महाराष्ट्र शासनाचे अप्पर सचिव (गृह) श्री श्याम तागडे यांनी रमाबाई आंबेडकर विद्यालयाला भेट....

सह्याद्री चौफेर | उमेश गोलेपल्लीवार

सावली : महाराष्ट्र शासनाचे अप्पर सचिव (गृह विभाग) श्री श्याम तागडे यांनी आज शनिवारी रमाबाई आंबेडकर विद्यालयाला भेट देऊन विद्यार्थ्यांना मार्गदर्शन केले.

महाराष्ट्र विधानसभेचे हिवाळी अधिवेशन नागपुरात सुरू असल्याने ते गडचिरोली आणि चंद्रपूरच्या अधिकृत दौऱ्यावर आहेत. चंद्रपूरला जाताना श्री.श्याम तागडे यांनी शहरातील रमाबाई आंबेडकर विद्यालयाला भेट देऊन विद्यार्थ्यांशी संवाद साधला. आपल्या प्रेरक भाषणात अप्पर सचिव (गृह) श्री श्याम तागडे यांनी विद्यार्थ्यांना महापुरुषांकडून प्रेरणा घेण्यास सांगितले आणि विद्यार्थ्यांना त्यांच्या मार्गावर चालण्याचा सल्ला दिला. जीवनात यश मिळवण्यासाठी पवित्रता, कठोर परिश्रम आणि ध्येयावरील एकाग्रता या महत्त्वाच्या बाबी आहेत, असेही त्यांनी नमूद केले. शाळेमध्ये अप्पर सचिवांचे स्वागत डॉ.बाबासाहेब आंबेडकर स्मारक समिती शिक्षण प्रसारक संस्थेच्या सचिव सौ. व्ही. सी. गेडाम व प्राचार्य श्री. शेंडे यांनी केले. यावेळी सावली पोलीस ठाण्याचे ठाणेदार आशिष बोरकर हे देखील उपस्थित होते. डॉ. पी.आर. फुलझेले यांनी सूत्रसंचालन केले तर पर्यवेक्षक श्री. लाकडे यांनी आभार मानले.

यावेळी शिक्षक, शिक्षकेत्तर कर्मचारी आणि विद्यार्थी मोठ्या संख्येने उपस्थित होते.