सह्याद्री न्यूज नेटवर्क |
यवतमाळ, (३० ऑगस्ट) : स्थानिक स्वराज्य संस्थांच्या निवडणुकांना लक्षात घेत काँग्रेस रणनीती आखायला सुरुवात केली आहे. त्यातूनच महाराष्ट्र राज्य प्रदेश काँग्रेस कमिटीची कार्यकारिणी नुकतीच जाहीर करण्यात आली. त्यात वणीचे माजी आमदार वामनराव कासावार व वसंत जिनींग चे अध्यक्ष देविदास काळे यांची वर्णी लागली आहे.वामनराव कासावार यांची प्रदेश कार्यकारिणीत सरचिटणीस म्हणून निवड झाली, तर देविदास काळे यांची उपाध्यक्ष पदी निवड झाली. कासावार यांनी वणी विधानसभेचे चार वेळा नेतृत्व केले असून, विधानसभा क्षेत्रात त्यांचा मोठा जनसंपर्क आहे, तसेच यापूर्वी काँग्रेसच्या जिल्हाध्यक्षपदाची ही धुरा त्यांनी यशस्वीरित्या सांभाळली होती. याच कार्याची दखल घेऊन त्यांचा प्रदेश कार्यकारिणीत समावेश केला आहे. तसेच देविदास काळे यांनी ही वसंत जिनींगच्या अध्यक्ष पदाची धुरा सांभाळताच कायापालट केला. त्यामुळे त्यांची उपाध्यक्षपदी निवड करण्यात आली आहे.
या नियुक्तीमुळे काँग्रेस पदाधिकारी व कार्यकर्त्यामध्ये उत्साह दिसून येत आहे.