सह्याद्री चौफेर | ऑनलाईन
मारेगाव : येथील नगरपंचायतने नुकतीच २१ टक्के कर दरवाढ लागू केल्याच्या निषेधार्थ मारेगाव येथील बदकी भवन येथे व्यापारी संघटनेच्या वतीने सर्वपक्षीय बैठकीचे आयोजन करण्यात आले. या बैठकीस नगरपंचायतचे नगराध्यक्ष डॉ. मनीष मस्की, नगरसेवक, तसेच मारेगावचे ज्येष्ठ नेते गजानन भाऊ किन्हेकर उपस्थित होते.
बैठकीत व्यापारी संघटनेचे अध्यक्ष संदीप खुराणा, सचिव दुष्यंत जयस्वाल, युनूस बॉम्बेवाले, प्रवीण कुचनकार, सुभाष मते, नबी शेख, उदय रायपुरे, डॉ. महाकुलकर, राजू ठेंगणे,अनिल झाडे,राजू किन्हेकर, अजय रायपुरे,खालिद भाई,प्रदीप मते,अभय चौधरी,रामभाऊ शिडाणा, गणेश गुंडावार तसेच शहरातील मोठ्या संख्येने नागरिक सहभागी झाले.
मारेगाव तालुका मागास असून येथील बहुसंख्य लोक शेतकरी व कष्टकरी वर्गातील आहे. रोजगारांच्या संधी अत्यंत मर्यादित असून मारेगाव जरी नगरपंचायत असले तरी प्रत्यक्षात गावाचीच ओळख आहे. अशा परिस्थितीत नगरपंचायतीने थेट २१ टक्के करवाढ करून सर्वसामान्य नागरिकांवर आर्थिक बोजा लादल्याचा आरोप यावेळी करण्यात आला.
बैठकीत या करवाढीविषयी सविस्तर चर्चा झाली. या विषयावर नगरपंचायतीच्या आगामी महासभेत एकजुटीने विरोध करण्याची हमी सर्व नगरसेवकांनी व्यक्त केली. या नगरसेवकांमध्ये नंदेश्वर आसुटकर, जितू नगराळे, वैभव पवार, राहुल राठोड, किन्हेकर ताई, परचाके ताई, अंजुम शेख आणि अनिल गेडाम यांचा समावेश होता.
