सह्याद्री चौफेर | ऑनलाईन
मारेगाव : महाराष्ट्राचे मुख्यमंत्री मा. देवेंद्र फडणवीस यांच्या वाढदिवसानिमित्त भारतीय जनता पार्टी, मारेगावच्या वतीने बुधवार, दि. २२ जुलै २०२६ रोजी शेतकरी सुविधा हॉल, मारेगाव येथे भव्य रक्तदान शिबिराचे आयोजन करण्यात आले. सकाळी १० ते दुपारी ३ वाजेपर्यंत पार पडलेल्या या शिबिरात ६५ रक्तदात्यांनी रक्तदान करून सामाजिक बांधिलकी जपली.
या रक्तदान शिबिराचे आयोजन भाजपा मारेगाव तालुकाध्यक्ष श्री. अविनाशराव लांबट यांच्या नेतृत्वात करण्यात आले. कार्यक्रमाला वणी विधानसभा क्षेत्राचे माजी आमदार संजीव रेड्डी बोदकूरवार यांनी प्रमुख उपस्थिती लावून रक्तदात्यांचे कौतुक केले तसेच समाजहितासाठी अशा उपक्रमांचे महत्त्व अधोरेखित केले.
शिबिरासाठी १०० रक्ताच्या बाटल्यांचे उद्दिष्ट ठेवण्यात आले होते. मात्र, दिवसभर सुरू असलेल्या मुसळधार पावसामुळे अपेक्षित संख्येने रक्तदाते उपस्थित राहू शकले नाहीत. तरीही प्रतिकूल परिस्थितीत ६५ जणांनी स्वयंस्फूर्तीने रक्तदान करून गरजू रुग्णांसाठी जीवनदायी ठरणारे योगदान दिले.
शिबिरात सहभागी झालेल्या सर्व रक्तदात्यांचा प्रमाणपत्र व विशेष भेटवस्तू देऊन सन्मान करण्यात आला. या उपक्रमामुळे रक्तदात्यांचा उत्साह अधिक वाढला असून भविष्यातही अशा सामाजिक कार्यात सहभागी होण्याचा संदेश देण्यात आला.
यावेळी भाजपा पदाधिकारी, कार्यकर्ते, नागरिक तसेच युवा वर्ग मोठ्या संख्येने उपस्थित होता. आयोजकांनी रक्तदानासाठी पुढाकार घेतलेल्या सर्व रक्तदात्यांचे, वैद्यकीय पथकाचे तसेच कार्यक्रमाच्या यशस्वी आयोजनासाठी सहकार्य करणाऱ्या सर्वांचे आभार मानले.
"रक्तदान हेच श्रेष्ठ दान" या संदेशाला साजेसा हा सामाजिक उपक्रम मारेगावात समाजसेवेच्या भावनेतून उत्साहात पार पडला.