डिजल भरण्याकरिता रस्त्यावर उभी राहणारी वाहने देत आहे अपघाताला निमंत्रण

सह्याद्री न्यूज | प्रशांत चंदनखेडे 

वणी : डिजल भरण्याकरिता ट्रकांची लागत असलेली लांबचलांब रांग व पेट्रोलपंप जवळ अगदी रोडवर तासंतास उभी रहात असलेली वाहने रहदारीला अडथळा निर्माण करू लागली असून या वाहनांमुळे आसपासच्या परिसराकडे जाणारे मार्ग बंद होत असतांना देखील पेट्रोलपंप धारक हेतुपुररस्सरपणे याकडे दुर्लक्ष करित असल्याचे पहायला मिळत आहे. जाणीवपूर्वक पेट्रोलपंपाच्या बाजूला अगदी रस्त्यावर वाहने उभी राहू दिली जात असल्याने याठिकाणी नेहमी वाहनांचा जाम लागत असतो. रस्त्यावर तासंतास उभी रहात असलेली वाहने, मुख्य मार्गावर लागणारी लांबचलांब रांग व डिजेल भरल्यानंतर विरुद्ध दिशेने सुसाट निघणारी वाहने यामुळे या पट्रोलपंपाजवळ नेहमी अपघाताची शक्यता बळावलेली असते. या पेट्रोलपंपाजवळ कित्येक छोटेमोठे अपघातही झाले आहेत. याठिकाणी भविष्यात मोठा अपघात होण्याची शक्यता नाकारता येत नाही.

या पेट्रोलपंपा जवळ वाहनांचा रहाणारा जमावडा वाहतूक कोंडीचे कारण बनत असतांना देखिल वाहतूक विभाग कोणतीही कार्यवाही करतांना दिसत नाही. डिजल भरण्याकरिता वाहनांच्या लागत असलेल्या रांगेमुळे रस्ते जाम होत असल्याने आसपासच्या परिसरातील नागरिकांच्या पेट्रोलपंप व्यवस्थापकाशी नेहमी शाब्दिक चकमकी उडत असतात. पण नागरिकांशी हुज्जत घालण्यातच व्यवस्थापक धन्यता मानत असून वाहनांना शिस्त लावण्याकडे मात्र त्याची बोबडी वळताना दिसत नाही. जाण्यायेण्याचा मार्ग मोकळा ठेवण्यास सांगणाऱ्या नागरिकांनाच या व्यवस्थापकाकडून सज्जड दम दिला जातो. असा हा रस्ता घेरून वाहनांत डिजल भरण्याचा मनमानी कारभार सुरु असतांना देखिल कुणीही याकडे लक्ष द्यायला तयार नाही. हितसंबधामुळे ऋणानुबंध जोपासले जात असल्याने तक्रारी करणाऱ्या नागरिकांचा मात्र ना ईलाज होतांना दिसत आहे. वणी घुग्गुस मार्गावरील या पेट्रोलपंपाजवळ उभी रहात असलेली वाहने आता सर्वांसाठीच त्रासदायक ठरू लागली आहे. डिजल भरणाऱ्या वाहनांमुळे वाहतुकीला अडथळे व परिसरातील नागरिकांना अडचणी निर्माण होणार नाही याची या पेट्रोलपंप धारकाने दक्षता घेण्याची मागणी नागरिकांमधून होत आहे. 

या पेट्रोलपंपवर सोई सुविधांचाही अभाव दिसून येतो. पेट्रोल डिजल भरणाऱ्या ग्राहकांकरिता पिण्याची उत्तम व्यवस्था नाही. टॉयलेटचीही व्यवस्था बरोबर नाही. कॅबिनला लागून एक छोटंसं टॉयलेट आहे. स्त्री पुरुषांकरिता एकचं टॉयलेट असल्याने कुणी या टॉयलेटचा फारसा वापर करतांना दिसत नाही. एक तर हे टॉयलेटआहे की, कॅबिन हेच कळत नाही. मुख्य रस्त्यालगत अगदीच कमी जागेत हे पेट्रोलपंप असल्याने डिजल भरण्याकरिता येणारी वाहने रस्त्यावरच रांग लावून उभी असतात. दुचाकी व चार चाकी वाहनांमध्ये हवा भरण्याची मशीनही पेट्रोलपंपवर उपलब्ध नाही. त्यामुळे गाड्यांमध्ये हवा भरतांना नागरिकांच्या खिशाला कात्री लागत आहे. अनियमितता व असुविधेमुळे हा पेट्रोलपंप नेहमी चर्चेचे कारण ठरला आहे. संबंधित अधिकाऱ्यांनी याकडे लक्ष देण्याची मागणी नागरिकांमधून होत आहे.