धक्कादायक... नदीत उडी घेत असल्याचे कॅमेऱ्यात युवती झाली कैद; पटाळा पुलावरील प्रकार

सह्याद्री चौफेर | वृत्तसंस्था 

मारेगाव : येथील प्रभाग क्रमांक 5, घरकुल कॉलनी मध्ये राहणाऱ्या एका 28 वर्षीय युवतीने वर्धा नदीत उडी घेत असल्याची धक्कादायक प्रकार कॅमेऱ्यात कैद झाली. या प्रकाराने तालुका हादरला आहे.

माधुरी खैरे (ता.मारेगाव) असे नदीत उडी घेतलेल्या युवतीचे नाव आहे. तीचे डी फार्म पर्यंत शिक्षण झाले असून वडीलअरुण खैरे यांचे दहा वर्षांपूर्वी निधन झाले. तर जि. प. शाळेच्या शिक्षिका उषाताई खैरे ह्या मागील मार्च मध्ये केरकचरा जाळतांना पन्नास टक्के भाजल्या. दिड महिन्याच्या दीर्घ उपचारांनंतर त्यांचेही निधन झाले होते. 

काल शुक्रवारी सकाळी 10 वाजता वणी कॉलेज ला जात असल्याची भावाला सूचना करीत ही युवती वणीहून ऑटोरिक्षात बसून वरोरा मार्गे निघाली. दुपारी 12.30 वाजताचे सुमारास पाटाळा वर्धा नदी जवळ माधुरी हिने स्टॉप घेतला. काही वेळात माजरी येथील एक दाम्पत्य 'त्या' ठिकाणी थांबले असता त्यांना मोबाईल, पर्स व चप्पल निदर्शनास आली. यावेळी माधुरी हिच्या मोबाईलवर कॉल आला असतांना घटनास्थळवरील हकीकत नातेवाईकांना विषद केली. आणि नातेवाईकांनी त्या ठिकाणी धाव घेत सिसिटीव्ही फुटेज तपासाअंती माधुरी ही वर्धा नदीत उडी घेत असल्याचे स्पष्ट झाले. 

भाऊ यश खैरे याने वणी पोलीस प्रशासनात फिर्याद दाखल केली आहे. आई-वडील नसतांना आता बहिणीच्या टोकाच्या निर्णयाने एकुलता एक मुलगा एकाकी पडला आहे.