करण्यात आलेली पोलीस उपनिरीक्षकांची कारवाई योग्यच -गावाकऱ्यांनी दिले अवैध दारू विक्री संदर्भात निवेदन

सह्याद्री न्यूज | विवेक तोडासे

मारेगाव, (१३ जुलै) : गेली दहा ते बारा दिवसांपासून करणवाडी येथील दिव्यांग महिलेचे उपोषण सुरु आहे. परंतु गावाकऱ्यांनी या उपोषणात तथ्य नाही असा आरोप केला आहे. संबंधित महिलेवर व तिच्या पतीवर कायदेशीर गुन्हे दाखल केल्याने चिडलेल्या खान दाम्पत्याने ठाणेदार यांचे विरोधात खोटे आरोप लावून व बदनाम करण्याच्या हेतूने मारेगाव पोलीस स्टेशन समोर आमरण उपोषण सुरु केले. त्या महिलेच्या आमरण उपोषणाला काही ही तथ्य नाही. उलट करण्यात आलेली ती कारवाई योग्यच आहे. असे निवेदन तहसीलदार यांच्या मार्फत जिल्हा पोलीस अधीक्षक यांना देण्यात आले.

दि.२३ जून रोजी मारेगाव पोलीस स्टेशनचे पोलीस निरीक्षक श्री. जगदीश मंडलवार व त्यांच्या सहकाऱ्यांनी करणवाडी येथील एका घरी धाड मारून दारूच्या बॉटल अंथूरणामधून जप्त केल्या होत्या. व दारूचा अवैध व्यवसाय करणाऱ्या अपंग महिला व पुरुषावर कारवाई करण्यात आली होती. परंतु आमच्यावर करण्यात आलेली कारवाई ही चुकीची असून मला अपंग असतांनाही शारीरिक व मानसिक त्रास दिला असा आरोप करीत अपंग महिला सीमा अफरोज खान व तिचा पती अफरोज खान यांनी मारेगाव पोलीस स्टेशन समोरच आमरण उपोषणाला सुरुवात केली. परंतु सुरू असलेले हे उपोषण बिनबुडाचे असल्याचा आरोप करीत गावातील नागरिकांनी तहसीलदार यांचेमार्फत जिल्हा पोलीस अधीक्षक यांना निवेदन देत पोलीस निरीक्षक जगदीश मंडलवार यांनी केलेल्या कारवाईचे समर्थन केलेले आहे. 

    

गावकऱ्यांनी दिलेल्या निवेदनात म्हटले आहे की, या दारू विक्रीविरोधात सन २०१९ मध्ये करणवाडी फाट्यावर आंदोलन करण्यात आले होते. या अवैध दारूविक्रीमुळे गावातील अनेक संसार उघड्यावर पडले असून, लहान मुलेही या दारूच्या आहारी गेल्याचे म्हटले आहेत. गेल्या अनेक दिवसांपासून ही अवैध दारूविक्री सुरू असून पोलीस निरीक्षक यांना आम्ही गावकऱ्यांनीच माहिती दिली होती. व त्यावरून त्यांनी ही कारवाई केली. करण्यात आलेली ही कारवाई योग्यच असून त्यावेळी मुद्देमाल सुद्धा पोलिसांनी हस्तगत केलेला होता. या सर्व कारवाईला आम्ही साक्षदार आहोत. केवळ आकसापोटी त्यांनी ठाणेदारांवर आरोप करीत उपोषण सुरू केले असे म्हणत आमचे गाव दारूमुक्त करायचे असून, आम्हाला मंडलवार साहेबांसारखाच अधिकाऱ्यांची आवश्यकता असून त्यांच्यावर करण्यात आलेले आरोप हे बिनबुडाचे व खोटे असल्याचेही निवेदनात म्हटले आहे.

यावेळी शाळा सुधार समिती अध्यक्ष राजेंद्र खडसे, तंटामुक्ती अध्यक्षलीलाधर काळे, किरण आडे, हिना नैताम, मारोती नैताम, प्रीतम जोगी, कविता खडसे, रेखा श्रीपतवार, रवींद्र जोगी, विमल उरकुडे, सुनील गायकवाड, मनोज वादाफळे, प्रभाकर वाटेवर, केशव बदखल, मनीषा मिश्रा, अनिता टेकाम, कवडू गारघाटे, ओमप्रकाश मिश्रा आदींची उपस्थिती होती.