अचानक रस्त्यावर आडव्या आलेल्या डुकराला दुचाकी धडकली, भालर मार्गावरील घटना

सह्याद्री न्यूज | प्रशांत चंदनखेडे 

वणी : रस्त्यावर अचानक आडव्या आलेल्या डुकराला दुचाकी धडकल्याने झालेल्या अपघातात दुचाकीवरील दोन्ही युवक गंभीर जखमी झाल्याची घटना वणी भालर मार्गावरील इंडो कोल वॉशेरीच्या समोर घडली.

भालर कॉलनी येथील वेकोलिच्या मुख्य महाप्रबंधक कार्यालयात प्रशिक्षणार्थी असलेले दोन युवक आज सकाळी ९.३० वाजताच्या सुमारास भालर कडे जात असतांना अचानक रस्त्यावर डुकर आडवा आला. एकाएक आडवा आलेल्या डुकराला दुचाकीची जबर धडक बसली. त्यात दोन्ही युवक उसळून रस्त्यावर पडल्याने दोघेही गंभीर जखमी झाले. धडक एवढी जोरदार होती की, डुकर चेंडू सारखे फेकल्या गेले व जागीच ठार झाले. जखमी पैकी एकाची प्रकृती अत्यवस्थ असल्याचे सांगण्यात येते. घटनास्थळी जमलेल्या नागरिकांनी दोघांनाही ग्रामीण रुग्यालयात दाखल केले असता आधी एकाला तर काही वेळानंतर दुसऱ्यालाही चंद्रपूर येथे रेफर करण्यात आले. 

भालर कॉलनी येथील वेकोलिच्या मुख्य महाप्रबंधक कार्यालयात काही युवक प्रशिणार्थी म्हणून कामाला आहेत. त्यात बाहेगावच्याही युवकांचा समावेश आहे. नागपूर येथील अभिनव कांबळे व वणी येथील छोरीया ले-आऊट येथे राहणारा प्रबोध चांदेकर हे दोघेही प्रशिक्षणार्थी असून ते रेसर बाईकने भालर येथे जात असतांना भालर मार्गावरील इंडो कोल वॉशरी समोर रस्त्यालगत असलेल्या कचरा डेपो जवळ अचानक एक मोठं डुकर रस्त्यावर आडवं आलं. रस्त्यालगतच कचरा डेपो असल्याने याठिकाणी नेहमी डुकरांचा वावर असतो. अचानक समोर आलेल्या डुकराला भरधाव दुचाकी धडकली. त्यात दोनही युवक उसळून रस्त्यावर पडल्याने ते गंभीर जखमी झाले. दोघांनाही तत्काळ ग्रामीण रुग्णालयात दाखल करण्यात आले. दुचाकीवर मागे बसलेल्या अभिनव कांबळे या युवकाची प्रकृती अत्यवस्थ असल्याने त्याला लगेच चंद्रपूर येथे रेफर करण्यात आले तर प्रबोध चांदेकर याच्यावर प्राथमिक उपचार केल्यानंतर त्यालाही चंद्रपूर येथे हलविण्यात आले आहे.  

पुढील तपास पोलिस करीत आहे.