सह्याद्री चौफेर | ऑनलाईन
वणी : यवतमाळ जिल्हा मध्यवर्ती सहकारी बँकेच्या निवडणुकीसाठी उमेदवारी अर्ज मागे घेण्याची प्रक्रिया पूर्ण झाल्यानंतर आता निवडणुकीचे चित्र स्पष्ट झाले आहे. वणी विधानसभा क्षेत्राशी संबंधित वणी आणि मारेगाव तालुका गटातही निवडणुकीची चुरस कायम असून, माघारीनंतर दोन्ही गटांतील राजकीय समीकरणे स्पष्ट झाली आहेत.
जिल्हा बँकेच्या २३ जागांसाठी तब्बल १२३ उमेदवार निवडणूक रिंगणात आहेत. त्यामुळे जिल्हा बँकेच्या सत्तेच्या दृष्टीने प्रत्येक तालुका गटातील लढतीला महत्त्व प्राप्त झाले आहे.
वणी तालुका गटात तिरंगी लढत
वणी तालुका गटात टिकाराम कोंगरे, दीपक मत्ते आणि सुनील कातकडे यांचे उमेदवारी अर्ज कायम राहिले आहेत. त्यामुळे या गटात तिरंगी लढतीचे चित्र निर्माण झाले आहे.
उमेदवारी अर्ज मागे घेण्याच्या अंतिम टप्प्यानंतर या गटातील संभाव्य समीकरणे अधिक स्पष्ट झाली असून, आता मतदारांचा कौल कोणाच्या बाजूने जातो, याकडे सहकार क्षेत्राचे लक्ष लागले आहे.
मारेगाव तालुका गटात दोन उमेदवार
मारेगाव तालुका गटात किरण देरकर आणि सारंग ठाकरे हे दोन उमेदवार रिंगणात आहेत. या गटात काँग्रेसच्या अरुणाताई खंडाळकर यांनी माघार घेतल्याने लढतीचे चित्र बदलले असून आता दोन उमेदवारांमध्ये थेट सामना होणार आहे.मात्र, महिला राखीव जिल्हा गटात त्या कायम आहे.
वणी विधानसभा क्षेत्रातील सहकार निवडणुकीकडे लक्ष
वणी आणि मारेगाव या दोन्ही तालुका गटांतील उमेदवार निश्चित झाल्याने जिल्हा बँक निवडणुकीच्या निमित्ताने स्थानिक राजकारणातील हालचालींनाही वेग आला आहे. विविध राजकीय प्रवाहांतील उमेदवार आमनेसामने असल्याने या दोन्ही गटांतील निकालाकडे स्थानिक राजकीय वर्तुळासह सहकार क्षेत्राचे विशेष लक्ष राहणार आहे.
माघारीनंतर आता प्रचाराला वेग येणार असून, मतदारांचा अंतिम कौल कोणाच्या बाजूने जातो आणि त्यातून जिल्हा बँकेच्या सत्तेच्या समीकरणावर काय परिणाम होतो, याची उत्सुकता निर्माण झाली आहे.