काव्याचा दुर्देवी अंत : साखरझोपेत छकुलीला सापाचा दंश

सह्याद्री चौफेर | वृत्तसंस्था 

मारेगाव : मोरगाव तालुक्यातील टाकळी (कुंभा) येथील चौदा महिन्यांच्या चिमुकलीचा सर्पदंशाने मृत्यु झाल्याची घटना सोमवारी २९ एप्रिल रोजी रात्री दरम्यान घडली. मृत चिमुकलीचे नाव काव्या वैभव खेवले (वय १४ महिने) आहे.

तालुक्यातील टाकळी येथील निवासी आई पल्लवी व अवघ्या १४ महिन्याची आईच्या कुशीत झोपलेल्या काव्या ही खाली  निद्राव्यस्थेत होती. अशातच मध्यरात्री दोन वाजताचे सुमारास लांब लचक मन्यार जातीचा साप त्यांच्या अंथरुणात शिरला व काव्याच्या हळूच पायाला चावा घेतला. दंश करताच छकुली काव्या रडायला लागली. रडण्याचा आवाज येताच आईला जाग आली अन शेजारी विषारी साप निदर्शनास आला. दरम्यान आरडाओरड करताच शेजारील काहींनी तो साप पकडला. 

काव्याला लगेचच मारेगाव येथील ग्रामीण रुग्णालयात दाखल करण्यात आले. मात्र, येथे ठोस उपचारपद्धती नसल्याने पुढील उपचारार्थ चंद्रपूर येथे हलवित असतांना काव्याचा सकाळी सहा वाजता दुर्देवी अंत झाला. या हृदयद्रावक घटनेने सर्वत्र हळहळ व्यक्त होत आहे.