सह्याद्री चौफेर | ऑनलाईन
मारेगाव : गुरांसाठी गवत आणण्याकरिता दुचाकीने शेताकडे निघालेल्या एका १९ वर्षीय तरुणाचा भरधाव अज्ञात वाहनाच्या धडकेत दुर्दैवी मृत्यू झाला. रविवार, १ नोव्हेंबर रोजी सायंकाळी अर्जुनी शिवारात घडलेल्या या भीषण अपघातात अनिकेत सुशांत तलांडे (वय १९, रा. अर्जुनी) याचा जागीच मृत्यू झाला. ऐन तारुण्यात काळाने घाला घातल्याने एका होतकरू तरुणाचे आयुष्य अकाली संपले असून या घटनेने अर्जुनी गावासह परिसरात शोककळा पसरली आहे.
मिळालेल्या माहितीनुसार, अनिकेत हा रविवारी सायंकाळी सुमारे पाच वाजताच्या दरम्यान आपल्या दुचाकीने गुरांसाठी गवत आणण्याच्या उद्देशाने शेताकडे जात होता. अर्जुनी शिवारातील ढुमणे यांच्या शेताजवळ पोहोचला असताना मागून वेगाने आलेल्या अज्ञात वाहनाने त्याच्या दुचाकीला जोरदार धडक दिली. धडकेची तीव्रता इतकी होती की, अनिकेत दुचाकीवरून फेकला जाऊन रस्त्याच्या कडेला पडला. या अपघातात त्याच्या डोक्याला गंभीर दुखापत झाली आणि त्याचा घटनास्थळीच मृत्यू झाला. अपघातानंतर संबंधित अज्ञात वाहनचालक घटनास्थळावरून निघून गेल्याची माहिती आहे.
अनिकेत हा अवघ्या १९ वर्षांचा असून कुटुंबाच्या अपेक्षा आणि भविष्याची स्वप्ने घेऊन वाटचाल करीत होता. मात्र, एका अपघाताने त्याच्या आयुष्याचा प्रवास अचानक थांबवला. घरातील तरुण मुलाच्या अशा अकाली जाण्याने तलांडे कुटुंबावर दुःखाचा डोंगर कोसळला आहे. दरम्यान, भरधाव वाहनांच्या बेदरकार वेगामुळे रस्त्यांवर निष्पापांचे बळी जाण्याच्या घटना चिंतेचा विषय ठरत आहेत. या अपघातातील अज्ञात वाहनाचा शोध घेऊन संबंधित चालकावर कठोर कायदेशीर कारवाई करावी, अशी मागणी नागरिकांकडून होत आहे.