अखेर मनसेच्या मध्यस्थीने वृद्ध महिलेचे आमरण उपोषण मागे

सह्याद्री चौफेर | वृत्तसंस्था 

मारेगाव : दि.13 सप्टेंबर पासून डोर्ली येथील वृद्ध महिला अनुसया फुलझेले ह्या आपल्या न्याय हक्कासाठी तहसील कार्यालयाच्या समोर आमरण उपोषणाला बसल्या. उपोषणाच्या सातवा दिवसापर्यंत स्थानिक प्रशासन त्या 76 वर्षीय वृद्ध महिलेकडे फिरकले नाही. कार्यालयातच कागदीघोडे नाचवत कारभार चालू होते. स्थानिक सामाजिक कार्यकर्ते तथा मनसेचे जिल्हा उपाध्यक्ष संतोष रोगे यांनी या उपोषण कर्त्या वृद्ध महिलेच्या उपोषणस्थळी नेते राजू उंबरकर यांच्या मार्गदर्शनाखाली भेट दिली, विचारपूस केली. त्यानंतर आज (ता.20) रोज बुधवारला त्या वृद्ध महिलेचे आमरण उपोषण मनसेच्या मध्यस्थीने मागे घेण्यात आले. 

तालुक्यातील अनुसया जहांगीर फुलझेले ही वृद्ध महिला आपल्या न्यायासाठी उपोषणाला तहसील कार्यालया समोर बसल्या होत्या. त्यांनी दिलेल्या निवेदनातून एकच मागणी होती की, गट नंबर 82 मधील फेरफार क्र.441 हा रद्द करुन फेरफार क्रमांक 401 हा कायम करावा. यासाठी तिचा सतत संघर्ष सुरु आहे. येथील उपोषणाचा सातवा दिवस लोटला परंतु वृद्धेचे उपोषण सुरूच होते, ही बाब उंबरकर यांना कळल्यानंतर त्यांनी आपल्या पदाधिकाऱ्यांना सुचना देत सदर महिलेची काय समस्या आहे त्या जाणून घ्या आणि कळवा असे म्हणत जिल्हा उपाध्यक्ष संतोष रोगे, तालुका अध्यक्ष रुपेश ढोके, व शहराध्यक्ष चांद बहादे यांनी उपोषणमंडपी भेट दिली व तहसीलदार यांच्याशी चर्चा करून त्या उपोषणस्थळी वृद्धेशी संवाद साधला, यावेळी मारेगाव तहसीलदार निलावाड यांनी सदर प्रकरण त्यांचे स्थानिक कार्यालयाच्या कार्यक्षेत्रातील नसल्याने उपोषणकर्त्या अनुसया यांना सक्षम अधिकारी यांचे कडे सदर प्रकरणाबाबत अपील करावी. त्यानंतर आम्ही योग्य ते सहकार्य करू अशी ग्वाही दिल्यानंतर त्यांचे आज बुधवारी (ता. 20) म्हणजे आठव्या दिवशी लेखी पत्र देत उपोषण मागे घेण्यात आले.

यावेळी मा‌.तहसीलदार उत्तम निलावाड, निवासी नायब तहसीलदार मडकाम मॅडम, नायब तहसीलदार मत्ते, प्रितम राजगडकर यांनी ज्यूस पाजून वृद्ध महिलेचे उपोषण सोडले. जिल्हा उपाध्यक्ष संतोष भाऊ रोगे, तालुकाध्यक्ष रुपेश भाऊ ढोके, शहराध्यक्ष चांद भाऊ बहादे, नगरसेवक अनिल भाऊ गेडाम यांच्या उपस्थितीमध्ये उपोषणाची सांगता करण्यात आली.