मानव जन्म का लाभला
याचा विचार करू या
माणुसकीचे खरे नाते
हृदयी आपण भरू या
एक ध्येय साऱ्यांचे
असोत अनेक मार्ग
दूर व्हावे विकार अन्
लाभो सदा सन्मार्ग
काळ पाठी लागला
वेळ ही दवडत आहे
कधी करशील सत्कर्म वेड्या
दुर्गुण का निवडत आहे
प्रत्येक अंधारलेल्या वाटेवर
ज्ञानाचा प्रकाश पडावा
अनुभवातून भेद कळावे
सत्याचा संग घडावा
कर्तव्याला प्राधान्य देऊन
कर्माची जोड मिळावी
अधर्मतेचा नाश करण्या
धर्माची परिभाषा कळावी
आज पुन्हा एकदा नव्याने
अंतरी सद्भाव भरुया
सारे मिळून एकत्व जपूया
देशाचा विचार करू या
