सह्याद्री न्यूज नेटवर्क |
महागांव, (ता. २६) : महागांव पोलिस ठाण्याच्या हद्दीतील महागांव शहरामध्ये मागील अनेक दिवसापासून प्रतिबंधित गुटख्याची साठवणूक करुन लगतच्या खेडेगावात विक्री करण्याचा गोरखधंदा राजरोसपणे सुरु होता. मंगळवारी (ता. २२) रोजी मिळालेल्या गोपनीय माहितीवरुन सहायक पोलिस निरीक्षक प्रताप भोस व त्यांच्या कर्मचाऱ्यांनी शहरातील संशयित आरोपी आकाश विठ्ठल बेलखेडे वय २४ वर्षे रा.महागांव यांच्या राहत्या घरी छापा टाकला असता
एका प्लॅस्टीक बॅगेमध्ये क्रेज तंबाखु जर्दाचे १२० पॉकेट किंमत अंदाजे १८० रूपये प्रमाणे २१ हजार ६०० रुपये, विमल १२ पॉकेट किंमत १९८ रूपये
प्रमाणे २ हजार ३७६ रूपये, व्ही - १ तंबाखु ५४ पॉकेट किंमत ३० रूपये प्रमाणे १ हजार ६२० रूपये, एन ०५ प्रिमीयम जाफरानी तंबाखु २३ पॉकेट किंमत ७० रूपये प्रमाणे १ हजार ६१० रुपये, एस आर - १ तंबाखु ३५ पॉकेट किंमत ६० रूपये प्रमाणे २ हजार १०० रूपये असा एकुण २९ हजार ३०६ रूपयांचा किंमतीचा वेगवेगळ्या कंपनीचा प्रतिबंधित गुटखा आढळला. पोलिसांनी तो गुटखा जप्त करुन (ता. २३) रोजी अन्न व औषध विभागीय अधिकाऱ्यांच्या मार्गदर्शनात पंचनामा होऊन गुन्हा दाखल करण्यात आला आहे. तालुक्यातील महागांव व फुलसावंगी ही व्यापारी केंद्र प्रामुख्याने गुटखा व्यवसायासाठी प्रसिद्धी आहेत. तेलंगणा राज्याच्या सीमावर्ती भागात आर्णी येथून गुटख्याचा गड राखला जातो हे सर्वश्रुत आहे. आर्णी येथील काही प्रतिष्ठित मंडळींनी गुटखा व्यवसाय मजबूत केल्याने या बेकायदेशीर व्यवसायाला सुगीचे दिवस आले आहेत. शासनाने प्रतिबंधित केलेले व शरीरास अपायकारक असलेला गुटखा व पानमसाला साठवणूक केलेला गुटखा महागांव शहरात मिळून आल्यामुळे गुटख्याचे मालक महागांव येथील संशयित आरोपी आकाश विठ्ठल बेलखेडे यांच्याविरुद्ध (ता. २३) रोजी अन्न व सुरक्षा अधिकारी गोपाल माहोरे यवतमाळ यांच्या फिर्यादीवरुन गुन्हा नोंद करण्यात आला आहे. प्रकरणाचा पुढील तपास पोलिस निरीक्षक विलास चव्हाण यांच्या मार्गदर्शनाखाली सहाय्यक पोलीस निरीक्षक प्रताप भोस, चालक प्रविण इंगोले, रायटर नारायन पवार, जमादार विनोद जाधव, पोलिस अमंलदार संतोष जाधव करीत आहे. पोलिसाच्या या कारवाईमुळे प्रतिबंधित गुटखा व्यवसायिकामध्ये अस्वस्थता निर्माण झाली असून व्हाईट कॉलर गुटखा व्यवसायिकांनी चार दिवस मैदान सोडून जाण्याचा पवित्रा घेतल्याची माहिती मिळाली आहे. तालुक्याच्या केंद्रस्थानी महागांव येथील गुटखा माफियांच्या सराईत टोळीमधील केवळ एक बडा मासा हाताला लागला आहे. या चौकडीतील इतर पार्टनर अजून तरी मोकळेच आहे.