सह्याद्री चौफेर | वृत्तसंस्था
मारेगाव : मौजा नवरगाव येथील बंगाली डॉक्टर यास चार युवकांनी चाकू, बंदूकीचा धाक दाखवित लाखोंने लुटल्याची धक्कादायक घटना दि.१३ मार्च ला रात्री घडली. डॉ.पोभास रवींद्रनाथ हाजरा असे पिडीत डॉक्टराचे नाव आहे. ते प्रॅक्टिस करून मारेगाव कडे परतत असताना सदर प्रकार घडल्याचे असल्याचे समजते.
बंगाली डॉ.हाजरा यांचे मारेगाव स्थित तालुक्यातील नवरगाव येथे त्यांचा दवाखाना आहे. सोमवारला सायंकाळी मारेगाव कडे परत जात असताना त्यांची स्कुटी स्विफ्ट कार ने आलेल्या चौघांनी यवतमाळ राज्य महामार्गावर असलेल्या नायरा पेट्रोल पंपासमोर अडवून कार मध्ये बसविले.चाकू आणि रिव्हॉल्व्हरचा धाक दाखवित त्यांचेकडून नगदी चोवीस हजार, १५ हजार रु.ची सोन्याची अंगठी, ३० हजार रुपयांची सोन्याची चैन, मोबाईल ताब्यात घेत, त्या अज्ञात युवकांनी तब्बल पंचेविस लाखाची मागणी करीत अपहरण करून हत्या करण्याची धमकी दिली. अर्धा तास चाललेल्या या थरारीत कमालीच्या दहशतीत आलेल्या बंगाली डॉक्टर यांनी भितीपोटी तीन लाख रुपये देण्याचे कबुल करीत तशी व्यवस्था वणी येथील मित्राकडून करीत कार सरळ डॉक्टरसह ला वणी ला निघाली.
वणी येथे कार मधील एका युवकाने कार चा अर्धा काच उघडत मित्राकडून बोलाविलेले रोख तीन लाख रुपये ताब्यात घेत मारेगाव दिशेने निघाले. पण काही अंतरावर बंगाली डॉक्टर यांना सोडून कारसह युवक पसार झाले. दरम्यान, तीन लाख २४ हजार नगदी व इतर सोने व मोबाईल असा किमान तीन लाख ६९ हजार रुपये लूटल्याने मारेगाव तालुक्यात एकच खळबळ उडाली आहे.
या दोन तासाच्या लुटमारीची मारेगाव पोलिसात तक्रार दाखल करण्यात आली असून, अज्ञात इसमाविरोधात बळजबरीने अपहरण करून गंभीर दुखापत करणे, शस्र बाळगून जीवे मारण्याची धमकी देत लूटमार करणे, या आशयाच्या कलम ३९२, ३६३, ३६४ (अ), ३/२५, ४/२५ नुसार गुन्हा दाखल करण्यात आला.