विवेक तोडासे | सह्याद्री चौफेर
मारेगाव : आज शहरात दोन वेगवेगळ्या घटना घडल्याने मारेगाव शहरात एकच खळबळ उडाली आहे. कान्हळगाव रस्त्या लगत वास्तव्यास असलेला अनिल आत्राम (28) यास कुलरचा शॉक लागून त्याचा मृत्यू झाला. ही घटना आज रोजी सोमवारला दुपारच्या सुमारास घडली. अनिल याच्या पाठीमागे आई, पत्नी, भाऊ, बहीण असा बराच मोठा आप्त परीवार आहे. तूर्तास अनिलचा मृतदेह उत्तरीय तपासणीसाठी मारेगाव ग्रामीण रुग्णालयात आहे. 
तसेच शहरातील लोढा हॉस्पिटल या इमारतीचे बांधकाम करण्यासाठी मधु झिंगट सहारे (37) रा.देवरी, तालुका साकोली जिल्हा भंडारा हा कुटुंबासोबत एक महिन्यापूर्वी आला असता, 29 जुलै रोजी कोणाला न सांगता अचानक गायब झाल्याने कुटुंबातील सदस्यांनी त्यास शहरातील व देवरी येथे शोध घेतला. मात्र त्याचा शोध लागला नाही. 
त्यामुळे 29 जुलै रोजी मारेगाव पोलिसात बेपत्ता असल्याची तक्रार दिली होती. आज दि.1 ऑगस्ट रोजी दुपारी 3 च्या सुमारास मारेगाव शहरातील जुने न्यायालय परिसरातील एका विहिरीत मधू यांचा मृतदेहच आढळून आला. या दोन्ही घटनेमुळे शहरात एकच खळबळ उडाली आहे.
या दोन्ही घटनेचा पुढील तपास मारेगाव पोलीस करित आहे.
