'ओयो'तील सेक्स रॅकेटचा भंडाफोड

सह्याद्री चौफेर | वृत्तसंस्था 

नागपूर : 'ओयो'च्या एका हॉटेलमधील आंतरराज्यीय सेक्स रॅकेटचा भंडाफोड करण्यात आला आहे. एमआयडीसी पोलिस ठाण्याच्या हद्दीत हा प्रकार सुरू होता. पोलिसांनी या प्रकरणात हॉटेल संचालकासह पाच आरोपींना अटक केली. तर विविध राज्यांतील पाच मुलींची सुटका केली. गुन्हे शाखेच्या सामाजिक सुरक्षा विभागाच्या पथकाने ही कारवाई केली.

हिंगणा मार्गावरील बालाजीनगरात ओयो हॉटेल यश-२४ आहे. तेथे देहव्यापार सुरू असल्याची माहिती पोलिसांच्या पथकाला मिळाली होती. पोलिसांनी एका डमी ग्राहकाच्या माध्यमातून आरोपींशी संकेतस्थळावर संपर्क साधला. आरोपींनी डमी ग्राहकाला मोबाइल क्रमांक दिला. त्यानंतर मुलींचे फोटो ग्राहकांना पाठवले. मुलीची निवड झाल्यानंतर डमी ग्राहकाला हॉटेलमध्ये बोलावण्यात आले. दोन मुलींमध्ये सौदा झाला. आरोपींनी डमी ग्राहकाकडून पैसे ग्राहकाकडून पैसे स्वीकारताच पोलिसांनी छापा मारला. तिथे दोन मुली सापडल्या. तर आणखी तीन मुली दुसऱ्या हॉटेलमध्ये होत्या. पोलिसांनी त्यांचीदेखील तेथून सुटका केली. पोलिसांनी यश दीपकराव बलोदे (२०, भट्टीपुरा, चांदुरबाजार, अमरावती), शुभम बलवंत मालखेडे (२२, भट्टीपुरा, चांदुरबाजार, अमरावती), संकेत विष्णू तितरमारे (२५, हिंगणा रोड), मनोज अरुण खंडारे (३६, इंदिरा माता नगर) व सागर मधुकर बिजवे (३१, अचलपूर, अमरावती) यांना अटक केली. तर त्यांचे साथीदार मनोज अग्रवाल व राहुल यांचा शोध सुरू आहे. आरोपी ग्राहकांकडून पैसे घेऊन तरुणींकडून देहव्यापार करवून घेत होते. आरोपींच्या ताब्यातून सहा मोबाइलसह १ लाखाचा मुद्देमाल जप्त करण्यात आला. आरोपींविरुद्ध एमआयडीसी पोलिस ठाण्यात गुन्हा दाखल करण्यात आला आहे. बलोदे व मालखेडे हे यश-२४ हे हॉटेल चालवितात. पोलिस निरीक्षक कविता ईसारकर, प्रकाश माथनकर, सचिन बडीये, शेषराव राऊत, अजय पौनिकर, आरती चव्हाण, अश्विन मांगे, समीर शेख, कुणाल मसराम, नितीन वासने, कमलेश क्षीरसागर व पूनम शेंडे यांच्या पथकाने ही कारवाई केली.

परराज्यातील मुलींना विमानाचे तिकीट

आरोपी अनेक दिवसांपासून वेश्याव्यवसायाचे रॅकेट चालवत होते. राहुल आणि गगन नावाच्या दलालांमार्फत ते परराज्यातून मुलींना वेश्याव्यवसायासाठी बोलवायचे. तरुणींना विमानाची तिकिटे द्यायचे आणि राहण्याची व जेवणाची व्यवस्था करायचे. संकेतस्थळाच्या माध्यमातून ते ग्राहकांशी संपर्क करायचे. तरुणींना प्रत्येक ग्राहकामागे अडीच ते तीन हजार रुपये देण्यात यायचे. उर्वरित रक्कम दलाल आणि आरोपी ठेवायचे. सुटका करण्यात आलेल्या तरुणी दिल्ली, पश्चिम बंगाल, उत्तर प्रदेश येथील आहेत. त्यांना काही दिवसांपूर्वी करारावर आणून वेगवेगळ्या वेगवेगळ्या हॉटेल मध्ये ठेवण्यात आले होते.