सचिन मेश्राम यांची लोक आयुक्त यांच्याकडे तक्रार; उच्चस्तरीय चौकशी करण्याचीही मागणी

सह्याद्री चौफेर | ऑनलाईन 

 

मारेगाव : गेल्या सहा महिन्यापूर्वी माहितीच्या अधिकार अर्ज मारेगाव वन विभागाच्या कार्यालयात दिला असता त्या अर्जाच्या अनुषंगाने माहिती न पुरविता चक्क माहिती अधिकाराच्या अर्जालाच केराची टोपली दाखवली गेल्याने पत्रकार सचिन मेश्राम यांनी लोक आयुक्त यांच्याकडे तक्रार केली असून संबंधित वनपरिक्षेत्र अधिकारी सह वनपाल, वनरक्षक कर्मचारी यांना निलंबित करण्यात यावे अशी मागणी दिलेल्या तक्रारीतून केली आहे.

           

मारेगाव तालुक्यातील वनपरिक्षेत्र कार्यालयामार्फत मारेगाव, बोटोणी, खंडणी, वडकी, राळेगाव राऊंडमध्ये राज्य वार्षिक योजना,जिल्हा वार्षिक योजना अंतर्गत वेगवेगळी कामे केली गेली. ही कामे प्रत्यक्ष मजुरांच्या हाताने केली जातात.तसेच मजुरांच्याच नावाने पैसे सुद्धा काढले जातात. परंतु यामध्ये प्रत्यक्ष कामावर कमी मजूर लावून जास्त मजुरांचे नावाने मलिंदा लाटल्या गेले. तसेच हा मलिंदा लाटताना जे मजूर कामावर होते त्यांच्या नावाने न लाटता जे मजूर कामावर नाहीत, अशा काही राजकीय पक्षाचे पदाधिकारी तसेच कार्यालयीन कर्मचाऱ्यांच्या नातेवाईकांच्या नावाने सुद्धा वळते केले गेले. यात मोठ्या प्रमाणात गौड बंगाल करण्यात आला.

या झालेल्या अफारातफारीची माहिती अधिकार अधिनियम 2005 अंतर्गत पत्रकार सचिन मेश्राम यांनी माहिती मागितलेली होती. परंतु माहिती मागूनही चार ते पाच महिन्याचा कालावधी लोटला तरीही वनपरिक्षेत्र अधिकारी  हटकर यांनी ही माहिती दिलेली नाही. उलट माहिती अधिकाराच्या अर्जालाच केराची टोपली दाखवली. त्यामुळे माहिती अधिकाराचा दुरुपयोग करणाऱ्या अधिकाऱ्यांचे विरोधात सचिन मेश्राम यांनी लोक आयुक्त यांचे कडेच तक्रार केलेली आहे.