सह्याद्री चौफेर | ऑनलाईन
वणी : आगामी वणी नगरपरिषद निवडणुकीसाठी शिवसेना (शिंदे गट) आता स्वबळावर लढण्यास सज्ज झाली आहे. राज्याचे उपमुख्यमंत्री आणि पक्षप्रमुख मा. एकनाथ शिंदे यांनी “जिथे युती शक्य आहे तिथे करा, अन्यथा स्वबळावर लढा” अशा सूचनांनंतर पक्षाने वणीतील रणधुमाळीसाठी कंबर कसली आहे. या पार्श्वभूमीवर शिवसेनेचे वणी-आर्णी-चंद्रपूर लोकसभा समन्वयक विश्वास नांदेकर आणि शहर नेते विजय चोरडिया यांनी अधिकृत निवेदन जारी करून निवडणुकीची दिशा स्पष्ट केली आहे.
भाजपने स्थानिक पातळीवर शिवसेनेला विश्वासात न घेता निवडणूक तयारी सुरू केल्याने शिवसेनेने सर्व कार्यकर्त्यांना न्याय देण्यासाठी व वणीकर जनतेच्या प्रतिसादाच्या जोरावर स्वबळावर निवडणुकीचा निर्णय घेतल्याचे नांदेकर आणि चोरडिया यांनी स्पष्ट केले. त्यांनी सांगितले की, शहरातील विकास आणि जनतेच्या अपेक्षा पूर्ण करण्यासाठी शिवसेना सज्ज आहे.
शिवसेना (शिंदे गट) आता सर्व १४ प्रभागांचा सखोल आढावा घेऊन नगराध्यक्ष पदासह सर्व २९ जागांसाठी उमेदवार उभे करण्याच्या तयारीत आहे. निवडणूक लढविण्यास इच्छुक कार्यकर्त्यांनी पक्ष कार्यालयात भेट द्यावी, असे आवाहन विश्वास नांदेकर आणि विजय चोरडिया यांनी केले असून, वणी शहरात आता शिवसेनेच्या रणशिंगाचा नाद जोरात घुमू लागला आहे.