जिल्ह्यात 1 मेपासून मिळणार केवळ 600 रुपयांत घरपोच वाळू…

सह्याद्री चौफेर | वृत्तसंस्था 

अवैध वाळू उपसा व यातून वाढलेल्या गुन्हेगारीला लगाम घालण्यासाठी तसेच नागरिकांना स्वस्तात वाळू मिळावी यासाठी तेलंगण राज्याच्या धर्तीवर राज्य सरकारने वाळूचे नवीन धोरण आणले आहे. त्यानुसार ग्राहकांना एक ब्रास वाळूसाठी ६०० रुपये महसूल विभागाच्या संकेतस्थळावर ऑनलाइन रजिस्ट्रेशन करून पैसे भरावे लागतील, त्यानंतर थेट घरपोहोच वाळू १ मेपासून दिली जाणार आहे. विशेष म्हणजे सध्या ८ हजार रुपये ब्रासने मिळणारी वाळू ६०० रुपयांना मिळणार असल्याने एक ब्रासमागे ग्राहकांचे ७ हजार ४०० हजार रुपये वाचणार आहेत. श्रीरामपूर येथे पहिला वाळूचा डेपो तयार करण्यात आला असून, अन्य दोन ठिकाणी असे वाळूचे डेपो सुरू करण्यात येणार आहेत.

आठ वर्षांपूर्वी महाराष्ट्रात वाळूचे लिलाव हे बोली पद्धतीने होत होते, मात्र या लिलावात पारदर्शकता आणण्यासाठी तत्कालीन सरकारने वाळूचे लिलाव ऑनलाइन पद्धतीने सुरू करण्याचा निर्णय घेतला होता. त्यानुसार वाळूचे लिलाव हे ऑनलाइन पद्धतीने सुरू झाले होते, मात्र लिलावाच्या किचकट प्रक्रियेमुळे वाळू साठे निश्चित करूनही लिलावांना कमी प्रतिसाद मिळत होता. त्यामुळे दरवर्षी महसूल प्रशासनाला वाळू लिलावांतून मिळणाऱ्या उत्पन्नावर पाणी सोडावे लागत होते. वाळूतून वाढलेली गुन्हेगारी व वाळूचे वाढलेले दर लक्षात घेऊन राज्य सरकारने वाळूचे नवीन धोरण आणले आहे. बुधवार (१९ एप्रिल) ला महसूल विभागाने वाळू धोरणाचा शासनाचा निर्णय जारी केला आहे.

वाळू लिलावांसाठी ग्रामसभेची शिफारस अनिवार्य, वाळू गटांवर राहणार सीसीटीव्हीचे लक्ष :

शासनाच्या निर्णयानुसार वाळू लिलावाची प्रक्रिया सुरू करण्यापूर्वी ग्रामसभेची शिफारस अनिवार्य राहील. शिवाय वाळू गटांवर २४ तास लक्ष ठेवण्यासाठी आणि डेपोमध्ये देखील सीसीटीव्ही कॅमेरे असणार आहेत. केंद्र व राज्य सरकारच्या प्रकल्पासाठी वाळूचा एक गट राखून ठेवण्याचे निर्देशदेखील देण्यात आले आहेत. गैरप्रकार होऊ नयेत यासाठी नदीपात्रातून वाळू घेतल्यानंतर डेपोपर्यंत जाणाऱ्यां वाहनांवर जीपीएस यंत्रणा बसवण्यात येणार आहे. 

 १ मेपासून महसूल विभाग ग्राहकांना थेट घरपोच वाळू देणार आहे. त्यासाठी तीन डेपोदेखील निश्चित केले आहेत. त्यासाठी महसूल विभागाने सर्व तयारी पूर्ण केली आहे.

-सिद्धाराम सालीमठ

जिल्हाधिकारी