मारेगाव: रोजगार सेवक संघटना आंदोलनाच्या पवित्र्यात

सह्याद्री चौफेर | कुमार अमोल 

मारेगाव : येथील रोजगार सेवकांना संतापजनक वागणूक देणाऱ्या महात्मा गांधी रोजगार हमी योजनेच्या ऑपरेटरला ताबडतोब हटविण्यात यावे, अशा आशयाचे निवेदनसह तक्रार अर्जातुन मागणी गटविकास अधिकारी यांना करण्यात आली. त्यास तात्काळ हटविण्यात आलं नाही तर, आंदोलन करण्यात येईल, असा इशारा रोजगार सेवक संघटना तालुका शाखा मारेगावच्या वतीने देण्यात आला आहे.

यावेळी तक्रार अर्जावर संघटनेचे अध्यक्ष खुशाल येरगुडे, सचिव भगवान धाबेकर, उपाध्यक्ष प्रशांत सपाट, सहसचिव गणपत मडावी, संतोष कोंडेकर, अनिल कुमरे, रमेश सिडाम, महादेव गुरुनुले, शैलेश पेंदोर, नारायण सुसराम, विवेक नरवाडे, स्वप्नील ठावरी, गणेश कालेकर, आशिष किनाके, नितेश काटकर, मनोज दडांजे, संदीप जिवने, वामन डोंगे, आशिष भोयर, गणेश कुळमेथे, सिद्धार्थ खैरे, शेषराव देवाळकर, अमित खिरटकर, गजानन बोधे, प्रमोद जुमनाके, संतोष बल्की, इत्यादीच्या सह्या आहेत.

रोजगार हमीची ऑनलाईन कामे करण्यासाठी पंचायत समिती स्तरावर ऑपरेट करण्यासाठी ऑपरेटर देण्यात आले असताना गेल्या काही दिवसांपासून या योजनेला कंत्राटी पद्धतीचे ग्रहण लागले असून, रोजगार सेवकांच्या अमंलबजावणीला या ऑपरेटरकडून केराची टोपली दाखविल्या जात असल्याची तक्रार आहे. येथील ऑपरेटर कंत्रांटदाराच्या दावणीला बांधला गेला असल्यामुळे स्थानिक विकास कामात मोठा पेच निर्माण झाल्याची ओरड आहे.

रोजगार सेवकांकडून स्थानिक कामे करून घेण्यासाठी ऑपरेटर चे हात ओले होत नसल्याने त्यांची कामे प्रलंबीत ठेवली जात असून चिरीमिरी देणाऱ्या ठेकेदारांची कामे तातडीने केली जाते असा आरोप तक्रारीतुन करण्यात आला आहे. ग्रामसभेने सुचविलेल्या विकास कामाची अमंलबजावणी करण्यासाठी पंचायत समितीच्या ऑपरेटरची महत्वपूर्ण जबाबदारी आहे. यामध्ये ऑनलाईन मस्टर काढणे, मजुरी अदा करणे, ऑनलाईन मंजुरात घेणे इत्यादी कामाचा समावेश आहे. मात्र, रोजगार सेवकांनी सादर केलेल्या मागणीच्या प्रस्तावाकडे दुर्लक्ष करून ठेकेदारांनी सादर केलेल्या प्रस्तावाची दखल येथील रोजगार हमी ऑपरेटर  कडून घेतली न जात असल्याने त्यांना तात्काळ या टेबलवरून 15 दिवसाचे आत हटविण्यात यावे, अन्यथा तीव्र आंदोलन करण्यात येईल असा इशारा दिलेल्या मागणी अर्जातून देण्यात आला आहे.