साधनकरवाडीत मोठी घरफोडी: पोलीस यंत्रणा अलर्ट

सह्याद्री चौफेर | ऑनलाईन 

वणी : शहरातील नावाजलेल्या साधनकरवाडीत एका घरात घुसून चोरट्यांनी घरातील रोख रक्कम व मौल्यवान वस्तू लांबवल्याची घटना सोमवारला पहाटे उघडकीस आली. याबाबत पोलिसात तक्रार देण्यात आली असून चोरट्यानी घरी कोणी नसल्याचा डाव साधत 15 लाख रुपयांचा मुद्देमाल लांबवला. या घटनेने परिसरात खळबळ उडाली आहे. 

शहरात घरफोडीची ही मोठी घटना घडल्याने पोलिस यंत्रणाही खडबडून जागी झाली आहे. 3 फेब्रुवारी रोजी साफसफाई करणारी महिला जेंव्हा विमा प्रतिनिधी प्रदीप चिंडालियाकडे साफसफाई करायला आली,तेंव्हा तिला स्वयंपाक रूमचा दरवाजा ओपन दिसला. त्यामुळे महिलेला घरी चोरी झाल्याचा संशय आला. तिने लगेच ही माहिती घरमालक प्रदीप चिंडालिया यांना दिली. घरी कुणी नसतांना घरातील स्वयंपाक रूमचा दरवाजा उघडा असल्याची माहिती मिळताच चिंडालियांचा मुलगा तातडीने नागपूर वरून वणी पोहचला. मुलाने आत बघितल्यानंतर त्याला घरातील अवस्था पाहून घरी चोरी झाल्याचे लक्षात आले. त्यांने लगेच पोलिस स्टेशनला येऊन या घटनेबाबत तक्रार दिली. पोलीस प्रशासनाने श्वान पथक व फिंगर प्रिंट एक्सपर्टला घटनास्थळी पाचारण करण्यात आले. 

शांतप्रिय वणी शहरातील पोलिस स्टेशनचा नुकताच पदभार ठाणेदार गोपाल उंबरकर यांनी स्वीकारला आणि रुजू होताच ठाणेदारांसमोर चोरट्यांनी आव्हान उभे केले आहे. मात्र शहर पोलिस व स्थानिक गुन्हे शाखा पथक या घटनेचा विविधांगी तपास करत आहे.