सह्याद्री चौफेर | वृत्तसंस्था
वणी : बुद्धीबळ हा प्राचिन आणि अस्सल भारतीय खेळ आहे. बुद्धीबळ एकाग्रता, सर्जनशीलता, आत्मविश्वास वाढवण्यास मदत करते. दबावात देखील शांतपणे नियोजन करणे आणि निर्णय घेणे हे बुद्धीबळ शिकवते. असे प्रतिपादन रंगनाथ स्वामी अर्बन निधी लिमीटेड,चे अध्यक्ष संजय खाडे यांनी केले. ते विदर्भस्तरीय बुद्धीबळ 2023 या स्पर्धेचे उद्घाटन प्रसंगी बोलत होते.
मानवी जीवनात बळासोबत बुद्धीला देखील तेवढेच महत्त्व दिले आहे. मैदानी खेळ बळ वाढवते तर बुद्धीबळ हे मानसिक स्वास्थ उत्तम ठेवतं. कोणत्याही वयाचा मनुष्य हा खेळ खेळू शकतो. त्यामुळे बुद्धीबळ सारख्या खेळांना प्रोत्साहन मिळणे गरजेचे आहे असेही ते म्हणाले.
रविवारी येथील शेतकरी मंदिरात सकाळी 10 वाजता मास्टर चेस अकादमी, वणी द्वारे विदर्भस्तरीय बुद्धीबळ 2023 स्पर्धेचे आयोजन करण्यात आले होतं, या स्पर्धेचे उद्घाटन संजय खाडे यांच्या हस्ते करण्यात आले.
यावेळी बोलताना श्री. खाडे म्हणाले की, वणीत विदर्भस्तरीय स्पर्धा होणे ही एक अभिमानाची बाब आहे. कार्यक्रमाचे अध्यक्ष पुरुषोत्तम आवारी, वासेकर, राजेंद्र कोरडे, अशोक नागभीडकर, रामदास कांबळे, महादेव सोनटक्के, भास्कर ढवस यांची प्रमुख पाहुणे म्हणून उपस्थिती होती.
विदर्भस्तरीय बुद्धीबळ स्पर्धा 2023 ही खुल्या गटात होत आहे. या स्पर्धेतील सर्वात वयोवृद्ध स्पर्धक हा 85 वर्षाचा असून सर्वात लहान स्पर्धक हा अवघ्या 5 वर्षांचा आहे. या स्पर्धेत विदर्भातील संपूर्ण जिल्ह्यातील एकूण 190 स्पर्धक सहभागी झाले आहे. 8 राउंड मध्ये ही स्पर्धा होणार असून आंतरराष्ट्रीय नियम या स्पर्धेला लागू राहणार आहे.
कार्यक्रमाचे प्रास्ताविक जगदीश ठावरी यांनी केले, तर संचालन संतोष बेलेकर यांनी केले. मास्टर चेस अकाडमीचे संचालक मारोती कांडागुर्ले यांच्या पुढाकारातून ही स्पर्धा आयोजित करण्यात आली असून स्पर्धेच्या यशस्वीतेसाठी अकाडमीची टीम परिश्रम घेत आहे.