सह्याद्री चौफेर | ऑनलाईन
वणी : मालमत्ता व पाणी करावर लावण्यांत आलेल्या व्याजाची रक्कम माफ करा, अशा आशयचे निवेदन शुक्रवारी (10) रोजी युवा सेनेच्या वतीने नगर परिषद मुख्याधिकारी वणी यांना देण्यात आले.
वणी शहरातील नगर परिषद अंतर्गत येत असलेल्या मालमत्ता व पाणीकर धारकांकडून कर वसूल करण्यात येते.संभवत: मालमत्ता व पाणीकर धारकांनी काही अपरिहार्य कारणास्तव तसेच आर्थिक अडचणीमुळे कराची रक्कम वेळेत भरणा केली नाही. मात्र, आता अनेक कर धारक सध्यास्थितीत कराचा भरणा करण्यास तयार आहेत. परंतु भरमसाठ रक्कम व्याजाचे स्वरूपात आकारण्यात आल्यामुळे कराच्या रक्कमेत अतुलनीय वाढ दिसून येत आहे.
नगर परिषदेचे उत्पन्न वाढविण्याकरिता भरमसाठ रक्कम व्याजाचे स्वरूपात आकारण्यात आल्यामुळे सामान्य नागरिकांना त्याचा मानसिक त्रास सहन करावा लागत आहे. अगोदरच महागाईची डोकेदुखी आणि त्यात व्याजाची भरमसाठ रक्कम कराचे स्वरूपात आकारणे म्हणजे सामान्य नागरिकांवर सपशेल अन्याय ठरत आहे. यापूर्वीच्या मुख्याधिकाऱ्यांनी व्याज माफ करून मुद्द्दल रक्कम वसूल केली आहे.व्याज माफीचा ठराव करण्यात यावा.करिता कराचे स्वरूपात आकारण्यात येत असलेली व्याजाची रक्कम माफ करून वरील कर मुद्दल स्वरूपात आकारण्यात यावा, व्याजाची रक्कम आकारल्यास युवासेनेकडून तिव्र स्वरूपाचे जनआंदोलन छेडण्यात येईल असा इशाराही उपजिल्हा प्रमुख अजिंक्य शेंडे यांनी निवेदनातून देण्यात आला आहे.
निवेदन देतांना माजी उपजिल्हा प्रमुख दिपक कोकास, माजी शहर प्रमुख राजू तूरणकर, विनोद दुमणे आदी शिवसैनिक उपस्थित होते.