वणी : ग्रामीण भागातील विद्यार्थ्यांचा शैक्षणिक प्रवास सुलभ करण्यासाठी स्माईल फाउंडेशनने राबवलेल्या “सायकल बँक” उपक्रमाला उत्स्फूर्त प्रतिसाद मिळत आहे. या उपक्रमांतर्गत वणी परिसरातील गरजू विद्यार्थ्यांना मोफत सायकलींचे वाटप करण्यात आले. दररोज किलोमीटरचा पायी प्रवास करून शाळेत जाणाऱ्या विद्यार्थ्यांसाठी हा उपक्रम अत्यंत दिलासादायक ठरला. “आता शाळा दूर असली तरी आम्हाला भीती नाही; आमच्या सायकली खूप छान आहेत,” अशा उत्साही शब्दांत विद्यार्थ्यांनी आनंद व्यक्त केला.
स्माईल फाउंडेशन दरवर्षी “सायकल बँक” उपक्रमाअंतर्गत नागरिकांकडून वापरात नसलेल्या सायकली गोळा करून त्या गरजू विद्यार्थ्यांपर्यंत पोहोचवते. या वर्षीही अध्यक्ष सागर जाधव, उपाध्यक्ष पियुष आत्राम, सचिव आदर्श दाते, तसेच विशाल सुंदरणी, उत्कर्ष धांडे, खुशाल मांद्रे, कुणाल आत्राम, रोहन कोरपेनवार, सचिन जाधव, तन्मय कापसे, अनिकेत वासरीकर, कार्तिक पिदुरकर, जगदीश गिरी, शुभम भेले, भूषण पारेवे, सिद्धार्थ साठे आदी कार्यकर्त्यांनी मेहनत घेऊन हा उपक्रम यशस्वी केला.
“एक सायकल म्हणजे केवळ वाहन नाही; ती शिक्षणाकडे नेणारी पहिली पायरी आहे. तुमची छोटी मदत एखाद्या विद्यार्थ्याचे भविष्य बदलू शकते.”-सागर जाधव, अध्यक्ष, स्माईल फाउंडेशन