सह्याद्री चौफेर | अमोल कुमरे
वणी : कलाविश्वात आपल्या अभिनयातून वेगळी ओळख निर्माण करणारे लघुचित्रपटातील ‘अधोगती’ फेम रंगा रुहीकर यांनी वणी तालुक्यातील वडगाव येथे आज नवमीच्या पर्वावर कोयाराणीचे दर्शन घेतले. यावेळी त्यांनी सालूरकर परिवाराची सदिच्छा भेट घेत कुटुंबीयांशी आपुलकीचा संवाद साधला. या भेटीमुळे उत्सवाच्या आनंदात आणखी भर पडली.
वडगाव येथील कोयाराणीचा उत्सव म्हणजे केवळ धार्मिक सोहळा नसून आदिवासी संस्कृती, श्रद्धा आणि परंपरेचा वारसा जपणारा उत्सव आहे. सालूरकर परिवार गेल्या ५० वर्षांपासून ही परंपरा निष्ठेने पुढे नेत आहे. आदिवासी समाजाचे कैवारी दिवंगत नीलकंठराव दामोदर सालूरकर यांनी या परंपरेची मुहूर्तमेढ रोवली. त्यांच्या स्मृतींना उजाळा देत आजही हा उत्सव उत्साहाने साजरा केला जातो.
‘अधोगती’मधील भूमिकेमुळे चर्चेत आलेले रंगा रुहीकर
‘अधोगती’ या लघुचित्रपटमुळे ओळख मिळवलेले रंगा रुहीकर हे आपल्या अभिनयाच्या माध्यमातून प्रेक्षकांपर्यंत पोहोचले आहेत. कलाकार म्हणून प्रेक्षकांशी जोडले जाण्याबरोबरच स्थानिक परंपरा, सांस्कृतिक वारसा आणि समाजजीवनाशी संबंधित अशा भेटींमधूनही आपुलकीचे नाते निर्माण होते. वडगाव येथील कोयाराणीच्या दर्शनासाठी त्यांनी दिलेली भेट ही त्याच जिव्हाळ्याची अनुभूती देणारी ठरली. यावेळी त्यांनी सालूरकर परिवारातील सदस्यांशी संवाद साधत उत्सवाच्या परंपरेविषयी जाणून घेतले. त्यानंतर भाविकांच्या उपस्थितीत महाप्रसाद घेतला.
परंपरेचा वारसा, आपुलकीच्या नात्यांचा संगम
पिढ्यान्‌पिढ्या जपल्या जाणाऱ्या परंपरा समाजाच्या सांस्कृतिक ओळखीला बळ देतात. वडगाव येथील कोयाराणीचा उत्सव ही त्याचीच साक्ष देतो. दिवंगत नीलकंठराव सालूरकर यांनी सुरू केलेल्या या परंपरेचे जतन करीत सालूरकर परिवाराने श्रद्धा आणि एकतेचा वारसा कायम ठेवला आहे. नवमीच्या निमित्ताने झालेल्या या भेटीत धार्मिक श्रद्धेसोबतच सामाजिक जिव्हाळ्याचे दर्शन घडले.
यावेळी शंकर पेंदोर, आनंदराव सालूरकर, बाबाराव सालूरकर, लहानू सालूरकर, पत्रकार महेश आत्राम, हर्षल सालूरकर, राम सालूरकर, सारंग सालूरकर, धर्मराज सालूरकर, शुभांगी सालूरकर, वैशाली सालूरकर, लक्ष्मी सालूरकर, कल्पना सालूरकर, मंगेश सालूरकर, ज्ञानेश्वर सालूरकर, प्रशांत सालूरकर, हर्षिता सालूरकर, आरोही सालूरकर, आर्या सालूरकर, दीपक सालूरकर यांच्यासह सालूरकर परिवारातील सदस्य मोठ्या संख्येने उपस्थित होते.