जब मिल बैठे तीन यार; खाकी, राजस्व आणि रेती माफिया

कुमार अमोल : सह्याद्री चौफेर 

मारेगाव : तालुक्यातील होत असलेल्या अवैध रेती तस्करांनी अधिकारी आणि कर्मचाऱ्यांशी हातमिळवणी केली असून, वाळू तस्करी जोरात सुरू आहे. यामध्ये स्थानिक ठाण्यातील पोलिसांचा मोठा वाटा असल्याचे बोलले जाते. यासाठी महसुलमधील वरिष्ठ अधिकाऱ्यांसह स्थानिक वरिष्ठ पोलिस अधिकाऱ्यांनी अवैध रेती वाहतुक बंद करण्यासाठी धडक कारवाई करण्याची गरज निर्माण झाली आहे.

तालुक्यातील रेतीघाटावरून अवैध रेती वाहतूक अहोरात्र होत असून, शासनाचा महसूल बुडत असल्यामुळें, रेती माफियांनी एकजुट दाखवून पोलिस आणि महसूल विभागांच्या कर्मचाऱ्यांशी ‘सेटींग' केले असून दर दिवसाला मारेगाव शहरासह तालुक्यातील अवैधरित्या जवळपास २०० हायवासह ट्रॅक्टरने रेती येत असल्याची माहिती विश्‍वसनीय सूत्रांनी दिली आहे. महसूल विभाग आणि पोलिस विभागाच्या आशीर्वादाने तालुक्यातील रेती तस्करीचा गोरखधंदा सुरू आहे.

कोसारा, आपटी घाटावरून मारेगाव शहरासह कुंभा, मार्डी, वेगाव, इत्यादी ठिकाणी रेती येते. व स्टॉक करून असलेल्या भागातून रात्रभर ट्रॅक्टरसह हायवाच्या सहाय्याने वाळुची अवैध वाहतूक केली जातो. त्यामुळे शासनाचा महसूल तस्करांच्या घसात जात आहे. तसेच या ओव्हरलोड वाहतुकीमुळे तालुक्यातील रस्त्यांची पूर्ण वाट लागल्याचे दिसून येत आहे. यामुळे शासनाला दुहेरी तोटा होतो आहे. या अवैध रेती वाहतूकीच्या अनेक तक्रारी प्राप्त झाल्या असून पोलिस, महसूल आणि परीवहन विभागाच्या संयुक्त पथकाने कडक कारवाई करावी अशी अपेक्षा आहे. 

या कारवाईत ड्रोन कॅमेऱ्याचा वापर केल्यास रेतीच्या अवैध वाहतूकीवर नजर ठेवता येईल शिवाय या गोरखधंद्यावर आळाही बसेल. तूर्तास होत असलेल्या अवैध वाहतूक वाहनावर दंडाच्या रकमेसह जप्तीची कारवाई करावी, अशी मागणी तालुक्यातील नागरिकांकडून होत आहे.