सचिन पचारे शिवसेना मारेगांव संपर्क प्रमुख पदी नियुक्त

 

सह्याद्री चौफेर | ऑनलाईन

मारेगाव : युवा तडफदार, आक्रमक भुमिकेसाठी तालुक्यात परिचित असलेले, तसेच सर्वसामान्य जनतेच्या हक्कासाठी रस्त्यावर उतरून प्रश्न सोडवणारे सचिन पचारे यांना शिवसेना मारेगांव संपर्क प्रमुख पदी नियुक्त करण्यात आले आहे. त्यांची निवड शिवसेना पक्ष प्रमुख उद्धव ठाकरे यांच्या आदेशानुसार करण्यात आली. 

विशेष उल्लेखनीय की, पक्षाचा कार्यकर्ता असो किंवा सर्वसामान्य नागरिक असो, त्याच्या समस्येप्रसंगी हक्काने धावून जाणारा शिवसैनिक म्हणून त्यांनी आपल्या कामाचा वेगळा ठसा उमटविला आहे. नुकतेच त्यांनी घरकुल लाभार्थ्यांना दर्जेदार वाळू मिळावी यासाठी उपोषण केले होते.त्यांच्या मागणीला यशही मिळाले. अशा अनेकानेक त्यांच्या केलेल्या कामाची पोचपावती फळास आली असावी बोलल्या जातं.

श्री पचारे यांच्या नियुक्तीमुळे संघटनेच्या संपर्कात सुधारणा होईल आणि पक्ष अधिक वाढवता येईल, अशा भावना आगामी स्थानिक स्वराज्य संस्थांच्या निवडणूकीच्या अनुषंगाने त्यांच्या समर्थकातून व्यक्त होत आहे.

नवनिर्वाचित संपर्क प्रमुख सचिन पचारे यांचा सत्कार 

मंगळवार दि. 24 जून रोजी वणी येथील वसंत जिनींग सभागृहात शिवसेनेच्या वतीने नवनियुक्त पदाधिकाऱ्यांचा सत्कार सोहळा आयोजित करण्यात आला होता. नवनिर्वाचित संपर्क प्रमुख सचिन पचारे यांचा आमदार संजय देरकर यांनी सत्कार केला व पुढील वाटचालीस शुभेच्छा दिल्या. यासत्कार सोहळ्यात वणी मारेगाव झरी तालुक्यातील नव्या जबाबदाऱ्या स्वीकारलेल्या सर्व कार्यकर्त्याचे अभिनंदन करण्यात आले.

पुरुषोत्तम बुटे यांची शिवसेना मारेगाव तालुका प्रमुख पदी नियुक्ती

सह्याद्री चौफेर | ऑनलाईन

मारेगाव : शिवसेना पक्षप्रमुख उद्धव ठाकरे यांच्या आदेशाने यवतमाळ विभागातील शिवसेना पदाधिकाऱ्यांच्या नियुक्त्या जाहीर करण्यात आल्या आहेत. त्यात मारेगाव तालुक्यातील संघटनेत फेरबदल करण्यात आली अशी शिवसेना भवन येथून प्रसिद्धी पत्रकाद्वारे नियुक्त्यांची माहिती देण्यात आली.

यामध्ये शिवसेनेचे निष्ठावंत शिवसैनिक पुरुषोत्तम बुटे यांची मारेगाव तालुका प्रमुख पदी नियुक्ती करण्यात आली आहे. त्यांच्या या निवडीचे श्रेय ते विद्यमान आमदार संजयभाऊ देरकर यांना देत असून गेल्या तीस वर्षांपासून बुटे हे शिवसेना पक्षात इमाने इतबारे काम करतहेत. पक्षात किती आले आणि गेले. मात्र त्यांनी पक्षप्रमुख उद्धव ठाकरे यांची साथ सोडली नाही, ते आजही कायम सोबत राहून पक्षासाठी निष्ठेने प्रामाणिकपणे काम करत आहे. त्याचीच फलश्रुती म्हणून त्यांना मारेगाव तालुक्याची धुरा देण्यात आली आहे असं बोलल्या जातं. 

या निवडीबाबत त्यांचेवर अभिनंदनाचा वर्षाव होत असून पुढील वाटचालीस शुभेच्छा दिल्या जात आहे. तालुका प्रमुख श्री पुरुषोत्तम बुटे यांनी सर्व नवनिर्वाचित शिवसेनेचे पदाधिकारी, महिला पदाधिकारी, कार्यकर्ते व तसेच मित्र परिवारांचे आभार मानले. 

पुरुषोत्तम बुटे यांचे मारेगाव तालुका प्रमुख पदी नियुक्ती झाल्याबद्दल अभिनंदन करताना आ. संजय देरकर व पदाधिकारी 

बायोमेडिकल वेस्ट मॅनेजमेंट या विषयावर कार्यशाळा संपन्न

सह्याद्री चौफेर | ऑनलाईन

वणी : इंडियन मेडिकल असोसिएशन वणी व सुपर्ब हायजेनिक डिस्पोजल प्रायव्हेट लिमिटेड चंद्रपूर यांच्या संयुक्त विद्यमाने आज दिनांक 21 जून 2025 रोजी लोढा मल्टीस्पेशालिटी हॉस्पिटल वणी येथे विविध रुग्णालयातील आरोग्य सेवक व सेविका यांचे करिता बायोमेडिकल वेस्ट मॅनेजमेंट या विषयावर एक विशेष प्रशिक्षण कार्यशाळा आयोजित करण्यात आली होती. 

या कार्यशाळेत श्री.निशांत सोनटक्के व श्रीमती विथीका वैद्य यांनी बायोमेडिकल वेस्ट मॅनेजमेंट या विषयावर सर्वांना ईत्यंभुत माहिती दिली. तसेच उत्स्फूर्तपणे सर्वांना मार्गदर्शन दिले. या कार्यशाळेला आयएमएचे पदाधिकारी तसेच होमिओपॅथी असोसिएशन व आयुर्वेदिक असोसिएशन यांचे सर्व डॉक्टर मंडळी उपस्थित होते. आयोजित या कार्यशाळेला जवळपास 80 ते 90 स्टाफ नर्सेस हॉस्पिटल कर्मचारी व डॉक्टर्स प्रामुख्याने उपस्थित होते.सर्व उपस्थितांचे मनःपूर्वक आभार आयोजकांच्या वतीने माणण्यात आले. 

ही कार्यशाळा यशस्वी करण्यासाठी इंडियन मेडिकल असोसिएशन वणीचे डॉ. शिरीष कुमारभार, डॉ. सुनील जुमनाके, डॉ.संकेत अलोणे, डॉ. स्वप्नील गोहोकार यांसह असोसिएशनचे पदाधिकाऱ्यांनी मेहनत घेतली.

सगणापूर शाळेत नवागतांचे स्वागत...

सह्याद्री चौफेर | ऑनलाईन

मारेगाव : 23 जून रोजी शाळेचा पहिला दिवस असल्याने सर्वत्र विद्यार्थ्यांचे स्वागत होत असताना सगणापूर (ता. मारेगाव) येथील जिल्हा परिषदेच्या प्राथमिक शाळेत नवागतांचे मोठ्या उत्साहात स्वागत करण्यात आले. यावेळी शाळेच्या पहिल्या दिवशी विद्यार्थ्यांना शालेय पाठ्यपुस्तके, खाऊंचे वाटप करण्यात आले.दि. 23 जून 2025 ला सर्व शाळेतील विद्यार्थी यांचा शाळेचा प्रारंभ दिन चैतन्यमय आणि उत्साह वर्धक तयार होण्यासाठी नव्याने प्रवेशित होणा-या विद्यार्थ्यांना डॉ मनिष मस्की यांचे हस्ते पाठयपुस्तके वितरित करण्यात आले. 

यावेळी डॉ.मनीष तुळशीराम मस्की, शाळेचे मुख्याध्यापक गौरव चिकाटे, अनिल मडावी सर, सुजाता मेश्राम मॅडम,सौ. नेहा मनीष मस्की, तसेच गावातील प्रतिष्ठित नागरिक संतोष भाऊ मते, चि.भार्गव मनीष मस्की आणि शाळेतील विद्यार्थी व सर्व पालक उपस्थित होते.

शाळा प्रवेशोत्सव हा कार्यक्रम अतिशय छान उपक्रम

शाळेचा पहिला दिवस हा आनंददायी असतो. शाळेचे असे आनंददायी वातावरण पाहुण त्यावेळेच्या आठवणी जागी झाल्या, शाळा प्रवेशोत्सव हा कार्यक्रम अतिशय छान उपक्रम आहे.सगणापूर शाळेत हा कार्यक्रम आयोजित करण्यात आला आणि मला त्यामध्ये सहभागी होता आले याच मला आनंद वाटतो, असं "सह्याद्री चौफेर"शी बोलताना डॉ. मनीष मस्की म्हणाले.

नगरपरिषदेने रस्त्याच्या कडेला असलेल्या वृक्षावर चढवला बुलडोजर; पर्यावरणप्रेमींची तीव्र नाराजी

सह्याद्री चौफेर | ऑनलाईन

वणी : शहरातील नांदेपेरा मार्गावरील रस्ते रुंदीकरणाच्या कामाच्या पार्श्वभूमीवर वणी नगरपरिषदेकडून झाडांची बेकायदेशीर तोड करण्यात आल्याचा गंभीर आरोप पर्यावरणप्रेमींनी केला आहे. महाराष्ट्र (शहरी भागांतील) झाडांचे संरक्षण अधिनियम, 1975 अंतर्गत आवश्यक असलेल्या प्रक्रिया न पाळता ही झाडतोड करण्यात आल्याने नागरिकांमध्ये तीव्र संताप व्यक्त केला जात आहे.

या प्रकरणी उपविभागीय अधिकारी , वणी यांच्याकडे तात्काळ चौकशी व कारवाईची मागणी करणारे निवेदन देण्यात आले आहे. निवेदनात नमूद केल्याप्रमाणे, झाडतोडीपूर्वी 'झाड संरक्षण समिती'कडून कोणतीही परवानगी घेण्यात आलेली नाही, तसेच परिसरात कोणतीही सार्वजनिक सूचना न प्रसिद्ध करता ही कृती गुपचूप करण्यात आली आहे.

याशिवाय, नागरिकांच्या हरकती व सूचनांसाठी कोणताही खुला कालावधी न देता, पर्यायी वृक्षलागवडीचा आराखडा न सादर करता केलेली झाडतोड ही कायद्याचे उल्लंघन असून पर्यावरणीय समतोल धोक्यात आणणारी आहे, असे पर्यावरण कार्यकर्त्यांचे म्हणणे आहे.

या पार्श्वभूमीवर, भविष्यात अशा बेकायदेशीर कारवायांना आळा बसावा यासाठी सर्व स्थानिक स्वराज्य संस्थांना स्पष्ट मार्गदर्शक सूचना देण्यात याव्यात व निर्णय प्रक्रियेत नागरिकांचा सक्रिय सहभाग सुनिश्चित करण्यात यावा, अशीही मागणी करण्यात आली आहे.

रस्त्याला कोणाचाही विरोध नाही

वणी नांदेपेरा या मार्ग नव्याने बांधल्या जात आहे. या रस्ता बांधकामाला कोणत्याही नागरिकांचा विरोध नाही. वृक्ष तोड न करता राज्यातील अनेक शहरामध्ये रस्ता बांधकाम केले आहे. तसेच जे वृक्ष आज हिरवीगार छाया देत आहे. ते वृक्ष शहरातील वृक्ष संवर्धन समितीने मोठ्या परिश्रमाने लागवड करून त्याचे संगोपन केले आहे. आज या वृक्षाची स्थिती जे आहे त्यासाठी मागील १५ ते २० वर्षाचे कष्ट आहे. ते वृक्ष असे विकासाच्या नावाखाली तोड करीत असेल आणि पर्यावरणाचा ऱ्हास करीत असेल तर हे खपवून घेतल्या जाणार नाही. काही लोक रस्त्याला विरोध म्हणून अफवा पसरवत आहे अश्या संधिसाधू लोकांपासून नागरिकांनी सावधान रहावे असे आवाहन सागर मुने यांनी केले आहे. निवेदन देतांना अभिषेक जगताप, अशोक राऊत, प्रज्योत ताकसंडे, पंकज कोल्हे व नागरिक उपस्थित होते

दिवंगत राजकुमार जयस्वाल यांच्या निवास्थानाला पंडित प्रदीप मिश्रा यांची भेट

सह्याद्री चौफेर | ऑनलाईन

वणी : केदारनाथ जवळील गौरीकुंड येथे झालेल्या हेलिकॉप्टर क्रॅश दुर्घटनेत सात लोकांचा मृत्यू झाला होता. यात वणी येथील जयस्वाल परिवाराचाही समावेश होता. राजा जयस्वाल, श्रद्धा राजा जयस्वाल आणि त्यांची दोन वर्षाची मुलगी काशी हिचा करून अंत झाला होता. सात भाविकांच्या मृत्यू ची घटना अत्यंत दुर्दैवी आणि वेदनादायी होती. राजा जयस्वाल यांनी मागील वर्षी प्रथमच वणी येथे शिव पुराण कथेचे पंडित प्रदीप मिश्रा यांच्या उपस्थितीत आयोजन केले होते. जयस्वाल दांपत्याचा या हेलिकॉप्टर दुर्घटनामध्ये अपघात झाला, अशी बातमी कळल्यानंतर त्यांनी काल सोमवारी सायंकाळी जयस्वाल परिवाराची सांत्वनपर भेट घेऊन श्रद्धांजली वाहिली. यावेळी त्यांना अश्रू अनावर झाले, या दुःखद क्षणी ते क्षणभर निशब्द झाले. आम्ही शिवभक्त गमावल्यामुळे अशा कठीण परिस्थितीतून जयस्वाल परिवार जात असताना पंडित यांनी मृतकांच्या आत्म्यास शांती लाभावी अशी जड अंतःकरणाने प्रार्थना केली. यावेळी जयस्वाल मित्र परिवार आणि शहरातील इतर मान्यवर उपस्थित होती.

शाळेच्या पहिल्याच दिवशी गणवेश व पाठ्यपुस्तके वाटप

सह्याद्री चौफेर | ऑनलाईन

मारेगाव : शैक्षणिक सत्र 2025-26 आज सोमवार 23 जून पासून सुरु झालेले आहे. शाळेच्या पहिल्या दिवशी गणवेश वाटप हा विद्यार्थ्यांसाठी एक महत्वाचा दिवस असतो. शासनाच्या वतीने पहिली ते आठवीच्या विद्यार्थ्यांना मोफत गणवेश दिला जातो. 

कोसारा येथील जिल्हा परिषद शाळेच्या वतीने शाळेचा पहिला दिवस म्हणून नवगताचे उत्सहात स्वागत केले व पहिल्याच दिवशी विद्यार्थ्यांना गणवेश व पाठयपुस्तके, बुक वाटप केले आहे. 

यावेळी शाळा सुधारक समिती अध्यक्ष सुभाष दादाजी खडसे, उपाध्यक्ष निलिमाताई दिनकर, कोसारा ग्रामपंचायत सरपंचा छायाताई खाडे, मुख्याध्यापिका बाभळे मॅडम, वेनू शाम, बाभळे सर, उपस्थित होते. 

आज शाळेच्या प्रथमदिनी गणवेश व पाठयपुस्तके मिळाल्यानंतर विद्यार्थ्यांमध्ये एक वेगळाच आनंद पहायला मिळत होता. विद्यार्थ्यांना गणवेश मिळाला की त्यांचा शाळेत येण्याचा उत्साह वाढतो,अशा प्रतिक्रिया उपस्थित मान्यवरांनी या प्रसंगी व्यक्त केल्या.

दरम्यान शाळेची रंगरंगोटी व विविध रंगबिरंगी फुग्यांची सजावट ही आकर्षणाच्या केंद्रस्थानी होती.