वणी-मारेगाव येथील डॉ.आंबेडकर जयंतीची मिरवणुक अविस्मरणीय...!

सह्याद्री चौफेर | वृत्तसंस्था 

वणी : विश्वभूषण भारतीय घटनेचे शिल्पकार डॉ. बाबासाहेब आंबेडकर यांची 132 वी जयंती वणी-मारेगाव येथे मोठ्या उत्साहात संपन्न झाली. ट्रॅक्टरवर वेगवेगळ्या फुलांचा साज. यात बाबासाहेब यांच्या भारदस्त व हसऱ्या चेहऱ्याच्या प्रतिमेची ओजस्वी भावमुद्रा. समोर प्रकाशमय वातावरण. यातच कलाविष्काराची मेजवानी म्हणून डीजे. (DJ) बाबासाहेबांच्या जयघोषात ही मिरवणूक शहराच्या मुख्य रस्त्याने मार्गक्रमण करीत निघाली. पावसाची तमा न बागळता आबालवृद्ध अनुयायी यांनी थिरकत ठेका शेवटपर्यंत कायम ठेवल्याचे अविस्मरणीय चित्र वणी मारेगावात पहायला मिळाले.

प्रज्ञासूर्य बाबासाहेबांना अभिवादन करण्यासाठी 14 एप्रिल ला निसर्गही मागे नव्हता. दिवसभर रखरखती उन काहिली माजवित असतांना सायंकाळी मिरवणूक निघताच पावसाच्या सरींनी मिरवणुकीत गारवा निर्माण केला. पावसाच्या सरी. विद्युत प्रवाह खंडीत तरीही बाबासाहेबांच्या गीतांवर अनुयायी पावसाला न जुमानता ओले चिंब होत थिरकत होते. कुणीही या पावसाने डगमगले नाही. यातूनच बाबासाहेब आंबेडकर यांच्या प्रती असलेली उत्कट भावना स्पष्टपणे वणी उपविभागात दिसून आली.

ही मिरवणूक वणी मारेगाव शहराच्या विविध प्रभाग, वार्ड मधून राज्य महामार्गावर मार्गक्रमण करीत डॉ.आंबेडकर पुतळ्यासमोर सामूहिक बुद्धवंदना घेऊन मिरवणुकीची सांगता करण्यात आली. यावेळी वणी-मारेगाव मध्ये अफाट जनसागर बाबासाहेबांना अभिवादन करण्यासाठी एकत्रित जमला होता. दरम्यान, विविध पक्षाकडून अनुयायी यांना पिण्याच्या पाण्याची, शरबत याची सेवा पुरवणताना चमू दिसत होती. शिवाय सत्कार सोहळा ही रॅली प्रमुखांचा करण्यात आला. ज्ञानसागराच्या अथांग करूण सागरेत बुडून पावसाच्या सरी अंगावर घेऊन बाबासाहेब प्रती असणारी नितांत श्रद्धा 14 एप्रिल च्या मिरवणुकीत अधोरेखित झाली.

"14 एप्रिल, महामानव डॉ.बाबासाहेब आंबेडकर जयंती..सकाळचा अभिवादन सोहळा..सायंकाळी बाबासाहेब रमाई च्या स्वरूपात रथावर बाबासाहेब आणि रमाई स्वार झालेले मनमोहक रथ... प्रतिमेची भव्य मिरवणूक.. पुतळ्यासमोरून डीजे, डफडेच्या तालावर बालकांसह युवक-युवती व महिला पुरुषांनी ठेका धरला..मिरवणुकीत रंगीबेरंगी प्रकाशाचा झगमगाट..आणि नभात अचानक काळेकुट्ट ढग जमले...वादळवारा.. विजेचा लपंडाव.. बरसणाऱ्या पावसाच्या सरी..यात अख्खे अनुयायी चिंब झाले.. मात्र, बाबासाहेबां प्रती प्रेम कमी झाले नाही.. सर्वचजण बेभान थिरकले.. वरूणराजानेही अभिवादन सोहळ्यास हजेरी लावली..हा डोळ्यात साठवणारा भावनिक प्रसंग..14 एप्रिल ला वणी उपविभागीय क्षेत्रात जनतेनी अनुभवल."