६ सप्टेंबर रोजी मोठा पोळा व ७ सप्टेंबर रोजी श्रावण अमावस्या लहान पोळा असे भरगच्च सण आहेत. ऑगस्ट महिन्यात दिपपूजा, नागपंचमी, रक्षाबंधन, श्रीकृष्ण जन्माष्टमी हे चार महत्वाचे सण आहेत. 

            "पाने, फुले, फळांचा सुकाळ"

यावर्षी चांगला पाऊस पडल्याने सृष्टी हिरवा शालू नेसून नटली आहे. डोंगरावर हिरवी चादर पसरलेली आहे, असे वाटते. 

झाडे पानांनी बहरली असून रंगीत फुले बहरली आहे. विविध फळेही बाजारात विक्रीसाठी उपलब्ध होत आहे. त्यामुळे विविध झाडांची पाने विशेषतः बेलपत्री, चाफा, जाई, जुई निशिगंध, जास्वंद, दुर्वा, गुलाब अशी फुलेही विपूल दिसत आहे. 

कोरोनामुळे मंदिर बंद असल्याने घरातील देव्हारा पाना - फुलांनी सजवला जाणार आहे.